Ombiibeli otai ti ngahelipi kombinga yondjala oyo i li ko kunena?
“Itapa kala ondjala.” Ovawiliki vomounyuni ou ova hala okuhanga elalakano olo, okuxulifa po limwe lomomaupyakadi manene, oo a taalelwa kovanhu kombada yedu. a Ndele mbela ope na ngoo efiku limwe itapa ka kala ondjala? Ombiibeli otai ti ngahelipi?
Ombiibeli oya xunganeka kutya otapa kala ondjala
Ombiibeli oya xunganeka kutya ota pa kala ondjala pefimbo letu, olo hali ifanwa kutya ‘omafiku axuuninwa.’ (2 Timoteus 3:1) Kalunga haye omweetifi wondjala, ashike okwe tu londwela kombinga yayo. (Jakob 1:13) Tala omaxunganeko avali Ombiibeli taa shikula.
‘Otaku ka kala ondjala keembinga neembinga.’ (Mateus 24:7) Exunganeko e li lOmbiibeli otali ulike kutya otapa ka kala ondjala koitukulwa ihapu. Shi didilikwedi, olaporta ya yandjwa kwaavo ve lihongela nghee oikulya hai ndulukwa po noku a ndjakanekwa oya ti: “Nakaidi ka halwenya ota ende nokunaipala noka pe na oikulya i na oitungifi.” b Ovanhu eemiliyona mounyuni ihava mono oikulya oyo va pumbwa. Shinyikifa oluhodi, osho ohashi twaalele eemwenyo davahapu.
“Onghambe ilaula, nomulondi wayo okwa li e na oiyelekifo ivali meke laye.” (Ehololo 6:5) Mexunganeko eli, onghambe nosho yo omulondi wayo otai faneke ondjala momafiku aa axuuninwa. c Molwaashi ope na ashike oikulya inini, keshe umwe fimbi okonyandi. Omulondi wonghambe okwa ingida kutya eendado doikulya otadi ende tadi londo nokwa londwela ovanhu va kwate nawa oikulya. (Ehololo 6:6) Osho otashi ulike filufilu nghee onghalo i li kunena mounyuni aushe, molwaashi ovanhu omabiliyona ihava dulu okulanda oikulya oyo i na oukolele.
Nghee ondjala tai ka xulifwa po
Ovanawino ova popya kutya opulaneta yetu otai dulu okumenifa oikulya ihapu i dulife ovakalimo. Ndele mbela oshike tashi etifa ondjala? Ombiibeli otai ti ngahelipi kombinga yOmushiti wetu, Jehova, mbela ota ka dula ngoo okukandula po omaupyakadi oo?
Oupyakadi: Omapangelo itaa dulu okuxulifa po oluhepo nokuhenouyuki oko haku etifa ondjala.
Ekandulepo: Omapangelo opanhu inaa wanenena otaa ka pingenwa po kOuhamba waKalunga, oo u li epangelo la wanenena. (Daniel 2:44; Mateus 6:10) Kunena, ovanhu ovo vehe na oiniwe ihava dulu okulanda oikulya, ashike onghalo otai ka lundulukila kouwa koshi yOuhamba waKalunga. Ombiibeli oya popya kombinga yaJesus Kristus, oo e li Ohamba yOuhamba waKalunga tai ti: ‘otai ka xupifa epongo eli tali kuu onghuwo li kwafwe, nomukwanaluhepo ou ehe na omukwafi. Moshilongo namu kale oshishipo shoilya, yo i mene fiyo okeexulo deemhunda.’ — Epsalme 72:12, 16.
Oupyakadi: Oita ohai hanauna nokushunifa pedu eliko loshilongo. Osho ohashi shi ningifa shidjuu kovanhu va mone oikulya oyo va pumbwa.
Ekandulepo: Jehova ota ka “xulifa po oita fiyo okeengaba dedu, ndele ta teyaula omauta nomaonga, nomatemba oita te a xwike po nomundilo.” (Epsalme 46:9) Kalunga ota ka hanauna po oilwifo aishe noku i xwika po nomundilo. Osho otashi ka kwafela keshe umwe a mone noupu oikulya i na oitungifi. Ombiibeli oya udaneka ya ti: “omuyuki ta kala a temuna, nombili oi yadi mo.” — Epsalme 72:7.
Oupyakadi: Onghalo yomhepo ya nyika oshiponga noiponga yopaushitwe ohai hanauna po oimeno nokudipaa oinamwenyo.
Ekandulepo: Kalunga ota ka pangela eenghono domeshito, noimeno otai ka kulila monghalo yomhepo iwa. Ombiibeli oya ti: ‘Kalunga okwa lotifa oshikungulu, nomakufikufi omefuta okwa mwena. Apa pa li shito ombuwa, okwa shitukifa po omatale, nedu likukutu okwe li shitukifa eefifiya. Ovafi vondjala okwe va nangeka mo, ndele tava kunu oilya, ndele tava twike oixwa yomiviinyu, e di da ima noda eta oshishipo.’ — Epsalme 107:29, 35-37.
Oupyakadi: Olwisho ohali ningifa oohandimwe va longe oikulya ihe na oukolele. Ofimbo ovo va pumbwa oikulya shidjuu kuvo oku i mona.
Ekandulepo: Koshi yOuhamba waKalunga itaku ka kala okuhe na oshili nosho yo ovanhu ovo ve lihole vo vene. (Epsalme 37:10, 11; Jesaja 61:8) Ombiibeli oya ti Jehova Kalunga oku li “omupopili wovafininikwa, nomupaluli wovanandjala.” — Epsalme 146:7.
Oupyakadi: Etomheno etitatu, eshi mounyuni mu na ondjala ololo kutya oikulya ihapu ohai hepifwa omudo keshe.
Ekandulepo: Koshi yOuhamba waKalunga oikulya otai ka kwatwa nawa. Eshi Jesus a li kombada yedu, okwa li ha henuka okuhepifa oikulya. Pashihopaenenwa, okwa li a palula pashikumwifilonga ovanhu ve dulife po 5 000. Lwanima, okwa lombwela ovahongwa vaye a ti: “Toolei po oundjaumukile ovo va xupa po, opo paha hepe sha.” — Johannes 6:5-13.
Ouhamba waKalunga otau ka xulifa po oinima aishe oyo hai etifa ondjala, novanhu aveshe otava ka hafela oikulya i na oitungifi. (Jesaja 25:6) Opo u mone kutya osho otashi ka wanifwa po naini kOuhamba waKalunga, tala oshitukulwa “Ouhamba waKalunga otau uya okupangela naini kombada yedu?”
a Elandulafano laasho sha li sha kundafanwa pomutumba wOiwana ya Hangana womo 2015, li na sha nanghee tava ka wanifa po eemhumbwe dovanhu mo 2030.
b Olaporta oyo ya li ya yandjwa kehangano lo-Food and Agriculture Organization of the United Nations, the International Fund for Agricultural Development, the United Nations Children’s Fund, the United Nations World Food Programme, nosho yo o-the World Health Organization.
c Opo u mone ouyelele muhapu u na sha neenghambe nhe, odo da tumbulwa mEhololo, tala oshitukulwa “Ovalondinghambe vane ovo oolyelye?”
Otashi dulika yo u hafele oikundafanwa ei
OSHUNGONANGELO
Ovalondinghambe vane ovo oolyelye?
Tala nghee to dulu okushiiva kutya emoniko olo otali ti shike.
OMAHONGO OMBIIBELI A FIMANA
Ouhamba waKalunga oshike?
Eshi Jesus a li kombada yedu, okwa li ha udifa unene kombinga yOuhamba waKalunga. Oule womido, ovashikuli vaye ova kala hava ilikana Ouhamba oo u uye.
