Oshinima shimwe osho Eendombwedi daJehova da kala da teelela nodjuulufi neudo, oshitukulwa 1 shoshinyandwa Oiningwanima yomonghalamwenyo yaJesus. Ovanhu omamiliyona ove shi tala nale. Oshi li oshitukulwa shotete shomoitukulwa 18. Eenghendabala dilipi ovamwatate novamwameme va ninga, opo ku pitifwe ouvidio ovo, nongahelipi wa yambidida eenghendabala da tya ngaho?

 Koshitaimbelewa shaAustralasia, oko ouvidio vahapu va pamba Oiningwanima yomonghalamwenyo yaJesus tava kwatelwa, ohaku kala ovanhu 50 fiyo 80 lwaapo, eshi taku longekidwa okatukulwa keshe. a Ovanyandi, ovo tava kwata ouvidio novaliyambi aveshe ohava longekidilwa omusha, ouvalelo noukokotomwa. Oha ku tokolwa komesho yefimbo kutya oikulya ilipi tai ka longekidwa. Esther, oo ha longo kOshikondo shOikulya, okwa ti: “Ohatu lande oikulya keefitola da yoolokafana, opo tu mone oikulya i li monghalo iwa kombilixa. Ohatu lundulula alushe onghedi omo hatu longekida oikulya, opo tu shilipaleke kutya ina pa hepa sha.” Efiku keshe, ohatu longifa oshimaliwa shi fike peedola daNamibia 72 lwaapo, mokulanda oikulya yomunhu keshe.

 Kakele koikulya, ovanyandi naavo tava kwata ouvidio ova pumbwa yo okwaamenwa. Okwaamenwa kushike? Omafiku mahapu moAustralia ohamu kala mwa pupyala noku na omutenya. Natango, omu na eenhe detango da nyika oshiponga. Opo keshe umwe a kale a amenwa ketango nokuha lololwe komutenya, ovamwatate novamwameme ohava longo noudiinini va dike eetenda neenhele omo tava dulu okufuda po, hava shilipaleke kutya ope na omaadi a wana oku amena oshipa komutenya, ounduda nosho yo omeva. Kevin, oo ha longo koshikondo shoikwamawi nouvidio, okwa ti: “Vahapu ovo hava longo oilongo oyo Ovabetel, ovo hava di kondje. Ohava longo oilonga oyo naikwao ihapu nelininipiko nonehafo. Katwa li hatu dulu okumanifa oprojeka ei nopehe na ekwafo lavo.”

 Oitukulwa imwe itai monika nawa, ngeenge oya fanekelwa moshitaimbelewa nokuli nomonhele omo hamu kwatelwa ouvidio, ile mostudio. Peemhito da tya ngaho, ouvidio ohava ka kwatelwa keenhele di li kondje yoshitaimbelewa. Opo tu faneke oitukulwa i nasha nopefimbo lOmbiibeli, eshi paha li eepala dolusheno, eepate doteya nosho yo omaumbo oshinanena, ovanyandi naavo tava kwata ouvidio luhapu ohava i koitukulwa yokokule. Oikutu yavo yokunyanda noilongifo ohai pakelwa nokutwalwa konhele ya amenwa oko tava ka kwatela ouvidio. Ofimbo inaku hovelwa nokukwata ouvidio, ovamwatate, ovo tava kwafele mokuunganeka, ohava shilipaleke kutya ope na omashina, oo haa longifwa ponhele yolusheno, omeva mayela okunwa noundjuwo. Ovanyandi naavo tava kwata ouvidio ohava nangekwa momaumbo Eendombwedi domoshitukulwa, moukalafana, meehotela, ile momaumbo manini opakafimbo.

 Okukwatela ouvidio kondje yoshitaimbelewa oshi na ondilo, hashi kwata efimbo noshi lolola kwaaveshe ovo va kwatelwa moprojeka oyo. Onghee, mo 2023, Olutuwiliki ola dimina ku landwe eshina olo hali ulike ouvidio, ovo have ku ningifa u kale wa fa u li ponhele imwe i lili, olo la kosha eedola daNamibia eebiliyona 44 lwaapo. Eshina olo oli na eeskrina odo hadi ulike omafano a yela nawa, noli na ouyelele hau longele kumwe naasho tashi ulikwa keeskrina, opo okavidio ka kale ka fa taka kwatelwa ponhele imwe i lili. Oshidjemo, paife itatu ka kwatela vali ouvidio keenhele dokokule osho hashi pula oshimaliwa shihapu. Darren, oshilyo shOkomitiye yOshitaimbelewa shaAustralasia, okwa ti: “Okukwata ouvidio hatu longifa eshina olo hali ulike ouvidio, ohashi kwafele ovanyandi vaha kale va loloka nosho yo ovo tava faneke va dule okufanekulula oitukulwa imwe luhapu ngaashi tava dulu. Pashihopaenenwa, ngeenge hatu kwatele ouvidio pondje, ohatu kala ashike tu na ominute dinini dokufaneka etango, ofimbo inali ningina. Ashike eshi hatu longifa eshina eli, ohatu dulu okweendulula okavidio keningino letango lwoikando fiyo osheshi twa kwata okavidio ta ka wapalele.”

 Moshitukulwa keshe shokavidio Oiningwanima yomonghalamwenyo yaJesus ohatu kala twa pumbwa ovanyandi omafele nosho yo omuvalu muhapu waavo tava kwata ouvidio. Ohava kala ve uditile ngahelipi omaliyambo aeshe oo taa ningwa, opo va filwe oshisho?

 Amber, oo a dja koMelbourne, opo pe na eekilometa 700, opo a ka kufe ombinga moprojeka, okwa shanga a ti: “Ovamwatate vokObetel ova kala nokufila nge nawa oshisho, okudja ashike eshi nda fika pokapale keedila. Ovabetel vahapu ova kala hava shivi nge tu lye pamwe navo, ile tu nwe otee. Ngeenge twa ya konhele oko taku kwatelwa ouvidio, onda li handi kala nda mangulukila keshe umwe nondi udite ndi holike. Onda li nda mona omanangekonoupuna mahapu molweendo olo. Kanda li nda fa handi liyambe nandenande!”

 Derek, oo ha longo nospana yokukwata ouvidio, okwa ti: “Oikondo ihapu oya kala noku tu yambidida okudja pehovelo. Onda hafa eshi nda kala handi longo pamwe novamwatate novamwameme, ovo va yamba po efimbo lavo, oiniwe neenghono davo moprojeka ei. Ove na omhepo yeliyambo, tave shi ningi nehalo liwa nove na onghenda. Jehova okwe tu nangeka noupuna. Onda tomhwa kutya ke na ko ashike nasha noidjemo yoilonga yetu, ndele nanghee yo hatu i longo.”

 Otwa pandula, eshi mwa yambidida ouvidio ava mokuyandja omayambidido, mwa kwatelwa oo a yandjwa okupitila ko donate.pr418.com.