Mokati kovanhu omamiliyona omafele, ovo hava di muAmerica lokOlukadi, omu na ovanhu omamiliyona, ovo hava popi omalaka avo oshidalelwamo nove na omaputuko avo. Vahapu vomuvo ovamwatate novamwameme vetu, nova lenga omaputuko avo. Opo tu kwafele ovanhu ve lihonge oshili yOmbiibeli, ohatu toloka nokwaandjakaneka oishangomwa momalaka oshidalelwamo omuAmerica lokOlukadi e dulife 130. a Ndele nande ongaho, vamwe ohava patanekwa, molwaashi va hoolola okulongela Jehova nokweefa po eenghulunghedi dihe li pamishangwa, odo di shiivike nawa moitukulwa yavo. Mbela omayambidido eni okwa longifwa ngahelipi opo va kwafelwe?

 MoMexico, ovamwatate novamwameme vomomuhoko wOvahuichol, hava di keemhunda doshitukulwalongo shaJalisco, ova li va anya nefimaneko okuhakufa ombinga meenghedi domalongelokalunga, oo itaa tu kumwe nOmbiibeli. b Osho osha li sha handukifa vamwe momudingonoko wavo. Momafiku 4 Desemba 2017, ongudu yovahangakeni ya nyika oshiponga oya li ya ponokela ongudu yEendombwedi nosho yo ovo va li pamwe navo. Ongudu yovahangakeni oya li ye va taataa mo keenghono momudingonoko wavo, ya hanauna po omaumbo avo noku va ningila omatilifo kutya otava ka dipaa keshe oo ta ka kendabala okwaaluka.

 Diva, Eendombwedi domeedolopa, odo di li popepi, oda li da fila oshisho eemhumbwe dovamwatate novamwameme ovo. Mbela oshike twa ninga po, opo va dule okushuna komaumbo avo? Omumwatate Agustín okwa ti: “Katwa li tu na oimaliwa ya wana, opo tu konge hahende, nokatwa li tu shii kutya natu ye peni tu ka konge ekwafo lopaveta.”

 Molwaashi oufemba wopalongelokalunga wovamwatate owa li tau nyonwa po, oshitaimbelewa shaCentral America osha li sha katuka onghatu diva. Tete, osha pula ovanambelewa vomoshitukulwa va ninge omakonakono e na sha nomaponokelo oo. Lwanima, oshitaimbelewa osha li sha pewa epitikilo kOkomitiye yOvaunganeki yOlutuwiliki lEendombwedi daJehova i longele kumwe noshikondo shokuungaunga noinima yopaveta keembelewa detu da kula nokutula mo oshibofa ponhele yovamwatate novamwameme Ovahuichol. Mokweendelako kwefimbo oshibofa osha ka pwilikinwa kOmhangu yoPombadambada yaMexico.

 Ospana yeehahende, da dja koilongo ya yoolokafana, oya li ye lilongekidila oshibofa osho, noya yelifa kutya ngaashi ashike vamwe va fimaneka eputuko laavo hava popi omalaka oshidalelwamo, ovanhu vomoshitukulwa navo ove na yo okufimaneka nokwaamena oufemba wavakwao. Ovanhu aveshe ove na omaufemba onhumba, kashi na nee mbudi kutya ohava di peni.

 Momafiku 8 Juli 2020, Omhangu yoPombadambada oya ninga etokolo tali popile Eendombwedi daJehova. Oya tokola kutya keshe tuu oo a li a tewatewa mo momukunda wavo na shune ko. Agustín, oo a popiwa metetekelo, okwa popya nghee ye nosho vamwe ve udite, a ti: “Otwa hafa notwa pandula osho ovamwatate ve tu ningila. Ngeno kava li ve tu kwafela, ngeno inatu dula okuninga po sha.”

 Ovamwatate vokoSan Juan de Ilumán, omukunda u li muEcuador, hamu di vahapu ovo hava popi omalaka oshidalelwamo okOtavalo Valley, navo ova li va shakeneka eshongo la faafana. Mo 2014, konima eshi va mona epitikilo olo va li va pumbwa, ova li va hovela okutunga Olupale lOuhamba. Ashike omufita umwe okwa li a kwatela komesho ongudu yovahangakeni ve dulife 100 nova fininika ovamwatate va kangheke oilonga yokutunga. Ovanhu vomomudingonoko ova li va lombwela Eendombwedi daJehova di efe po okwoongala pamwe.

 Ovamwatate koikondo yokuungaunga noinima yopaveta koshitaimbelewa shaEcuador nosho yo keembelewa da kula ova li va longela kumwe opo va amene eongalo olo, molwaashi oufemba wavo wopalongelokalunga owa li tau iwa moshipala. Ova li ve shi twala komhangu. Osho osha ningifa ovanhu momudingonoko va shune omutwe moipeta nokweefa eongalo li hovele vali okwoongala nokumanifa okutunga Olupale lOuhamba. Ashike opo tu amene oufemba wovamwatate monakwiiwa, ovakalelipo vetu ova pula eemhangu dopombada epulo eli la fimana: Mbela ovo hava popi omalaka oshidalelwamo kave na okufimaneka oufemba wovanhu, ngaashi sha tambulwa ko mounyuni aushe?

 Momafiku 16 Juli 2020, Omhangu yoPombadambada yaEcuador oya li ya pwilikina koshibofa osho. Ovamwatate ovo ve li eehahende moEcuador ova li va kalela po eongalo. Navali, ovamwatate vane va dja kondje yoilongo, ovo ve li eehahende nove na owino, ova li va popya yo momhangu. Omolwomangabeko omukifi wo-COVID-19, ova li ve shi ninga pavidio, ve li koilongo yavo. Eshi oshikando shotete omhangu ya efa eehahende, odo tadi popile Eendombwedi daJehova, di shi ninge momukalo wa tya ngaho. c Ospana oyo oya li ya tofa meedjo dopaveta dopaiwana, opo i shilipaleke kutya ovanhu ovo hava popi omalaka oshidalelwamo inava pumbwa okweefa po oufemba wavo, molwaashi ashike ve li oshitukulwa shomuhoko wonhumba.

 Ovamwatate vomOtavalo Valley ova teelela nodjuulufi etokolo lOmhangu yoPombadambada. Fimbo va teelela, ova pandula neenghono ekwafo olo va mona. César, oo e li omukulunhuongalo meongalo laIlumán Quichua, okwa ti: “Jehova oye aeke ta dulu okuningila shihapu ovanhu vanini okupitila mehangano laye.”

 Eehahende adishe, odo tadi kwatele komesho oshikumungu osho, odi li Eendombwedi daJehova noda hafa eshi tadi kufa ombinga nopehe na ofuto. Ashike nande ongaho, okutula mo oshibofa osho, oku shi lilongekidila noku ke shi popila momhangu, osha pula efimbo noimaliwa. Eehahende detu nosho yo ovamwatate vamwe, ova longifa eevili di dulife 380 mokulilongekidila eemhangu nosho yo eevili 240 da wedwa po mokutoloka omikanda odo da ka longifwa moMexico. Eehahende hanga 40 mounyuni aushe oda longifa eevili omafele moshibofa osho shomuEcuador. Ongahelipi twa dula okuwanifa po eefuto odo da longifwa, opo ku ungaungiwe noshibofa osho shovamwatate? Omolwomayambidido oo hamu yandje okupitila meenghedi odo tadi hangwa ko donate.pr418.com. Tangi unene, eshi hamu yandje nehalo liwa.