Momudo 2020 omwa ningwa oiponga yopaushitwe ihapu, nomukifi wekomba, o-COVID-19, omo yo wa holoka mounyuni aushe. Eendombwedi daJehova oda kwafela ngahelipi ovo va kumwa?

 Momukokomoko womudo woilonga wo 2020, a Okomitiye yOkuunganeka yOlutuwiliki oya li ya dimina ku longifwe eedola daNamibia eemiliyona 425 lwaapo mokuyandja oikwafa. Oya li ya kwafela ovo va ninga oihakanwa yoiponga i dulife po 200, mwa kwatelwa omukifi wekomba o-COVID-19, oikungulu inene yomhepo, omafundja moAfrica, ondjala moVenezuela noshikukuta moZimbabwe. Omayambidido okwa longifwa mokulanda oikulya, omeva, oikutu, oinima yokuwapaleka nosho yo okufutila eenhele dokukala, ouhaku, okupangela oinima nokuwapekulula. Natu ka taleni koihopaenenwa imwe yoilonga yokuyandja oikwafa.

 O-COVID-19. Ovamwatate novamwameme mounyuni aushe ova kumwa komukifi wekomba palutu, pamadiladilo nopamaxupilo. Opo va kwafelwe, opa li pa totwa Eekomitiye dOkuunganeka Oikwafa di dulife 800 mounyuni aushe. Eekomitiye odo oda kala nokukonenena eemhumbwe dovamwatate nokuyandja eelaporta diva kOkomitiye yOkuunganeka opo i shiive nghee tai dulu okuyandja oikwafa.

 Momukokomoko womudo oo, eekomitiye odo oda kwafela vahapu va mone oikulya, omeva, oikwanoipangifo yokukaleka po oundjolowele nomiti. Moitukulwa imwe, eekomitiye oda kala nokulongela kumwe novakulunhuongalo vomoshitukulwa opo va kwafele ovamwatate va mone ekwafo kepangelo.

 Naavo vehe fi Eendombwedi ova didilika oilonga yetu yokuyandja oikwafa. Pashihopaenenwa, Field Simwinga, omukalelipo woshitukulwa shaNakonde, moZambia, okwa lombwela ovamwatate a ti: “Otwe mu pandula unene eshi mwa pa omaukwaneumbo oikwafa oyo va li va pumbwa.”

 Ondjala moAngola. Omolwomukifi wekomba, moAngola kamwa li mu na oikulya ya wana noya li nokuli ya ninga ondilo. Osha li shidjuu neenghono kovamwatate novamwameme vahapu okulanda oikulya.

 Oshitaimbelewa shaBrazil osha li sha pulwa opo shi kwafele ovamwatate vomoAngola moku va tumina eeshako doikulya. Opo va longife nawa omayambidido, ovamwatate ova ninga omapekapeko noukeka anghee tava dulu okulanda nokutuma oikulya oyo. Oshako keshe, i na eekilograma 20 doikulya, ngaashi olwishi, omakunde nomaadi okulya, oya li tai pula eedola daNamibia 334 oku i landa noku i tuma. Fiyo opapa, okwa tumwa eeshako doikulya 33 544, di fike peetona 654. Oikulya oyo oya li yo ya kwatela mo oyo ya landwa koshitaimbelewa shaAngola noya pewa ovanhu ve dulife 50 000!

 Mbela ovamwatate ove uditile ngahelipi ekwafo olo va mona? Alexandre, oo ha di koshitukulwa she likalela moAngola, okwa ti: “Osho osha tomha nge kutya Jehova oku hole nge nonokutya kandi li aame andike. Ondi wete kutya ehangano laJehova ola lenga nge!” Mariza, omudalakadi oo ta tekula ounona vaye oye aeke, okwa ti: “Jehova okwa uda onghuwo yange. Ohandi mu pandula nosho yo ehangano laye!”

 Oikwafa yoshikukuta moZimbabwe. Momukokomoko womudo woilonga wo 2020, Zimbabwe osha li sha dengwa koshikukuta, novanhu omamiliyona ova li tava fi ondjala. Eendombwedi omayovi kada li di na oikulya ya wana.

 Eekomitiye dOkuunganeka Oikwafa nhano oda li da lombwelwa opo di kwafele ovamwatate va mone oikulya. Ovaudifi omafele ova li va kwafela mokupakela oikulya, oipumbiwa ikwao nokuyandja eehauto davo di ka longifwe. b Momukokomoko womudo woilonga wo 2020, okwa longifwa eedola daNamibia eemiliyona 10 lwaapo, opo ovanhu ve dulife 22 700 va pewe oikulya!

 Peemhito dimwe, ovamwatate ova li va mana po oikulya yavo ofimbo oikwafa inai fika. Eshi oikulya ya fika, ovamwatate ova li va hambelela Jehova. Vamwe ova li nokuli va hovela okwiimba omaimbilo Ouhamba.

 Moshitukulwa shimwe, ovafiyekadi vavali vEendombwedi ova li va ya koshoongi shomomukunda oko kwa li taku popiwa kombinga yoikwafa oyo tai yandjwa kehangano limwe olo lihe fi lepangelo. Ashike, oshoongi osho osha ka yandja unene elitulemo koinima yopolotika, novamwameme ovo kava li tava tu kumwe nomilandu dokumona oikwafa oyo. Eshi va fiya po oshoongi osho, ova li tava shekwa nokulombwela taku ti, “Inamu alukila ko oku tamu kongo oikulya!” Ndele nande ongaho, konima ashike yoivike ivali, ovamwatate ova li va fika koshitukulwa osho nokupa ovamwameme oikulya, ofimbo nokuli oikwafa yehangano olo inai fika!

 Okuyandja oikwafa okwa li yo kwa yandja oundombwedi muwa moZimbabwe. Pashihopaenenwa, natu ka taleni koshimoniwa shaPrisca, oo ha di komukunda munini. Nonande eenghalo oda li didjuu omolwoshikukuta, Prisca okwa li ha udifa Etitatu nEtitano keshe, nokuli nopefimbo leendima. Ovanhu vomomukunda wavo ova li have mu ula tava ti: “Oukwaneumbo weni otau fi ondjala molwaashi owe lipaka ashike mokuudifa.” Prisca ohe va nyamukula ta ti: “Jehova iha efa ovapiya vaye.” Inapa pita efimbo lile, okwa li a pewa oikwafa kehangano. Osho osha li sha kumwifa ovashiinda shaye, nova lombwela Prisca tava ti: “Kalunga ine ku efa, onghee otwa hala okulihonga shihapu kombinga yaye.” Paife ovashiinda shaye vaheyali ohava pwilikine kokwoongala oko haku danwa koradio.

 Eshi hatu ehene popepi nexulilo lounyuni ou, onghee ngoo tapa holoka oiponga yopaushitwe. (Mateus 24:3, 7) Ohatu mu pandula neenghono omolwomayambidido eni ehalo liwa oo hamu ningi ko donate.pr418.com, ile meenghedi dimwe di lili. Otaa ka longifwa mokukwafela ovo tava mono oixuna mukeshe shimwe osho va pumbwa.