Ovanhu vahapu mounyuni ova hoolola okukala ashike hava li oikwambidi noiimati.

•   Ehangano lo-The Vegan Society, olo hali yambidida ovanhu ovo va hoolola okulya oikwambidi noiimati, ponhele yokulya ombelela nosho yo oinima oyo ya longwa moinamwenyo, ola popya shi na sha nonghedi ya tya ngaho la ti: “Okuninga ehoololo lokulya ashike oikwambidi noiimati otashi kwafele mokwaamena oinamwenyo iha dipawe nelalakano lokumona oikulya, oidjalomwa nosho yo oinima imwe vali.”

 Shikwao vali, kakele ashike kokukenukila oinamwenyo, vamwe ova hoolola onghedi ya tya ngaho yokukalamwenyo, opo va kaleke omudingonoko wavo wa wapala, okwaamena oukolele wavo, ile molwelongelokalunga lavo.

•   O-Britannica Academic oya ti: “Mepingafano neenghedi dikwao dokuhoolola okulya oikulya yoludi lonhumba, okuhoolola okulya oikwambidi noiimati okwa talika ko kuvahapu onga eitavelo lavo, nove ku tala ko ku li omukalo wokuxwepopaleka onghalo mounyuni.”

 Mbela onghedi yokukalamwenyo yokulya ashike oikwambidi noiimati otai dulu okweetela ovanhu onakwiiwa ya denga mbada? Ombiibeli otai ti ngahelipi?

 Ombiibeli oya popya kutya Omushiti wetu Jehova Kalunga, a okwa pa ovanhu ondodo i dulife yoinamwenyo nokwe va pa oufemba wokupangela oinamwenyo. (Genesis 1:27, 28) Lwanima, Kalunga okwa ka lombwela ovanhu va lye ombelela yoinamwenyo. (Genesis 9:3) Ashike iha kala a hafa, ngeenge ovanhu tava hepeke oinamwenyo. — Omayeletumbulo 12:10.

 PaMbiibeli, omunhu keshe oku na okutokola kuye mwene, ngeenge ota kala tali ombelela, ile hasho. b Etokolo olo hatu ningi halo tali ufa kutya Kalunga okwe tu hokwa. (1 Ovakorinto 8:8) Kape na oo e na oufemba wokutokola mukwao omolwoikulya oyo a hoolola okulya. — Ovaroma 14:3.

 Ombiibeli oya popya kutya onghedi yokukalamwenyo oyo twa hoolola hayo tai pongolola po omaupyakadi omounyuni ou. Omaupyakadi mahapu mounyuni ohaa etifwa koinima yopapolitika, omakuyunguto opashiwana nosho yo omaupyakadi opashimaliwa, oo ovanhu itava dulu okukandula po. Ombiibeli oya ti:

•   “Osho sha endama itashi dulu okuyukililifwa.” —Omuudifi 1:15.

 Omushiti wetu oye ta ka xulifa po omaupyakadi oo hatu shakeneke. Ombiibeli oya longifa omafaneko okuulika kunghee te ke shi ninga.

•   “Onda mona eulu lipe nedu lipe; eulu likulu nedu likulu ola xula po, nefuta kali po vali.” — Ehololo 21:1.

 Kalunga ota ka pingena po omapangelo opanhu, ile tu tye “eulu likulu,” ‘neulu lipe,’ Ouhamba waye, oo u li epangelo laye lomeulu. Ouhamba waye otau ka hanauna po ‘edu likulu,’ olo tali ulike kovanhu ovakolokoshi, notau ka pangela ‘edu lipe,’ ile tu tye ovo hava dulika kuo.

 Ovanhu otava ka dula ashike okukala nombili noinamwenyo monghedi ya wanenena nokukala momudingonoko wa amenwa koshi yepangelo lOuhamba waKalunga. — Jesaja 11:6-9.