Ehangano lOmbili nEameno ola uda mo 19 Mei 2022 kovakwanepangelo va fimana ve dulife po 75 kutya, “oikulya oyo inai wana oya kumwa nale komukifi wekomba, o-COVID-19, nosho yo konghalo yomhepo oyo tai lunduluka, nopaife ondjala otai endele ko omolwoita oyo i li muUkraine.” Diva konima yaasho, omunongononi umwe okwa ti, “mounyuni omu yadi nale omaupyakadi mahapu, ndele omolwoita, vahapu otava ka fya ondjala.” Ombiibeli oya xunganeka nale kutya otape ke uya omhumbwe yoikulya pefimbo letu, ashike otai tu kwafele yo tu mone nghee hatu dulu okuungaunga nayo.

•    Jesus okwa xunganeka, a ti: “Osheshi oiwana otai ka lwifafana, omauhamba otaa ka kondjifafana, notaku ka kala ondjala.” — Mateus 24:7.

•    Embo lOmbiibeli lEhololo ola popya kombinga yovalondinghambe vane vopafaneko. Umwe womovalondinghambe ovo oku lile po oita. Okwa shikulwa kumukwao oo e lile po ondjala; pefimbo opo otashi ka kala shidjuu okumona oikulya, molwaashi otai ka kala i na ondilo unene. “Onda mona onghambe ilaula, nomulondi wayo okwa li e kwete oshiyelekifo meke laye. Onda uda sha sha fa ondaka . . . Tai ti, ‘Olita yoilya otai kosho ondjabi yefiku alishe! Eelita nhatu doilyavala nayo otai kosho ondjabi yefiku alishe.’” — Ehololo 6:5, 6, Contemporary English Version.

 Omaxunganeko Ombiibeli e na sha nondjala otaa wanifwa po kunena pefimbo olo Ombiibeli hai ifana kutya ‘omafiku axuuninwa.’ (2 Timoteus 3:1) Opo mu lihonge shihapu kombinga ‘yomafiku axuuninwa’ nosho yo ovalondinghambe vane vomEhololo, tala okavidio Eenghalo dounyuni oda lunduluka okudja mo 1914 nosho yo okulesha oshitukulwa “Ovalondinghambe vane ovo oolyelye?”

•    MOmbiibeli omu na omayele taa longo oo taa dulu oku tu kwafela tu lididimikile eenghalo didjuu, mwa kwatelwa ondado yoikulya oyo tai londo pombada, ile nokuli ondjala. Tala oihopaenenwa imwe moshitukulwa “How to Live on Less.”

•    Ombiibeli otai tu pe yo eteelelo kutya oinima onai ka xwepopale. Oya udaneka efimbo olo ‘moshilongo tamu ka kala oshishipo shoilya,’ nakeshe umwe ota ka kala e na sha wana okulya. (Epsalme 72:16) Opo u lihonge shihapu kombinga yeteelelo mOmbiibeli li na sha nonakwiiwa, nonokutya omolwashike tu na oku i lineekela, lesha oshitukulwa “A Real Hope for a Better Tomorrow.”