Momukokomoko womudo 2022, omapangelo mounyuni aushe okwa longifa oshimaliwa shi dulife peedola daNamibia eetriliyona 44 momatangakwaita ao, shi dulife nale, molwaashi Russia a ponokela Ukraine. She likolelela kolaporta yehangano lo-International Peace Research Institute, oyo ya pitifwa muAprili 2023, momukokomoko womudo 2022:

•    Eepelesenda doshimaliwa odo da longifwa ketangakwaita laEuropa “oda londa neepelesenda 13 momudo oo, naasho osha li oshimaliwa shihapu sha longifwa kepangelo laEuropa, okudja pexulilo loita inyanyalifi oyo ya li ko mo 1991.”

•    “Russia…okwa longifa oshimaliwa osho sha londa neepelesenda 9,2 lwaapo; nokwa dja poutine a ya poutitatu mokulongifa oshimaliwa shihapu mounyuni.”

•    United States oye e li potete mokulongifa oshimaliwa shihapu metangakwaita laye, “a longifa eepelesenda 39.”

 Omundokotola Nan Tian, oo a kwafela mokushanga olaporta yehangano lo-International Peace Research Institute, okwa ti: “Okutala kunghee omapangelo taa twikile okulongifa oshimaliwa shihapu momatangakwaita ao, otashi ulike lela kutya otu li mounyuni oo uhe shii kutya owa yuka peni.”

 Ombiibeli oya xunganeka kutya omapangelo omanaenghono otaa ka kala ihaa tu a fife, noye tu lombwela kutya oshike tashi dulu oku tu etela ombili yashili.

•    Ombiibeli oya ti otu li ‘pomafimbo axuuninwa.’ — Daniel 8:19.

•    Embo laDaniel ola xunganeka kutya pefimbo olo, omapangelo omanaenghono omounyuni otaa ka ninga omafiyafanepo. Omapangelo oo omanaenghono otaa ka “lwa” nokukondjifafana, opo va ulike kutya vo ovanaenghono. Okukondja kwavo otaku ka kwatela mo okulongifa “omamona,” ile oimaliwa ihapu. — Daniel 11:40, 42, 43.

 Opo u lihonge shihapu kombinga yexunganeko olo likumwifi, tala okavidio Exunganeko olo la wanifwa po — Daniel etukulwa 11.

•    Ombiibeli oya ti kutya Kalunga ota ka pingena po omapangelo opanhu. “Ota ka dika ouhamba itau ka teka po fiyo alushe, nepangelo lao itali ka yandjwa koshiwana shimwe. Ndele wo otau ka nyanyaula notau ka teyaula omauhamba aeshe noku a xulifa po, ndelenee woovene tau ka kala fiyo alushe.” — Daniel 2:44.

•    Mafiku, Jehova a Kalunga ote ke tu etela ombili yashili notai kalelele, osho ovanhu va nyengwa okuninga. Ngahelipi mbela? Ouhamba waye womeulu otau ka hanauna po oilwifo aishe nokuxulifa po elongifo leenghono. — Epsalme 46:8, 9.

 Opo u lihonge shihapu kombinga yaasho Ouhamba waKalunga tau ka wanifa po, lesha oshitukulwa “Under God’s Kingdom ‘Peace Will Abound.’”