Mounyuni aushe, ovanhu vahapu otave lididimikile omafundja oo a longa oushada. Natu tale keelaporta tadi shikula:

•   Eenghundana do AP, 2 Auguste 2023 oda ti: “Oshilandopangelo shaChina osha li sha hangwa kodula inene yoshiyelekifo sheemilimeta . . . 744,8, oyo inai monika mo nande onale oule womido 140 da pita, oyo ya li ya loka okudja Olomakaya fiyo Etitatu.”

•   Eenghundana do-Deutsche Welle, domo 3 Auguste 2023, oda ti: “Oshikungulu shodula nomhepo shedina Khanun osha li sha pimbila neenghono mEtine koitukulwa yokolukadi laJapan nosha twaalela eemwenyo dovanhu vavali lwaapo. . . . Oshikungulu osho osha teelelika shi ka talameke omeva oshiyelekifo sheemeta 0.6 moshitukulwa shokeendudu shaTaiwan.”

•   Eenghundana do BBC domo 24 Juli 2023 oda ti: “Odula inene oya li ya etifa efundja moshitukulwalongo shaNova Scotia, osho inashi monika mo nande onale moule womido 50 da pita moitukulwa yaCanada, oyo i li popepi nefuta.”

 Ombiibeli otai ti ngahelipi kombinga yoiningwanima ya tya ngaho?

 Otu li pefimbo olo Ombiibeli ya popya kutya “omafiku axuuninwa.” (2 Timoteus 3:1) Jesus okwa xunganeka kutya pefimbo opo, ohatu ka mona “omamoniko matilifi,” ile oiningwanima itilifi. (Lukas 21:11) Onghalo yomhepo oyo tai ende nokulunduluka oi li osheetifi shoikungulu inene oyo hai holoka po inatu shi teelela.

 Ombiibeli oya popya kutya oiningwanima ihapu itilifi, oyo tai ningwa kombada yedu otai dulu oku tu pa eteelelo. Omolwashike hatu tile ngaho? Jesus okwa ti: “Ngeenge omwa mono oinima oyo tai ningwa, shiiveni kutya Ouhamba waKalunga ou li popepi.” — Lukas 21:31; Mateus 24:3.

 Oiningwanima oyo tu wete tai ningwa otai ulike kutya mafiku Ouhamba waKalunga otau ka pangela oihovelitungifo yedu aishe, mwa kwatelwa edingonoko lomeva. — Job 36:27, 28; Epsalme 107:29.

 Opo u lihonge shihapu kombinga yanghee Ouhamba waKalunga tau ka xulifa po omaupyakadi aeshe kombada yedu, tala oshitukulwa “Who Will Save the Earth?”