Ngeenge owa kanifa oilonga yoye ohashi ku kumu neenghono, ha painiwe ashike, ndele opamaliudo nopamadiladilo yo. Omaetepo taa shikula okwa kanghamena komafinamhango Ombiibeli notaa dulu oku ku kwafela.

•   Lombwela vamwe osho u udite.

   Osho Ombiibeli tai ti: “Kaume oku na ohole alushe.” — Omayeletumbulo 17:17.

   Konima ngeenge wa kanifa oilonga, otashi dulika u kale udite nai, wa handuka, ile wa ngwangwana, ile udite kutya ino pondola sha. Ngeenge owa lombwele oilyo youkwaneumbo woye nosho yo ookaume koye kopofingo nghee udite, otave ke ku kwafela. Otashi dulika yo ve ku pe omayele taa longo, oo taa dulu oku ku kwafela u pule komesho.

•   Henuka okukala noshisho sha pitilila.

   Osho Ombiibeli tai ti: “Inamu kala noshisho shefiku lomongula. Osheshi lo otali uya li na shalo vene.” — Mateus 6:34.

   Ombiibeli otai tu ladipike tu kale hatu lilongekida komesho yefimbo. (Omayeletumbulo 21:5) Ashike nande ongaho, oye tu pa yo omayele kutya otu na okuhenuka okukala noshisho sha pitilila, ile oshisho shoinima oyo tai ka ningwa monakwiiwa. Luhapu, ohatu kala tu na oisho yoinima oyo tashi dulika nokuli itai dulu okuningwa. Oshi li xwepo okukala hatu yandje elitulemo kwaasho hatu dulu okuninga paife.

   Ombiibeli oi na omayele opandunge, oo taa dulu oku tu kwafela tu mone nghee hatu dulu okuungaunga noshisho. Lesha oshitukulwa “How to Deal With Stress,” opo u lihonge shihapu.

•   Ninga omalunduluko apa sha pumbiwa e na sha nanghee to ka longifa oimaliwa yoye.

   Osho Ombiibeli tai ti: “Onde lihonga. . . okukala ndi na shihapu nokukala ndihe na sha.” — Ovafilippi 4:12

   Tambula ko onghalo yoye. Eshi osha kwatela mo okulundulula onghedi omo ho longifa oimaliwa yoye, opo uha fyaale pomutenya. Henuka okulya eendjo inashi pumbiwa. — Omayeletumbulo 22:7.

   Opo u mone ouyelele muhapu u na sha nanghee u na okuungaunga noiniwe yoye, tala oshitukulwa “How to Live on Less.”

•   Longifa efimbo loye nawa.

   Osho Ombiibeli tai ti: “Kaleni hamu ungaunga pandunge . . . , longifeni nawa efimbo leni.” — Ovakolossi 4:5.

   Nonande iho i vali koilonga, kala ho longifa nawa efimbo loye. Okuninga ngaho otashi ke ku kwafela u kale u na onghalamwenyo i na elandulafano nokukala u udite u na oshilonga.

•   Kala ho tifuka.

   Osho Ombiibeli tai ti: “Oilonga aishe idjuu otai likolifa.” — Omayeletumbulo 14:23.

   Kala u na ehalo lokulonga oilonga ya yooloka ko kwaayo wa li ho longo. Otashi dulika to ka pumbwa okukonga oilonga oyo ya talika ko idinifa, ile hai futu shinini i dule oilonga yoye yonale.

•   Kala omudiinini.

   Osho Ombiibeli tai ti: “Ombuto yoye i kuna ongula, ndele ino tulumukifa eke loye komatango. Osheshi ku shi shii, ilipi po tai ka mena.” — Omuudifi 11:6

   Twikila okukala to kongo oilonga. Lombwela vamwe kutya oto kongo oilonga. Popya novapambele voye, ovanhu ovo u shii, ovalongi pamwe naave vonale nosho yo ovashiinda shoye. Popya yo neekambani odo hadi kwafele ovanhu va mone oilonga nosho yo naado hadi kongo ovanailonga kointaneta. Kala we lilongekida okuya komapulapulo oilonga nokuumba o-CV yoye, fimbo ino mona oilonga.