Onghalo yomhepo oyo ya pupyala nai, oyo ya lopotwa koilongo mounyuni aushe muJuli 2022:

•   O-CNN Wire Service yo 25 Juli 2022 oya ti: “China okwa lopota oupyu wa londa pombada neenghono adishe oshikando oshitivali moilando 70 lwaapo omwedi ou.”

•   O-The Guardian yo 17 Juli 2022 oya ti: “Omapeya oo e lihanena muEuropa ashishe okwa etifwa koupyu itau nuwa omeva.”

•   O-The New York Times yo 24 Juli 2022 oya ti: “Oilando ihapu yomoUnited States oya li ya pupyala nai mOsoondaxa. Oupyu oo owa dilila koushilofuta, tau kwata oshitukulwa shokolukadi fiyo okouninginino.”

 Mbela oinima oyo otai ti shike? Mbela mokweendela ko kwefimbo kombada yedu otaku ka kala ngoo ku na oinima i na omwenyo? Ombiibeli otai ti ngahelipi?

 Heeno. Onghalo yomhepo oyo ya pupyala nai mounyuni aushe otai wanifa po osho Ombiibeli ya xunganeka shi na sha nefimbo letu. Pashihopaenenwa, Jesus okwa xunganeka kutya ohatu ka mona “omamoniko matilifi,” ile “omadidiliko manene.” (Lukas 21:11) Eshi onghalo yomhepo oyo ya pupyala nai tai ende tai hapupala, vahapu ova tila kutya ovanhu otava ka nyona edu noitaku ka kala vali oinima i na omwenyo.

 Ahowe. Kalunga okwa shita edu, opo ku kale ovanhu fiyo alushe. (Epsalme 115:16; Omuudifi 1:4) Ponhele a efe ovanhu ve li hanaune po, ota ka hanauna po ashike “ovo tava nyono edu,” ngaashi a udaneka. — Ehololo 11:18.

 Tala omaudaneko avali e na sha naasho Kalunga ta ka ningila edu:

•   “Ombuwa nomalondo otaa ka hafa, nofuka tai ka nyakukwa pombada, otai liwapaleke ngaashi onhemo yedo.” (Jesaja 35:1) Kalunga ita efa edu li kale ombuwa, ndele ota ka wapekulula ombinga yedu oyo ya nyonaunwa.

•   “Ove wa yavelela edu, to li tutike, ndele oto li ningi la punapala unene.” (Epsalme 65:9) Kalunga ota ka ninga edu oparadisa, naasho otashi ka kala enangekonoupuna.

 Opo u lihonge shihapu shi na sha nanghee onghalo yomhepo tai wanifa po omaxunganeko Ombiibeli, lesha oshitukulwa “Okulunduluka kwonghalo yomhepo nosho yo onakwiiwa yetu — Osho Ombiibeli tai ti.”

 Opo u lihonge shihapu shi na sha nanghee Kalunga ta ka wapekulula omudingonoko wedu, tala oshitukulwa “Who Will Save the Earth?”