Eenghundana otadi popi unene kombinga yovanhu ovo hava popi oinima ii, ile ve hole elongifo leenghono omolwokatongo, yovanhu ovo tava ponokele vakwao, molwaashi ashike vomuhoko umwe u lili nosho yo kombinga yoita.

•   O-The New York Times yo 15 Novemba 2023 oya ti: “Kunena, komalungula oku na eendjovo dihapu doutondwe shi dulife nale omolwomakuyunguto oo e li pokati kaIsrael naGaza nomolwovanhu ovo hava xumifa komesho elongifo leenghono noutondwe.”

•   Mo 3 Novemba 2023, Dennis Francis, omupresidende womutumba wOiwana ya Hangana okwa popya a ti: “Okudja mo 7 Oktoba, opa kala eendjovo dihapu doutondwe nosho yo elongifo leenghono shi dulife nale, naasho osha etifwa kokatongo.”

 Eendjovo doutondwe, elongifo leenghono nosho yo oita oinima ya dja nale. Oushili oyoo kutya Ombiibeli oya popya kombinga yavamwe kutya ‘eendjovo davo dilula otave di umbu ngaashi oikuti’ nosho yo yaavo hava xumifa komesho oita nelongifo leenghono. (Epsalme 64:3; 120:7; 140:1) Natango, Ombiibeli oya popya kutya outondwe oo u li ko kunena ou didilikwedi.

 Ombiibeli oya yandja omatomheno avali kutya omolwashike outondwe wa hapupala kunena.

1.  1. Oya xunganeka kombinga yefimbo olo ‘ohole yavahapu tai ka talala.’ (Mateus 24:12) Ponhele ovanhu va ulike ohole, ohava ulike omaukwatya oo taa xwaxwameke outondwe. — 2 Timoteus 3:1-5.

2.  2. Outondwe muhapu oo u li ko kunena owa etifwa po kenwefemo lii laSatana Ondiaboli. Ombiibeli oya ti: “Ounyuni aushe ou li mepangelo lomunawii.” — 1 Johannes 5:19; Ehololo 12:9, 12.

 Ombiibeli oya popya yo kutya Kalunga mafiku ota ka xulifa po oinima oyo hai etifa outondwe. Naasho sha fimanenena, ota ka kufa po ouyehame oo wa etifwa koutondwe. Ombiibeli oya udaneka ya ti:

•   Kalunga “ota ka feta po omahodi aeshe momesho avo, nefyo itali ka kala po vali, ile oluhodi, okulila nouyahame itau ka kala po vali. Oinima ikulu oya xula po.” — Ehololo 21:4.