Olutuwiliki ola halelela okulongifa omayambidido mokutunga omatungo, oo hae tu kwafele moilonga yokuudifa. Pashihopaenenwa, momudo woilonga womo 2023, oilonga oyo ya longwa moitaimbelewa yEendombwedi daJehova oya pula oshimaliwa shi dulife peetriliyona 9 deedola daNamibia a, opo ku landwe oilongifo, ku tungwe, ku wapekululwe nokukaleka monghalo iwa Omalupale Ouhamba nOmalupale Oyoongalele mounyuni aushe. Oshimaliwa osho osha wedwa koshimaliwa osho omaongalo mounyuni aushe a longifa mokufila oshisho Omalupale Ouhamba.

 Shikwao vali, omayambidido ohaa longifwa yo mokutunga nokufiloshisho omatungo oitaimbelewa, oo haa kwafele mokuunganeka nokuyambidida oilonga yokuudifa mounyuni aushe. Otwa ninipika oilonga oyo hatu longo moitaimbelewa, opo tu longife omayambidido oo mokutunga nokuwapekulula Omalupale Ouhamba nOmalupale Oyoongalele. Ashike natango, ohashi pula oshimaliwa shihapu, opo ku wapekululwe, ile ku lundululwe omatungo oitaimbelewa. Omolwashike oilonga oyo ya fimana? Ongahelipi oitaimbelewa hai yambidida oilonga yokuudifa? Natu ke shi taleni.

 Oitaimbelewa ihapu oya tungwa konima yomido di dulife po 30, ile 40! Nicholas, oo e li kOshikondo shOkuduta nOkutunga shomOunyuni Aushe, okwa ti: “Nokuli nomatungo oo a kalekwa monghalo iwa ohaa kulupa nohaa kala e na omaupyakadi omafimbo amwe. Okuwapekulula ohaku kwafele etungo li dule okulongifwa efimbo lile.”

 Omatungo aBetel nao okwa pumbwa okulongwa, opo a yambidide omalunduluko oo taa ningwa mehangano. Mounyuni aushe, omuvalu wovaudifi owa hapupala eshi oitaimbelewa ihapu ya tungwa. Opo nee tu yambidide ekulo olo, otwa li twa pumbwa ovaliyambi vahapu, opo va ka longe keembelewa odo. Oshidjemo, omatungo oo kwa li manene paife okwa ninipikwa!

 Eameno ola fimana yo. Molwaashi otu li momafiku axuuninwa onghalelo ei yoinima, ohatu hangwa koiponga yopaushitwe. (Lukas 21:11) Ngeenge otwa longifa eenghedi dipe eshi hatu wapekulula omatungo, otashi ka kwafela ovo tava longele mo va kale va amenwa. Omalunduluko oo okwe shi ningifa yo shipu kovamwatate va longife omatungo oo mokuunganeka oikwafa nova twikile okuyambidida oilonga yokuudifa, konima ngeenge opa holoka oiponga yopaushitwe.

 Koshi yewiliko lOlutuwiliki, ovamwatate ova longa oilonga yokutunga moitaimbelewa i li 43 pefimbo lomudo woilonga womo 2023. Osho osha hala okutya etata lomatungo aBetel mounyuni aushe otali wapekululwa. Natu ka taleni pauxupi koihopaenenwa imwe oyo tai ulike efimano loilonga oyo.

 Angola. Matt, oo e li oshilyo shOkomitiye yOshitaimbelewa shaAngola, okwa ti: “Otwa li tu na oufembanghenda wokumona nghee exunganeko olo li li muHaggai 2:7 tali wanifwa monghedi ye likalekelwa. Moule ashike womido omulongo, otwa mona omuvalu wovaudifi wa hapupala neepelesenda 60! Oukwaneumbo waBetel owa li wa pumbwa okuhapupala, opo ku yambididwe ovaudifi ovo. Ndele molwaashi omatungo aBetel okwa li manini, inatu dula okushiva ovanhu vahapu ngaashi twa li twa hala. Ovabetel ova li ve na okulonga noudiinini nokulonga eevili dihapu di dulife pwaado va li ve na okulonga.”

 Okwa li pa nangekwa ovamwatate va tale nghee tava dulu okutamununa mo oshitaimbelewa. Potete, ova li ve wete tashi ka endelela okuwapekulula omatungo oo e li po nale. Ashike eshi va ninga omapekapeko, ova mona kutya okuwapekulula kaku fi onghedi ya denga mbada yokulongifa omayambidido. Ponhele yaasho, ova li va tokola okulanda nokuwapekulula omatungo oo e li popepi navo. Matt okwa ti: “Eshi eetepo li na sha nokulanda nokuwapekulula omatungo, oo a tungwa nale, la ulikilwa Okomitiye yOshitaimbelewa, otwa li hatu lipula kutya omatungo oo itaa ka kala a wapala ngaashi oo twa tunga fye vene. Ashike xuuninwa otwa ka mona kutya omatungo oo otaa wapalele onghalo yetu. Jehova okwa nangeka noupuna etokolo olo.”

 Oshitaimbelewa shaAngola otashi dulika tashi ka pumbwa onhele ya wedwa po monakwiiwa. Ashike omatungo oo mape, eenhele dokunangala odo hadi dulu okulundululwa mObetel nosho yo eenhele dokuhiila, odo di li kondje yaBetel, oda kwafela oshitaimbelewa shi dule okuxumifa komesho oilonga yokuudifa.

 Japan. Omatungo manene oshitaimbelewa okwa li a tungwa oule womido 40 da ka lupuka, namahapu omuo inaa wapekululwa unene. Osha pula oilonga ihapu okukaleka po omatungo oo, ashike nonande ovamwatate ova longa noudiinini opo ve a kaleke po, otwe a longifa efimbo lihapu li dulife pwaalo a li e na okulongifwa. Omolwetomheno olo, paife ohatu a wapekulula unene.

 Onghalamwenyo yaBetel nayo oya kala nokulunduluka omudo nomudo. Momido odo da tetekela 2015, oukwaneumbo waBetel owa kala hau longekidilwa oikulya. Eenduda dihapu daBetel dokunangala moJapan oda li da longwa di na eenhele dinini “dokutelekela.” Paife, Ovabetel ohava longekida oikulya yavo vene. Okuwapekulula okwa ningifa eenhele dokutelekela domeenduda daBetel di kale da andjuka nawa, nohashi kwafele Ovabetel va longekide eendja davo noupu. Kumiko, omumwameme oo ta longele koshitaimbelewa shaJapan, okwa ti: “Eenhele dokutelekela ohadi ningifa nge ndi kale nda manguluka nohadi kwafele nge ndi yambidide elongekido lipe laBetel.”

 Oilonga oyo hai longwa koshitaimbelewa shaJapan oi li oshitukulwa sha fimana shoilonga yokuudifa mounyuni aushe. (Mateus 28:19, 20) Oshitaimbelewa shaJapan osho shimwe shomoitaimbelewa ivali aike oyo hai pilinda Ombiibeli ye lixwa po. Onghee hano, shimwe shomeeprojeka dokutunga odo tadi xumu komesho, okutula mo omashina okuteta eembapila naao okwoongela ondwi, opo ku amenwe ovo hava longo kOshinyanyangido. Okulanda nokutula mo omashina oo, osha pula eedola eemiliyona 18 deedola daNamibia, ashike otu na oushili kutya oshitaimbelewa otashi twikile nokupilinda nokwaandjakaneka eendja dopamhepo.

 Ovamwatate ova li va shilipaleka kutya oilonga yokutunga inai ya moshipala okupilinda Ombiibeli. Trey, oshilyo shOkomitiye yOshitaimbelewa shaJapan, okwa ti: “Pefimbo lokutunga, ehangano ola li la pitifa omatoloko mahapu Ombiibeli, novanhu vahapu mounyuni ova li va pumbwa Eembiibeli. Oikondo ya yoolokafana nosho yo ovanhu vomeekaambani dokondje ohava longele kumwe, opo va lukile kutya onaini ve na okutula mo omashina mape nonaini ve na okupilinda oishangomwa.” Nonande ova li va taalela omashongo oo, ova li va dula okupilinda hanga Eembiibeli 220 000 omwedi keshe, pokati kaMarsa naAuguste 2023, eshi onhele yokupilindila ya li tai longwa. Oilonga aishe oyo oya li ya dula okupwa nopehe na okulongifa oshimaliwa shihapu.

 Oilonga yokuwapekulula ohai kala yo ya kwatela mo okuxupifa olusheno. Otamu tulwa eesola dipe, odo tadi xupifa oshimaliwa shi fike hanga N$2 175 000.00, osho hashi longifwa molusheno omudo keshe. Ohatu ka tula mo omakende oo e na omahalasha atatu, opo tuha longife olusheno lihapu naasho otashi ka xupifa oshimaliwa shi fike hanga N$181 000,00 omudo keshe. Nonande oinima oyo hai xupifa olusheno oi na ondilo, otai tengenekwa tai ka xupifa oshimaliwa shi dulife peemiliyona 63 deedola daNamibia momukokomoko woule wefimbo olo hatu longifa eesola nomakende. Otashi ka kwafela yo omudingonoko womatungo.

 Oilonga oyo tai longwa koitaimbelewa oyo ivali, oya ulika kutya oilonga i fike peni ya pumbwa okulongwa, opo omatungo etu aBetel a yambidide oilonga yokuudifa. Ashike oilonga oyo inai pwa natango. Aaron, oo ha longo kOshikondo shOkuduta nOkutunga shomOunyuni Aushe, okwa ti: “Ovamwatate ova longa shihapu, ashike natango ope na shihapu shi na okulongwa.” Ongahelipi oilonga oyo tai dulu okumanifwa? Okwa twikila ko, a ti: “Omayambidido ehalo liwa okwa kwafela meeprojeka da fimana nohatu pandula yo omhepo yeliyambo yaaveshe ovo va li ve liyamba monakudiwa nosho yo ovo tava ningi omalongekido oku ka kwafela monakwiiwa. Eshi ovamwatate tava yambidida komudidi nosho yo pashimaliwa, otashi ulike kutya Jehova ota nangeke noupuna oilonga ei.” — Epsalme 110:3.

 Oilonga yetu aishe yokutunga nokuwapekulula ohai yambididwa komayambidido ehalo liwa, oo mahapu haa yandjwa okupitila ko-donate.pr418.com. Otwa pandula neenghono eshi tamu twikile okuyandja nehalo liwa.