Okwa tengenekwa kutya ovanhu omamiliyona atano otava ka tala Ekopi lOunyuni lOkatanga kokeemhadi olo tai ka hovela 20 Novemba fiyo 18 Desemba  2022. Vahapu ove udite kutya oiningwanima ya tya ngaho yomaudano otai dulu okupondola shihapu shi dulife ashike okuhanganifa ovanhu.

•   Nelson Mandela, omupresidende wonale waSouth Afrika, okwa ti: “Omaudano otaa dulu okulundulula ounyuni. Oku na eenghono doku u nwefa mo. Oku na eenghono dokuhanganifa ovanhu monghedi ye likalekelwa.”

•   Omupresidende wo-FIFA, a Gianni Infantino, okwa ti: “Etanga lokeemhadi . . . ohali hanganifa ovanhu, opo va kale ve na eteelelo, va kale va hafa, ve na ohole nosho yo oukumwe.”

 Mbela Ekopi lOunyuni lOkatanga kokeemhadi, ile oiningwanima yomaudano otai dulu ngoo okuhanga omalalakano a tya ngaho? Mbela otapa ka kala ngoo ovanhu va hangana nosho yo ombili?

 Ekopi lOunyuni lOkatanga kokeemhadi lomudo ou inali kwatela mo ashike etanga lokeemhadi, ndele ola kwatela mo shihapu. Omaudano oo okwa ningifa ovanhu kointaneta va kale tava tu eemhata di na sha noinima yopapolitika, mwa kwatelwa oufemba womunhu, oukwamuhoko nosho yo ouxupilo uhe fike pamwe.

 Nokuli nande ongaho, vahapu ohave lipula kutya omaudano oo haa danwa mounyuni aushe, ngaashi Ekopi lOunyuni lOkatanga kokeemhadi, olo ashike hali eta omalihafifo ashili. Nonande ovanhu ova hala omaudano a tya ngaho, oiningwanima ya tya ngaho kai na efiku i hanganife ovanhu fiyo alushe. Ponhele yaasho, oikala ya tya ngaho otai ulike kutya otu li “momafiku axuuninwa,” ngaashi Ombiibeli ya popya. — 2 Timoteus 3:1-5.

 MOmbiibeli omu na eteelelo lashili li na sha noukumwe oo tau ka kala mounyuni aushe. Oya udaneka kutya ovanhu kombada yedu otava ka kala va hangana koshi yepangelo lomeulu, olo hali ifanwa ‘Ouhamba waKalunga.’ — Lukas 4:43; Mateus 6:10.

 Ombiibeli oya ti: Jesus Kristus, oo e li Ohamba yOuhamba oo, ota ka shilipaleka kutya mounyuni aushe omu na ombili.

•   “Momafiku ayo omuyuki ta kala a temuna, nombili oi yadi mo.” — Epsalme 72:7.

•   “Osheshi otai ka xupifa epongo eli tali kuu onghuwo li kwafwe . . . Ndele tai di kulile momafininiko nomomalwifo.” — Epsalme 72:12, 14

 Nokuli nokunena, omahongo aJesus okwa hanganifa ovanhu omamiliyona moilongo 239. Ove lihonga okuhakala ve na outondwe. Opo u lihonge shihapu, lesha oitukulwa ya pambafana i na oshipalanyole “Nghee hatu dulu okweefa po outondwe .”