Ombiibeli oya xunganeka kutya pomafiku axuuninwa otapa ka kala oita, omakakamo edu, omikifi dolutapo nosho yo “omamoniko matilifi.” (Luk 21:10, 11) Eendjovo odo dexunganeko oda twikila okuwanifwa momukokomoko womudo woilonga 2022. a Pashihopaenenwa, oita moUkraine oya twikila noya kuma ovanhu omamiliyona. Omukifi wekomba o-COVID-19 opo ashike wa hangika tau xwepopala. Shimwe vali, ovanhu vahapu ova li va kumwa koiponga yopaushitwe ngaashi: omakakamo edu moHaiti, oikungulu ya nyika oshiponga moCentral America, Philippine nosho yo koushilolukadi waAfrica. Eendombwedi daJehova oda kwafela ngahelipi ovo va li va kumwa?

 Momukokomoko womudo woilonga 2022, ehangano letu ola li la yandja oikwafa kwaavo va li va kumwa koiponga 200 lwaapo! Otwa longifa hanga eedola eemiliyona 17 868 518 mokuyandja oikwafa. Didilika nghee omayambidido a longifwa okukwafela ovo va li va kumwa koiponga ivali.

 Mo 14 Auguste 2021, oshitukulwa shokoushilo waHaiti osha li sha dengwa kekakamo ledu lounene woshiyelekifo 7,2. Shinyikifa oluhodi, ovamwameme vavali nosho yo omumwatate umwe ova fya. Ovo va xupa ova li ve na okulididimikila ouyahame wopalutu nosho yo wopamadiladilo oo wa etifwa kekakamo ledu. Omumwatate wedina Stephane okwa ti: “Molwaashi ovanhu vahapu ova li va fya, modoolopa omwa li hamu kala omafudiko mahapu oshivike keshe, oule u dulife peemwedi mbali.” Omumwatate, Éliézer, okwa ti: “Eendombwedi dihapu kada li di na onhele yokukala, oikutu, eenghaku nosho yo oipumbiwa imwe vali. Ovanhu vahapu ova kala va tila oule weemwedi, omolwomakakamo edu manini oo kwa li haa holoka.”

 Ehangano letu ola li la endelela okukwafela. Oshitaimbelewa shaHaiti osha li sha yandja eetona 53 doikulya, eetenda, eefaila, omatalashe nosho yo eesola dokutula eengodi omundilo. Momukokomoko womudo woilonga 2022, omaumbo e dulife pe 100 okwa li a tungululwa, ile a wapekululwa. Eedola di dulife pomiliyona oda li da longifwa mokuyandja oikwafa.

 Ovamwatate novamwameme ova pandula neenghono. Lorette okwa ti: “Ekakamo ledu ola li la hanauna po filufilu eumbo letu nosho yo ongeshefa yetu. Katwa li tu na osho hatu li. Ashike ehangano laJehova ola li li li pamwe nafye nole tu pa ashishe osho twa li twa pumbwa.” Micheline okwa ti: “Ekakamo ledu ola hanauna po eumbo omo twa li hatu di novanamati vange vavali. Kanda li ndi shii kutya nandi ninge shike, onda li ashike handi ilikana opo tu kwafelwe, na Jehova okwa li a nyamukula okupitila mehangano laye. Paife ohatu di meumbo la tungikika. Onda tokola toko okuninga ngaashi handi dulu, opo ndi ulikile Jehova olupandu.”

 Ovakwanepangelo ova li va didilika mo eenghendabala detu dokuyandja oikwafa. Omuwiliki wo-city hall yaL’Asile okwa ti: “Ohandi mu pandula neenghono, molwaashi omwa li mwa kwafela meendelelo. Ohandi mu pandula yo molwaashi omwa li mwa fimaneka ovakwanepangelo. Osha hafifa nge okumona kutya ihamu yandje elitulemo koimaliwa. Ndele omwa hala okukwafela ovanhu. Ohamu linyengifwa kohole.”

 Mo 24 Januali 2022, Mozambique okwa li a hangika koshikungulu shinene, Ana, osho sha li sha enda sha yuka kouninginino moMalawi. Oshikungulu osha li sha etelela odula inene nosho yo omhepo yakula oyo ya li i na onhapo yeekilometa 100 movili. Osha li sha teyaula eepala dolusheno, sha kungulula po eenhopa nosha eta efundja linene.

 Oshikungulu osha kuma Eendombwedi di dulife po 30 000 moMalawi nosho yo moMozambique. Omumwatate Charles, oo ha yambidida oilonga yokuyandja oikwafa, okwa ti: “Eshi nda mona ovamwatate tava mono oixuna neenghono nokutala kwaashishe osho va kanifa, onda li nda nyika oluhodi nokanda li ndi wete nghee handi dulu oku va kwafela.” Onghalo oya li ya naipala neenghono, molwaashi oikulya yavo nosho yo oikunomwa oya li ya kungululwa po. Vahapu ova kanifa omaumbo avo. Shinyikifa oluhodi, omumwatate umwe okwa filwa omukulukadi waye nosho yo ovanakadona vavo vavali, eshi okambautu kavo oko ka li take va kwafele ke va pima mo.

 Oshikungulu osha li shitilifa neenghono. Po 1 yokeengulasha moNchalo, Malawi, oukwaneumbo waSengeredo owa li wa uda ewi lomeva eshi taa kunguluka. Omilonga mbali oda da li di yadi omeva! Omumwatate Sengeredo okwa li a tokola kutya ove na okudja mo meumbo. Okwa li a ninga etokolo li li pandunge, molwaashi eumbo lavo ola ka kungululwa po komeva efundja. Oinima yavo imwe oya li ya nyonauka ofimbo ikwao ya kungululwa po. Oukwaneumbo oo owa li wa tokola u ye kOlupale lOuhamba, opo pa li hapa endwa eeminute 30. Ashike oshikando eshi ova enda po eevili mbali. Nonande ova li va fika ve li meameno, ova li va tuta nova loloka.

 Oshitaimbelewa shaMalawi nosho yo Mozambique, oya hovela okuyandja oikwafa diva. Oya lombwela ovapashukilishikandjo novakulunhuongalo va tale kutya ovamwatate ovo va kumwa ova pumbwa shike nove va kwafele pamhepo nopamaliudo. Eekomitiye dOkuunganeka Oikwafa oda li da nangekwa po, opo di kwatele komesho oilonga yokuyandja oikwafa, eekomitiye odo oda li da hovela diva okukwafela ovamwatate va mone oikulya nosho yo oipumbiwa imwe vali. Oimaliwa i dule N$ 491 384 oya li ya longifwa okukwafela ovanhu, noimaliwa i dule po N$ 5127000 oya longifwa okuwapekulula nosho yo okutungulula omaumbo.

 Okomitiye yOkuunganeka Oikwafa oya li ya longifa nawa oimaliwa, naasho osha li sha fimana molwaashi eendado oda li da ya pombada. Pashihopaenenwa, meemwedi ashike heyali dopehovelo dokuyandja oikwafa, ondado youfila wepungu, oo hau longifwa kuvahapu moMalawi, oya ya pombada neenghono neepelesenda 70. Ondado yomahooli nayo oya li ya londa. Opo ku longifwe nawa oshimaliwa, ovamwatate ova li va landa oikulya noitungifo i li momuvalu uhapu poshikando, meefitola domoshitukulwa. Onghee ova li va kufilwa ko kondado noina va longifa oimaliwa ihapu shi na sha noyeendifo.

 Oilonga yokuyandja oikwafa oya kuma omitima doshiwana shaJehova. Felisberto, omumwatate wokoMozambique, okwa ti: “Inandi mona nande onale ehangano la yandja oinima ihapu ngaashi: oitungifo, oyeendifo, ovatungi, oikulya nosho yo ewiliko lopahole. Oilonga ei yokuyandja oikwafa, oi li naanaa oshihopaenenwa sha denga mbada shohole youmwainafana oyo Jesus a popya muJohannes 13:34, 35.” Ester, omufiyekadi moMalawi, oo eumbo laye la li la hanauka po, okwa ti: “Onda li nda teka omukumo, molwaashi kanda li ndi na oimaliwa ya wana okutunga eumbo limwe. Onghee eshi ovamwatate ve uya okutungila nge eumbo, onda li ashike ndi udite nda fa ndi li mOparadisa.”

 Eshi tu li popepi nounyuni mupe oo wa udanekwa, otwa teelela okumona oiponga tai hapupala. (Mateus 24:7, 8) Ashike nande ongaho, kekwafo lomayambidido eni ehalo liwa, otu na elineekelo kutya oshiwana shaJehova otashi ka mona oikwafa oyo sha pumbwa. Eenghedi dokuyandja omayambidido oda yelifwa nawa ko donate.pr418.com. Ohatu mu pandula neenghono omolwokuyandja kweni kwehalo liwa.