Omudo keshe ohapa kala ovanhu omayovi tava ninginifwa nomolwaashi twa pumbwa okutunga omatungo mahapu opo a longifwe okulongela Jehova. Opo ovamwatate va yambidide ekulo olo, Oikondo yOkuduta Omatungo nOkutunga mounyuni aushe oya ninga eemhangela opo ku tungwe, ile ku wapekululwe eenhele dokwoongalela di dulife 2 700 momukokomoko womudo woilonga womo 2020. a

 Shi nyikifa oluhodi, eemhangela odo oda li da iwa moshipala komukifi wo-COVID-19. Opo Okomitiye yOkunyanyangida yOlutuwiliki i amene ovamwatate novamwameme nokudulika komalombwelo epangelo, oya kangheka eeprojeka dihapu dokutunga mounyuni aushe. Ndele nande ongaho, momukokomoko womudo woilonga womo 2020, ofimbo omukifi wekomba inau hovela ova li va hangika va tunga nale nokuwapekulula eenhele dokwoongalela di dulife 1 700. Shikwao vali, eeprojeka da kula dokutunga nokuwapekulula oitaimbelewa i dulife 100 oda li da manifwa. Natu ka taleni nghee eeprojeka mbali odo da pwa da kuma ovamwatate.

 Oshitaimbelewa shaCameroon. Oshitaimbelewa shonale, osho sha li muDouala, osha li shinini nosha li sha pumbwa okutamununwa mo. Okomitiye yOkunyanyangida oya li ya hala okuwapekulula oshitaimbelewa, ashike osha li tashi ka pula oimaliwa ihapu okuninga ngaho. Ova li va ninga omakonakono ngeenge otava dulu oku shi tunga konhele imwe, ile va lande omatungo onhumba oo tava dulu okuwapekulula, ashike kava li va pondola.

 Ovamwatate ova li va uda kutya koumbangalanhu waDouala, epangelo ola li la ninga eemhangela dokulonga opate popepi nOmalupale etu amwe oyoongalele. Molwaashi opate oi li popepi, osho otashi ke shi ningifa shipu okuya ko nokumona noupu oinima, ngaashi omeva nolusheno. Osho osho naanaa oshitaimbelewa sha li sha hala. Onghee Olutuwiliki ola li la pitika okutungwa kwoshitaimbelewa shipe shi tungilwe konhele oko kwa tungilwa nale Olupale lOshoongalele.

 Eendombwedi nosho yo ovanailonga vopakafimbo ovo vehe fi Eendombwedi ova li va longela kumwe moprojeka oyo, naasho osha li sha xupifa oimaliwa nefimbo. Kava li va longifa oimaliwa ihapu moprojeka oyo ngaashi va li va teelela. Ova xupifa oimaliwa i dulife pomamiliyona 32. Ovabetele ova li va dula okutembukila komatungo avo mape ofimbo omukifi wekomba inau hovela.

 Ovabetele muCameroon ova mona ouwa eshi ve na eenhele diwa dokukala nokulongela, nova tala ko oshitaimbelewa shipe shi li oshali ya dja kuJehova. Ovalihomboli vamwe ova ti: “Otwa hala okulonga noudiinini, noinatu hala okukwata oshali ei okahetengi.”

 Ombelewa yokutoloka yOshitojolabal muMexico. Oule womido dihapu, ospana yokutoloka Oshitojolabal oya kala tai longele moshitaimbelewa shaCentral America, popepi noshilando shaMexico. Ashike, elaka lOshitojolabal ohali popiwa unene muAltamirano nosho yo muLas Margaritas, oyo i li kokule neekilometa 1 000. Noshidjemo, ovatoloki ova li hava mono shidjuu okushiiva nghee elaka olo tali ende tali lunduluka. Noshitaimbelewa osha li hashi mono noudjuu ovamwatate novamwameme vopopepi ovo va wana notava dulu okulongifwa mokutoloka Oshitojolabal nokukwatwa omawi.

 Nomolwaasho Okomitiye yOkushanga yOlutuwiliki oya li ya hala ospana i tembukile koshitukulwa oko haku popiwa Oshitojolaba. Opo i shi ninge, oshitaimbelewa osha li sha ninga etokolo lokulanda omatungo noku a wapekulula. Okuninga ngaho osha li shi na ombilixa nosha xupifa oshimaliwa.

 Umwe womovatoloki okwa popya nghee a mona ouwa, a ti: “Oule womido omulongo odo nda longa ndi li omutoloki koshitaimbelewa, inandi shakeneke nande onale oukwaneumbo hau popi elaka letu. Paife eembelewa detu odi li moshitukulwa omo mu ovanhu ovo hava popi lela elaka lOshitojolabal. Ohandi endafana efiku keshe novanhu ovo va nyama lela elaka lOshitojolabal. Oupuna woitya yange paife ouhapu nongushu yoilonga yetu oya xwepopala.”

 Momudo woilongo womo 2021, ope na eemhangela dokutunga eembelewa dokutoloka 75 nosho yo omatungo eefikola dOmbiibeli ngeenge eenghalo otadi shi pitike. Oilonga inene yokutunga oitaimbelewa ihetatu otai twikile, mwa kwatelwa oprojeka ipe yeembelewa da kula koRamapo, New York, nosho yo okutembula eembelewa doitaimbelewa yaArgentina naItaly. Shikwao vali, okwa pumbiwa Omalupale Ouhamba 1 000, oku na yo eenhele dokwoongalela di dulife po 6 000 odo da pumbwa okupingenwa po molwaashi itadi wapalele, nope na Omalupale 4 000 oo a pumbwa okuwapekululwa.

 Oilonga yokutunga nokuwapekulula ohai futilwa ngahelipi? Omumwatate Lázaro González, oshilyo shOkomitiye yOshitaimbelewa shaCentral America, okwa li a nyamukula epulo olo eshi a li ta popi kombinga yombelewa yokutoloka yOshitojolabal. Okwa ti: “Ovo ve li koshi yoshitaimbelewa shetu, kave na sha shihapu. Onghee, ngeno katwa li twa mona ekwafo lovamwatate mounyuni aushe, ngeno inatu dula okutunga eembelewa dokutoloka domalaka ovaitaveli vakwetu. Omayambidido ovamwatate mounyuni aushe ohae shi ningifa tashi shiiva opo ovatoloki va dule okuya keenhele oko omalaka avo haa popiwa. Ohatu pandula ovamwatate mounyuni aushe tashi di komutima omolwomayambidido avo ehalo liwa.” Heeno, eeprojeka dokutunga nokuwapekulula ohadi shiiva ashike omolwomayambidido eni koilonga yomounyuni aushe, oo vahapu vomunye hamu yandje tamu pitile ko donate.pr418.com.