Jehova oku hole okuhonga oshiwana shaye. Omolwetomheno olo, ehangano laye ola tota po eefikola da yoolokafana dokudeula ovanafikola, opo va dule okuwanifa po oinakuwanifwa yavo. Imwe yomeefikola odo, Ofikola yOvaudifi vOuhamba (SKE). Eedula opo da di ko, ehangano laKalunga inali yandja ashike elitulemo keenghedi omo eetundi ha di hongwa, ndele nokomatungo yoo omo hamu hongelwa eefikola dopauteokratika. Elalakano oku shi ningifa shipu kovahongi va honge, nOvanafikola ve lihonge va manguluka. Ongahelipi omayambidido eni tae tu kwafele tu hange elalakano olo?

 Eefikola dopauteokratika oda kala hadi ningilwa mOmalupale Ouhamba nosho yo mOmalupale Oyoongalele, oule weedula dihapu. Omolwashike twa tunga, ile twa wapekulula omatungo mahapu, oo paife taa longifwa ashike okuhongela eefikola dopauteokratika? Natu ka taleni komatomheno atatu.

 Omhumbwe inene. Omumwatate Christopher Mavor, Omukwafeli wOkomitiye yOilonga yOlutuwiliki, okwa ti: “Oitaimbelewa oya ti ope na omhumbwe inene moukalele. Pashihopaenenwa, mo 2019, oshitaimbelewa shaBrazil osha li sha tengeneka kutya osha pumbwa ovanafikola ve fike lwopo 7,600 va wedwa po, va dja kOfikola yOvaudifi vOuhamba (SKE), opo va wanife po omhumbwe yomoshitukulwa shavo.” Oshitaimbelewa shaUnited States osha lopota omhumbwe inene yovakokolindjila va pyokoka, ovo tava dulu okudeula vamwe va yandje oundombwedi monghedi ye likalekelwa meenhele daaveshe, va udifile pomatuliloshikepa nova udifile meedolongo. Opa pumbiwa yo ovamwatate va ka longe kOshikondo shOkuduta nOkutunga nosho yo mEekomitiye dOkukwatafana nOipangelo. Ovanafikola ovo va dja kOfikola yOvaudifi vOuhamba (SKE) otava dulu okuwanifa po eemhumbwe odo.

 Omuvalu munene wovanafikola. Oitaimbelewa ihapu oya yakula omaindilo ovanafikola vahapu e dulife pwaao ya li hai yakula nale. Pashihopaenenwa, moBrazil, oshitaimbelewa osha yakula omaindilo ovanafikola efike po 2,500, momudo ashike umwe. Ndele molwaashi kape na eenhele da wana dokuhongela, oshitaimbelewa osha li ashike sha dula okutambula ovanafikola ve li 950.

 Eenhele dokukala tadi wapalele. Ngeenge eetundi tadi ningilwa mOlupale lOuhamba, ile mOlupale lOyoongalele, luhapu ovanafikola ohava di momaumbo ovamwatate novamwameme vomoshitukulwa. Elongekido olo otali longo ashike moitukulwa omo hamu ningilwa eetundi dinini omudo keshe. Ashike moitukulwa omo hamu ningilwa eetundi luhapu, ovamwatate vomoshitukulwa itava dulu okuyandja onhele yokukala kovanafikola oule weemwedi donhumba. Onghee hano, opa tungwa eenhele dokukala di li popepi nofikola, da nuninwa ashike ovanafikola.

 Onhele ina ashike ongulu imwe yokuhongela, eumbo lovahongi, eenduda dovanafikola 30 nosho yo eenduda doipumbiwa yakeshe efiku, otai dulu okukosha eemiliyona daAmerica donhumba, she likolelela konhele opo i li nosho yo oinima ikwao.

 Luhapu eefikola ohadi tungwa kondje yoshilando ponhele ya mwena, ashike opopepi noyeendifo yaaveshe. Oha pa hoololwa onhele opo pe na ovaudifi vahapu, ovo tava dulu okukwafela mokukaleka omatungo noilongifo monghalo iwa.

 Meefikola oha mu kala mu na eengulumambo, eenhele dokulihongela, eekombiyuta, eepilinda noilongifo ikwao. Luhapu ohamu kala mu na onduda yokulila, omo ovanafikola novahongi tava dulu okulila pamwe. Omu na yo onhele yokuningila omalideulo nosho yo omalihafifo.

 Ongulu yokuhongela ohai dutwa noukeka. Troy, oo ha longo pamwe nOshikondo shOkuduta nOkutunga mOunyuni aushe koWarwick, New York, okwa ti: “Otwa kwatafana nOshikondo shEefikola dOpauteokratika shi tu kwafele okuduta eengulu dokuhongela, omo ovanafikola tava dulu okulihonga va manguluka. Ovamwatate ovo ove tu pa omalombwelo e na sha nounene nosho yo omufolomo weengulu dokuhongela, oludi lomalamba, oikwa noipangifo yomawi nouvidio.” Zoltán, omuhongi woSKE moHungary, okwa ti: “Pehovelo, ka twa li tu na omambako, onghee otwa li alushe hatu dimbulukifa Ovanafikola va popye mokule. Ashike paife oupyakadi oo owa pongololwa po, molwaashi keshe poshitaafula ope na embako.”

 Omalunduluko oo a ningwa po e na sha neefikola, okwa etela ngahelipi ovahongi novanafikola ouwa? Angela, oo a li ko-SKE moPalm Coast, Florida, U.S.A, okwa ti: “Ofikola oyo oili onhele iwa yokulihongela. Oinima aishe oya longekidwa nawa mwa kwatelwa eengulu dokuhongela neenduda detu dokunangala, opo tu yandje elitulemo keetundi.” Csaba, omuhongi wo-SKE moHungary, okwa pandula elongekido lokulya pamwe nOvanafikola. Okwa popya kutya peemhito da tya ngaho, “luhapu ovanafikola ohave tu lombwele oimoniwa yavo. Monghedi ya tya ngaho, ohashi tu kwafele tu shiive nawa ovanafikola. Oshidjemo, ohatu dulu oku va kwafela noupu she likolelela keemhumbwe davo.”

 Ovanafikola nosho yo ovahongi ova tala ko omalunduluko, oo a ningwa po e na sha neefikola e li enangeko noupuna la dja ‘kOmuhongi wetu Munenenene,’ Jehova. (Jesaja 30:20, 21) Omumwameme wokoPhilippines, oo a li ko-SKE, oyo ya li ya ningilwa momatungo oo opo a wapekululwa, okwa ti: “Omudingonoko wofikola owe tu dimbulukifa kutya katu li ashike ovanafikola vongaho, ndele otu li ovapiya vaJehova ve likalekelwa. Jehova okwa hala tu kale twa hafa, eshi hatu konakona Eendjovo daye moule.”

 Omolwomayambidido eni, oo mahapu haa yandjwa okupitila ko-donate.pr418.com, ohatu dulu okutunga, okuwapekulula nokukaleka omatungo eefikola monghalo iwa. Ohatu mu pandula unene, eshi hamu yandje nehalo liwa.