Oulingilingi oo u li movanambelewa vepangelo ou li mounyuni aushe nowa etifa oilanduliko ya kwata moiti. a Pashihopaenenwa, ovanambelewa vomoilongo ihapu otaku popiwa kutya ova longifa po oimaliwa oyo ya nuninwa okukwafela ovanhu omolwo-COVID-19, opo va punapale. Oulingilingi wa tya ngaho owa ningifa ovanhu vaha mone ouhaku oo va pumbwa, va kale tava mono oixuna nokufya.

 Oulingilingi otau dana onghandangala ya kula momapangelo. David Cameron, omuprima woshilongo shaUnited Kingdom, okwa popya shi na sha nonghalo oyo a ti: “Oulingilingi oo oupyakadi wa kula momapangelo, molwaashi omu na ovanhu ovo ve hole okati keenyala.”

 Ashike otu na oushili oo kutya omapangelo aeshe oo haa longo oulingilingi otaa ka xulifwa po mafiku. Omolwashike mbela? Tala kutya Ombiibeli oya ti ngahelipi shi na sha naasho Kalunga ta ka ninga.

 Ombiibeli oya popya shi na sha naKalunga ya ti: “Osheshi Ame Omwene ndi hole ouyuki, handi tondo oukolokoshi nomanyeko.” b (Jesaja 61:8) Kalunga oha kala e wete eshi ovanhu tava mono oixuna omolwoulingilingi wavamwe. (Omayeletumbulo 14:31) Okwa udaneka a ti: “Molwokufininikwa kwomapongo, . . . nda hala okufikama paife.” — Epsalme 12:5.

 Kalunga ota ka ninga po shike? Ponhele yokulundulula omapangelo oo e li po nale, ote ke a pingena po nepangelo laye mwene lomeulu, olo hali ifanwa ‘Ouhamba waKalunga.’ (Markus 1:14, 15; Mateus 6:10) Ombiibeli oya ti: “Kalunga ou komeulu ota ka dika ouhamba. . . . Ndele wo otau ka nyanyaula notau ka teyaula omauhamba aeshe noku a xulifa po, ndelenee woovene tau ka kala fiyo alushe.” (Daniel 2:44) Kalunga ota ka xulifa po omapangelo aeshe oo haa longo oulingilingi kunena.

 Otu shi shii ngahelipi kutya epangelo laKalunga itali ka kala hali longo oulingilingi? Tala oinima tai shikula.

1.  1. Eenghono. Ouhamba oo otau pewa eenghono kuKalunga omunaenghono adishe. — Ehololo 11:15.

    Osho sha fimana: Opo omapangelo opanhu a dule okulonga, ohaa kala e likolelela koimaliwa yovakwashiwana. Luhapu ohaa kongo eemhito opo a pewe ombubo, okuvaka nokukengelela. Ashike Ouhamba ou waKalunga otau ka yambididwa kuKalunga, Omunaenghono adishe. Onghee otau ka dula okuwanifa po filufilu eemhumbwe daaveshe ovo ve li koshi yepangelo lao. — Epsalme 145:16.

2.  2. Omupangeli. Kalunga okwa hoolola Jesus Kristus oye a kale Omupangeli wOuhamba waye. — Daniel 7:13, 14.

    Osho sha fimana: Nokuli novapangeli vopanhu ovo ve na omitima diwa ohava nwefwa mo kwaavo ve na oikala ii. (Omuudifi 7:20) Mepingafano naasho, Jesus okwa ulika kutya ke hole ombubo. (Mateus 4:8-11) Osho sha fimana oshosho kutya ohe linyengifwa kohole, opo a kwafele ovanhu noku na ko nasha nonghalonawa yavo. — Epsalme 72:12-14.

3.  3. Eemhango. Eemhango dOuhamba waKalunga oda wanenena notadi tulumukifa. — Epsalme 19:7, 8.

    Osho sha fimana: Eemhango dopanhu, alushe oda kitakana, di li omutengi, hadi findile kongudi eehepele novanhu ohava mono eemhito dokuninga oulingilingi. Mepingafano naasho, eemhango daKalunga odopahole notadi etele ovanhu ouwa. (Jesaja 48:17, 18) Naasho sha fimanenena oshosho kutya ohatu dulika kudo nehalo liwa. (Mateus 22:37, 39) Oshoshili kutya Kalunga oha mono osho shi li momitima noha shilipaleke kutya eemhango odo otadi tulwa moilonga te shi ningi nolukeno. — Jeremia 17:10.

 Ohatu ku indile u lihonge shihapu kombinga yomaudaneko oo taa hangwa mOmbiibeli e na sha nepangelo olo lihe na oulingilingi.

•   Lesha oshitukulwa “Ouhamba waKalunga, epangelo olo lihe na oulingilingi” opo u mone omatomheno atatu a wedwa po, oo taa ulike kutya Ouhamba waKalunga kau na fiku a longe oulingilingi.

•   Tala okavidio Ouhamba waKalunga oshike? opo u lihonge shihapu kombinga yepangelo laKalunga, naasho tau ka ningila edu.

•   Ohatu ku indile yo u konakone Ombiibeli pamwe nafye opo u mone nghee omaudaneko Ombiibeli taa dulu oku ku etela ouwa.