Oiwana ihapu mounyuni aushe, oya tukauka omolwomakuyunguto opapolotika. Shelikolelela komavalulo omomudo 2022, ehangano loPew Research Center ola ti: “omapekapeko oo a li a ningwa moilongo 19 mounyuni aushe okwa ulika kutya eepelesenda 65 dovakulunhu moilongo ya tya ngaho, ohave lipumu mumwe, molwaashi ohava yambidida eengudu dopapolotika da yoolokafana.”

 Mbela owa didilika kutya omatukauko opapolotika otaa hapupala momudingonoko weni? Omolwashike shi li ngaho? Mbela ope na ngoo ekandule po loupyakadi oo? Didilika osho Ombiibeli tai ti.

 Ombiibeli oya xunganeka kutya pefimbo letu, olo hali ifanwa “omafiku axuuninwa,” ovanhu vahapu otava ka kala ve na elihumbato, olo tali shi ningifa itashi shiiva okulongela kumwe.

•   “Momafiku axuuninwa otapa ka kala omafimbo madjuu okukaliwa muo. Osheshi ovanhu otava ka kala ve lihole vo vene, . . . vehe na elongelokumwe.”—2 Timoteus 3:1-3.

 Nonande ovanhu otava kendabala ngaashi tava dulu, omapangelo okwa dopa okuwanifa po eemhumbwe dovapangelwa vao. Ovanhu ovo ve na omataleko a yoolokafana ohava mono shidjuu okulongela kumwe, opo va kandule po omaupyakadi. Ombiibeli oya hangwa nale ya xunganeka kutya eenghalo osho tadi ka kala ngaho.

•   “Omunhu ta pangelele mukwao omupya.”—Omuudifi 8:9.

 Ashike nande ongaho, Ombiibeli oya popya kutya ope na epangelo olo li li koshi yewiliko laumwe, oo taka xulifa po omaupyakadi aeshe ovanhu kombada yedu.

 Ombiibeli oya popya kutya Jesus Kristus oye a wana okupangela, oku na eenghono, eenghonopangelo nosho yo ehalo loku etela ovanhu aveshe ombili noukumwe.

•   “Momafiku ayo omuyuki ta kala a temuna, nombili oi yadi mo.”—Epsalme 72:7.

•   ‘Oiwana yovapaani i noku ke i longela.’—Epsalme 72:11.

 Jesus oku li omupangeli a denga mbada, molwaashi oku na ko nasha novanhu nokwa hala oku va kwafela, unene tuu ovo hava ungaungiwa navo shihe li pauyuki.

•   “Osheshi otai ka xupifa epongo eli tali kuu onghuwo li kwafwe, nomukwanaluhepo ou ehe na omukwafi. Otai ningile omuxupi nohepele olukeno, notai xupifa eemwenyo deehepele; ndele tai di kulile momafininiko nomomalwifo.”—Epsalme 72:12-14.

 Lihonga shihapu kombinga yOuhamba waKalunga, epangelo lomeulu, olo li li koshi yewiliko laJesus. Shiiva nghee to dulu okuyambidida noku mona ouwa mepangelo olo.

•   Tala okavidio Ouhamba waKalunga oshike?

•   Lesha oshitukulwa “Ouhamba waKalunga, epangelo olo lihe na oulingilingi.”