Eendombwedi daJehova ohadi longo oilonga ya fimana opo di kwafele ovanhu moilongo i dulife 200. Ndele nande ongaho, oilongo ashike 35 hai mono omayambidido a wana opo i dule okufuta eefuto dayo. Ongahelipi eefuto moilongo oyo ihai dulu okulifutila hadi futwa?

 Olutuwiliki lEendombwedi daJehova ohali tale osho Eendombwedi da pumbwa mounyuni aushe, opo di dule okulongela Jehova nokuudifa onghundana iwa. Omayambidido ohaa unganekwa kutya otaa ka longifwa ngahelipi nokulongifwa nawa. Ngeenge oshitaimbelewa sha mono omayambidido mahapu opo shi file oshisho oilonga yasho, oimaliwa oyo ya xupa po ohai shi tumine koitukulwa oyo i na omhumbwe. Ohava shikula oshihopaenenwa shOvakriste vonale mokukwafela vamwe opo pa kale “efaafano.” (2 Ovakorinto 8:14) Ohava longifa omayambidido oo a xupa po, opo va kwafele Ovakriste ovo ve na shinini.

 Ovamwatate ovo hava mono omayambidido oo a xupa po koitaimbelewa ohava kala ve udite ongahelipi? Pashihopaenenwa, muTanzania omu na etata lovakalimo ovo hava xupu keedola daNamibia 30 lwaapo, ile dinini efiku keshe, omayambidido a tya ngaho okwa li a longifwa okuwapekulula Olupale lOuhamba laMafinga. Eongalo ola shanga la ti: “Eshi Olupale la wapekululwa, omuvalu waavo hava ongala owa hapupala neenghono! Otwa pandula neenghono ehangano laJehova nosho yo oumwainafana wovamwatate mounyuni aushe komayambidido avo, oo eshi ningifa tashi shiiva opo tu hafele okulongela Kalunga monhele ei iwa.”

 Ovamwatate vamwe moSri Lanka kave na oikulya ya wana omolwomukifi wekomba wo-COVID-19. Imara Fernando nosho yo okamonamati kaye, Enosh, ovamwe vomuvo. Omolwomayambidido oo a dja koitukulwa imwe, ova li va mona oikwafa oyo va li va pumbwa. Ova shanga mokakalata kavo oko va ninga voovene, va ti: “Otwa pandula ovamwatate ovo ve tu ulikila ohole pefimbo eli lidjuu. Otwa hafa eshi tu li oshitukulwa shoukwaneumbo ou, nohatu ilikana Jehova a kwafele ovamwatate aveshe momafiku aa axuuninwa.”

 Kashi na nee mbudi kutya ovamwatate novamwameme ohava di peni, ohava linyengifwa va tukulilafane osho ve na. Pashihopaenenwa, Enosh okwe liningila okapakete komayambidido opo a dule okuyambidida omaukwaneumbo oo e li momhumbwe. Guadalupe Álvarez naye oku na ehalo liwa lokuyandja. Oha di moshitukulwa shaMexico oko hava mono ondjabi inini, ile ihava mono sha nandenande. Ashike oha yandje osho e na po. Okwa shanga a ti: “Onda pandula Jehova omolwouwa nohole yaye i na oudiinini. Ondi shii kutya omayambidido ange otaa ka wedwa komayambidido avamwe nokulongifwa okukwafela ovamwatate ovo ve na momhumbwe.”

 Oitaimbelewa oyo hai tumu omayambidido keenhele oko ku na omhumbwe ohai kala ya hafa. Anthony Carvalho, oshilyo shOkomitiye yOshitaimbelewa shaBrazil, okwa ti: “Oule womido dihapu, oilonga moshilongo shetu oya kala ya pumbwa okuyambididwa pashimaliwa koilongo imwe. Omolwomayambidido oo, otwa mona ekulo linene. Paife, nafye otu na oufembanghenda wokukwafela vamwe pashimaliwa. Ovamwatate moBrazil ohava tale koilonga yokuudifa mounyuni aushe, nokutala osho tava dulu okuninga po opo va kwafele.”

 Eendombwedi daJehova otadi dulu ngahelipi okuyambidida ovamwatate novamwameme ovo ve na omhumbwe ngaashi tadi dulu? Inadi pumbwa okutuma oimaliwa odikilila koitaimbelewa oyo i li koilongo imwe, ndele okuyambidida koilonga yomounyuni aushe. Osho otava dulu oku shi ninga momaongalo avo mokutula omayambidido avo mokakefa komayambidido oko ka shangwa “Oilonga yomounyuni aushe,” ile okupitila kointaneta ko donate.pr418.com. Omayambidido aeshe a tya ngaho otaa pandulwa neenghono.