Osoondaxa shomafiku 20 Novemba 2022, omo omutumba wo COP27 United Nations Climate Change Conference wa xula. Nonande ovawiliki novanawino, ovo va li komutumba oo, ova dimina okuyandja oimaliwa koilongo oyo ya hepa, opo i dule okuungaunga noupyakadi oo hau etifwa kokulunduluka kwonghalo yomhepo, vahapu ova dimina kutya osho kashi fi ekandulepo lomukundu.

•   António Guterres, hamushangandjai wOiwana ya Hangana, okwa popya momafiku 19 Novemba 2022 a ti: “Opulaneta yetu oi li monghuwo i na onghambe . . . Nediladilo lokuyandja oimaliwa kali fi ekandulepo lomukundu.”

•   Mary Robinson, oo a li nale omupresidende waIreland, nokwa li omukulunhu woufemba womunhu wOiwana ya Hangana, okwa popya mo 20 Novemba 2022 a ti. “Ounyuni ou li pokati koshilaleko nomukonda, ngeenge tashi uya ponghalo yomhepo.”

 Ovanyasha otave lipula unene kombinga yonakwiiwa. Mbela oiwana otai dulu ngoo okulimanga oukuni kumwe nokuwanifa po eudaneko layo li na sha nokukandula po oupyakadi oo tau etifwa konghalo yomhepo? Ombiibeli otai ti ngahelipi?

 Ombiibeli oya ulika kutya nonande oiwana oi longe noudiinini nokuninga eenghendabala, opo i kandule po oupyakadi oo tau etifwa konghalo yomhepo, otai ka xulila kekwena la fita. Tala omatomheno avali u mone kutya omolwashike:

•   “Osho sha endama, itashi yukifwa.” — Omuudifi 1:15.

   Sha hala kutya: Omapangelo otaa nyengwa, molwaashi ovanhu inava shitwa ve lipangele vo vene. (Jeremia 10:23) Nonande oiwana oi limange oukuni kumwe, itai dulu okukandula po omaupyakadi oo e li mounyuni, nonande oi kendabale shi fike peni.

•   “Osheshi ovanhu otava ka kala ve lihole vo vene, ovanalwisho voimaliwa, . . . vehe na elongelokumwe.” — 2 Timoteus 3:2, 3.

   Sha hala kutya: Ombiibeli oya ulika sha yela kutya ovanhu vahapu pefimbo letu otava kala ve lihole vo vene, noitava ka hala va longele kumwe navakwao, opo pe uye oidjemo iwa.

 Onakwiiwa i na sha nopulaneta yetu inai likolelela komaudaneko omapangelo opanhu. Kalunga okwa hoolola Omupangeli wounyuni a denga mbada, Jesus Kristus. Ombiibeli oya popya kombinga yaye ya ti:

•   “Epangelo oli li komapepe aye, ndele ta ifanwa: Omukumwifi Omupukululi, Kalunga Omunaenghono, Tate yaalushe, Ohamba yombili.” — Jesaja 9:6.

 Jesus oye Ohamba yOuhamba waKalunga, ile tu tyeyepangelo lomeulu. (Mateus 6:10) Oku na eenghono, ounongo nehalo lokufila oshisho opulaneta yetu novanhu ovo tava ka kala ko. (Epsalme 72:12, 16) Koshi yewiliko laye, epangelo lomeulu otali ka ya moshipala aveshe ovo “tava nyono edu” nokwaalulila opulaneta yetu monghalo iwa. — Ehololo 11:18; Jesaja 35:1, 7.

 Opo u mone ouyelele muhapu u na sha nokukandula po oupyakadi oo tau etifwa kokulunduluka kwonghalo yomhepo, lesha oshitukulwa “Okulunduluka kwonghalo yomhepo nosho yo onakwiiwa yetu — Osho Ombiibeli tai ti.”