Omudo keshe, ohapa holoka omakakamo edu omayovi omilongo. Kakele kaao manini, ope na amwe oo ha hanauna shinene, ha longo oushada nokweetifa efyo. Omafimbo amwe, omakakamo edu ohaa etelele oshikungulu shinene tashi di mefuta, nohashi twaalele eemwenyo dovanhu vahapu ovo ve li popepi nomudingonoko oo. Mbela Ombiibeli oya xunganeka kombinga yomakakamo edu manene?

Moshitukulwa eshi ohatu ka tala komapulo aa

•  Mbela Ombiibeli oya xunganeka kombinga yomakakamo edu?

•  Mbela omakakamo edu okunena otaa wanifa po exunganeko lOmbiibeli?

•  Exunganeko lOmbiibeli li na sha nomakakamo edu ole tu kuma ngahelipi?

•  Omitotolombo di na sha nexunganeko lOmbiibeli nosho yo omakakamo edu

 MOmbiibeli omu na omaxunganeko e na sha nomakakamo edu, oo a popiwa kuJesus. Eendjovo daye di na sha nomakakamo edu otadi hangwa momambo atatu Ombiibeli aa taa shikula:

 “Oiwana otai ka lwifafana, omauhamba otaa ka kondjifafana, notaku ka kala ondjala nomakakamo edu keembinga neembinga.” — Mateus 24:7.

 “Oiwana otai ka lwifafana, omauhamba otaa ka kondjifafana, notaku ka kala omakakamo edu keembinga neembinga nosho yo ondjala.” — Markus 13:8.

 “Otaku ka kala omakakamo edu manene, ondjala nomikifi dolutapo keembinga neembinga.” — Lukas 21:11.

 Jesus okwa xunganeka kutya otaku ka kala “omakakamo edu manene” “keembinga neembinga” pefimbo opo tapa ka kala oita, ondjala nosho yo omikifi dolutapo. Ngeenge oinima oyo tai ningilwa oshita, osha yela kutya otu li ‘momafiku axuuninwa ounyuni ou,’ ile “momafiku axuuninwa.” (Mateus 24:3; 2 Timoteus 3:1) Okutala kouyelele wa kanghamena kOmbibeli, oo twa konakona, ‘omafiku axuuninwa’ okwa hovela mo 1914, ashike inaa xula natango.

 Heeno. Omaxunganeko aJesus, mwa kwatelwa naao e na sha nomakakamo edu, otaa tu kumwe noiningwanima oyo tai ningwa pefimbo letu. Okudja mo 1914, opa ningwa omakakamo edu a didilikwedi e dulife 1 950, oo a twaalela eemwenyo dovanhu eemiliyona di dulife pumbali. a Natu ka taleni kwaame manini omuo.

 2004 — Efuta laIndia. Ekakamo ledu lounene woshiyelekifo 9,1 ola li la etifa oshikungulu, osho sha li sha twaalela eemwenyo dovanhu 225 000 lwaapo.

 2008 — China. Ekakamo ledu lounene woshiyelekifo 7,9 ola li la hanauna po omikunda nosho yo eedolopa, nosha twaalela eemwenyo dovanhu 90 000, la lemaneka ovanhu 375 000 lwaapo nola fiya ovanhu eemiliyona vehe na omaumbo.

 2010 — Haiti. Ekakamo ledu lounene woshiyelekifo 7,0 ola li la twaalela eemwenyo dovanhu ve dulife 300 000 nola fiya ovanhu ve dulife pemiliyona vehe na omaumbo.

 2011 — Japan. Ekakamo ledu lounene woshiyelekifo 9,0 ola li la etifa oshikungulu notaku tengenekwa kutya ola twaalela eemwenyo dovanhu 18 500, novanhu omayovi omafele ova tembulwa. Ola li la yo la kuma onhele Fukushima. Naasho osha li sha etifa oshiponga. Nokonima yomido omulongo, ovanhu 40 000 lwaapo kava li tava dulu okushuna komaumbo avo, oo a li e li popepi nonhele oyo.

 Omaxunganeko Ombiibeli e na sha nomakakamo edu otae tu kwafele tu kale tu li oupafi shi na sha noiningwanima oyo tai ka holoka monakwiiwa i li popepi. Jesus okwa ti: “Ngeenge omwa mono oinima oyo tai ningwa, shiiveni kutya Ouhamba waKalunga ou li popepi.” — Lukas 21:31.

 Ombiibeli oya yelifa kutya Ouhamba waKalunga epangelo lolela lomeulu, na Jesus Kristus oye Ohamba yepangelo olo. Ouhamba oo oo Jesus a lombwela ovashikuli vaye va ilikane kombinga yao. — Mateus 6:10.

 Shimha Ouhamba waKalunga we uya okupangela kombada yedu, Kalunga ota ka shilipaleka kutya itapa ka kala oiponga yopaushitwe, ngaashi omakakamo edu. (Jesaja 32:18) Ota ka velula ovanhu koilanduliko aishe oyo ya etifwa komakakamo edu, kutya nee opalutu, ile opamaliudo. (Jesaja 65:17; Ehololo 21:3, 4) Opo u mone ouyelele muhapu, lesha oshitukulwa “What Will God’s Kingdom Accomplish? [Ouhamba waKalunga otau ka wanifa po shike?]”