MuMarsa 2020, eshi Ehangano lOukalinawa mOunyuni la shiivifa kutya o-COVID-19 oi li omukifi wekomba, ovanhu vahapu kava li ve shii ngeenge omukifi ou otau ka kuma ounyuni aushe oule wefimbo li dulife podula. Ovanhu omamiliyona, mwa kwatelwa Eendombwedi daJehova, ova kumwa koilanduliko yomukifi wekomba palutu, pamadiladilo nopamaxupilo. Eendombwedi daJehova oda unganeka ngahelipi ekwafo pefimbo eli?

 Eekomitiye dOkuunganeka Oikwafa di dulife 950 oda li da totwa mounyuni aushe, koshi yewiliko lOkomitiye yOkuunganeka yOlutuwiliki lEendombwedi daJehova, omolwomukifi wekomba, o-COVID-19. Peemhito dimwe, oda unganeka opo ku yandjwe oikwafa kwaavo vomoshitukulwa, nopeemhito dimwe, Eendombwedi oda mona oikwafa okudja kepangelo. Eekomitiye dOkuunganeka Oikwafa oda unganeka yo opo ku yandjwe oikwafa kuvahapu.

 Pashihopaenenwa, diladila konghalo oyo i li muParaguay. Oshifokundaneki shimwe osha shanga tashi ti, “Ovaparaguay vahapu otava file ondjala momaumbo avo” omolwouxupilo oo wa kumwa komukifi wekomba. Ashike Okomitiye yOkuunganeka Oikwafa muParaguay oya hangika nale ya hovela okuyandja eeshako di na oikwafa oyo ya wana oivike ivali. Meeshako omo omu na oikulya ya wana, oinima yokuwapaleka noikwanoipangifo yokukaleka po oundjolowele ya wana ovaneumbo vane. Oshako keshe oi na ongushu yeedola daNamibia 413.10.

 Ongahelipi ovaliyambi have liamene nosho yo vamwe komukifi wekomba wo-COVID-19? Ohava djala oumask nohava kala ve li li kokule. Ohava shilipaleke yo kutya eefitola oko hava lande oikulya ohadi i longekidile meenhele da yela nohadi liufa keemhango di na sha nokuliamena. Osho osha kwatela mo okushilipaleka kutya ovo tava ungaunga neeshako odo ova djala oinima yokuliamena, ova wapaleka nawa oihauto yavo nokupungula eeshako odo peenhele da wapalekwa nawa. Nohauxuuninwa, ovo tava twala eeshako ohava kaleke po oshinano pokati kavo novamwatate ovo tava pewa di pewa.

 Okudja muJanuali 2021, Okomitiye yOkuunganeka oya li ya dimina ku longifwe eedola daNamibia di dulife 344 250 000 mokuyandja oikwafa ya pamba o-COVID-19. Oitaimbelewa nEekomitiye dOkuunganeka Oikwafa ohava longifa omayambidido oo noukeka nohava longo noudiinini opo va dule okulanda oipumbiwa kondado i li xwepo. Pashihopaenenwa muChile, ovamwatate ovo hava unganeke oilonga yokuyandja oikwafa ova li va hala okulanda eekilograma 750 domakunde. Ashike ondado yomakunde oya li ya hapupala luvali moule ashike womwedi! Konima yeevili mbali eshi va dimina kutya otava ka landa omakunde oo kondado yopombada, omulandifi okwa li e va shiivifila kutya umwe oo a li a landa omakunde okwe a alula. Onghee ponhele yokulandifa omakunde oo kondilo, omulandifi okwe e va landifa ashike kondado yomwedi wa tetekela.

 Ndele nande ongaho, eshi ovamwatate va ya va ka tale ko omakunde oo, omulandifi ka li vali a hala oku a landifa kombilixa, nokwe va lundila kutya otava andjakaneke oikulya shihe li pandjele, ngaashi omahangano amwe. Konima eshi va ilikana pauxupi, umwe womovamwatate okwa ya komulandifi ndele te mu yelifile kutya eongalo keshe ola ninga omapekapeko kutya oolyelye naanaa ve li momhumbwe. Ovamwatate ova yelifa yo kutya molwaashi omaputuko aavo tava pewa oikwafa okwa yoolokafana, oshako keshe ohaka kala i na oinima ya yoolokafana she likolelela keemhumbwe dovaneumbo. Ova yelifila yo omulandifi kutya omayambidido aeshe opashimaliwa, ile oilonga oyo hai longwa kEendombwedi daJehova ohai ningwa nehalo liwa. Omulandifi okwa li a kumwa. Okwa li a dimina okushunifa pedu ondado yaye nokwa pa ovamwatate omayambidido omakunde efike peekilograma 400.

 Lusu, omufiyekadi omunamido wokoLiberia, oha di pamwe novakwanedimo vaye vatano. Ongula imwe, ofimbo tava li oshuumbululwa notava lesha omushangwa wefiku, okatekulu kaye, oko ke na eedula heyali, oka didilika kutya meumbo ka mu na vali oikulya. Oke mu pula taka ti: “Ohatu ka lya shike?” Opo nee Lusu okwe ka shilipaleka kutya okwa pula nale ekwafo kuJehova, noku na elineekelo kutya ote ke va kwafela. Omutenya oo tuu oo, Lusu okwa dengelwa kovakulunhuongalo opo a ka tambule oikulya. Okwa ti: “Okatekulu kange oka ti paife oke shii kutya Jehova oha udu noha nyamukula omailikano, molwaashi okwa nyamukula lange.”

 Omukainhu umwe wokoDemocratic Republic of Congo, oku li oushiinda noukwaneumbo umwe oo u li Eendombwedi daJehova. Eshi a mona oukwaneumbo oo tau pewa oikulya kovaitaveli vakwao, okwa ti: “Konima yomukifi wekomba, ohatu ka ninga Eendombwedi daJehova molwaashi ova fila oshisho ovamwaxe pefimbo eli lidjuu neenghono.” Omushamane waye okwe mu pula ta ti: “Oto ka ninga umwe womEendombwedi daJehova molwoshako yolwishi?” Okwe mu nyamukula ta ti: “Ahowe, ashike oshako oyo oi li oumbangi wohole yashili.”

 Otwa dula okukwafela neendelelo ovamwatate novamwameme ovo ve li momhumbwe omolwomayambidido eni ehalo liwa. Ohatu mu pandula unene omolwomayambidido oo hamu yandje okupitila meenghedi odo tadi hangwa ko donate.pr418.com.