Mo 9 Oktoba 2024, ehangano lo-World Wildlife Fund ola yandja olaporta tai limbilike i na sha nanghee oilonga yovanhu ya kuma oinamwenyo. Oya popya kutya “momukokomoko womido 50 da ya (1970-2020), omuvalu woinamwenyo owa shuna pedu neepelesenda 73.” Oya londwela kutya: “Ohatu dulu okupopya sha yukilila kutya osho tashi ka ningwa po momido nhano di li komesho otashi u fa nghee onghalamwenyo monakwiiwa tai ka kala kombada yedu.”

 Oshi shii okuudiwa ko kutya ovanhu vahapu ova kuminwa olaporta oyo. Otu hole eduumbo letu liwa nohashi tu udifa nai okutala oinamwenyo tai mono oixuna. Ohatu kala tu udite ngaho, molwaashi Kalunga okwe tu pa oshinakuwanifwa shokufila oshisho oinamwenyo. — Genesis 1:27, 28; Omayeletumbulo 12:10.

 Onghee otashi dulika u lipule kutya, ‘mbela ohatu dulu ngoo oku amena oinamwenyo oyo i li kombada yedu? Ombiibeli otai ti ngahelipi?’

 Kutya nee otu kendabale shi fike peni tu amene oinamwenyo, Kalunga oye ashike ta dulu okupa oinamwenyo eameno la shili. Ombiibeli oya popya mEhololo 11:18, kutya Kalunga ota ka ‘hanauna po ovo tava nyono edu.’ Ovelishe oyo otai tu hongo oinima ivali:

1.  1. Kalunga ota ka kelela ovanhu vaha hanaune po edu filufilu.

2.  2. Kalunga ota ka katuka onghatu mafiku. Otu shi shii ngahelipi? Ope na oupyakadi munene oo kutya ovanhu otava ka hanauna po neenghono oinamwenyo kombada yedu shi dulife nale.

 Kalunga ota ka ninga po shike, opo a kandule po oupyakadi oo? Ota ka longifa epangelo laye lomeulu, ile Ouhamba u pangele ombada yedu aishe. (Mateus 6:10) Epangelo olo otali ka pa ovanhu ovaduliki ehongo nosho yo edeulo olo va pumbwa, opo va file oshisho nova amene oinamwenyo oyo i li kombada yedu. — Jesaja 11:9.