ЧОБАЛЧАТХАННАРҒА ПОЛЫЗЫҒ
Хайди сыдас парыбызарға. Ниме идерге чарир
Чағын кізі ӱреен соонда хайди сыдас парыбызарға чӧптер уғаа кӧп. Хайди мының алнындағы статьяда чоохталған, полған на кізі позының оңдайынаң чобалча. Аннаңар пір кізее полысхан чӧп пасха кізее полыс таа полбас.
Че пар нинҷе-де чӧп, олар прайзына туза полчалар. Ол чӧптерні чағын кізізін чідір салған кізілерге полысчатхан психологтар удаа пирчелер. Паза олар хаҷан даа иргіленминчеткен библейскай принциптерге килістіре чӧптер.
1. ТУҒАННАРНЫҢ ПАЗА НАНҶЫЛАРНЫҢ ПОЛЫЗИИН ХЫЙА ИТПЕҢЕР
Пірее психологтар андағ полызығны ол аар туста сыдас парыбызарға иң чахсы полызығ тіп санапчалар. Че сірерге пірееде чалғысхан полып аларға паза кізілер чархастығ пілдірер. Анзынаң хорыхпаңар.
Кізілернің аразында сыбыра поларға кирек тіп сағынмаңар, че олох туста, мағаа пірдеезі кирек чоғыл тіп санабаңар. Оларның полызии кирек полар. Ам сірерге ниме кирек, ниме кирек чоғыл ипти чоохтап пиріңер.
Нинҷе тус кізілернең, нинҷе тус чалғысхан иртірерге, кирексіністеріңні санға алып, постарың пӧгіңер.
ПРИНЦИП: «Чалғысхан полғанҷа, ікӧлең полғаны артых... Пірсі аңдарыл парза, пірсі ағаа турарға полыс пирер нооза» (Экклезиаст 4:9, 10).
2. ТУЗАЛЫҒ ЧИИС ЧІП ТУРЫҢАР ПАЗА ФИЗИЧЕСКАЙ УПРАЖНЕНИЕЛЕР ИДІҢЕР
Чағын кізі ӱреп парза, тузалығ чиис стресске пастыр салбасха полызар. Фрукттар, огород тамағын паза белоктығ чағбан чиис чирге кӱстеніңер.
Кӧп арах суғ паза хазыхха туза полчатхан напитоктар ізіңер.
Чиріңер килбинчетсе, кӧместең, удаа чіп турыңар. Ідӧк имҷідең чииске хосчаң тузалығ имнер сурып аларға чарир *.
Табырах чӧргені паза пасха даа физическай упражнениелер тың чобалбасха полызар. Спортнаң айғасханы чуртас хайди алыс парғаннаңар сағынып аларға полызар. Пірееде, тізең, сағыссырастарны ундут саларға полысча.
ПРИНЦИП: «Хаҷан даа пір дее кізі позының ит-сӧӧгін хырт кӧре чоғыл, че позын, азырап, хайраллидыр» (Ефестегілерге 5:29).
3. ТОСХАНҶА УЗУП АЛ ТУРЫҢАР
Чағын кізізін чідір салған кізі, пичелленіп, хомайланча, аннаңар ағаа чахсы уйғу уғаа аарлығ.
Араға паза кофеин пар напитоктар кӧп іспеңер. Оларның ӱчӱн узуп полбассар.
ПРИНЦИП: «Пір оос тынағ ікі оос аар тоғыстаң паза чилні сӱріс чӧргенінең хай-хай артых» (Экклезиаст 4:6).
4. ИҢ ЧАХСЫЗЫН ТАЛЛАП АЛЫҢАР
Полған на кізі позының оңдайынаң чобалча. Сірерге ниме иң чахсы полар піліп алыңар.
Кӧп кізі чобалчатса, сағыссырастарын пасха кізее чоохтап пирзе, ниик пол парча тіпчелер. Піреелері, тізең, прай сағыссырастарын постарында тутчалар. Психологтар пу сурығда пір сағысха кил полбинчалар. Сірерге хайди тудынза чахсы полар постарың кӧріңер. Чувстволарыңны чоохтап пирерге хынчатсар, че уйатчатсар, ізестіг нанҷаа кӧместең чоохтап пастаңар.
Піреезіне, ылғап алза, ниик пол парча. Піреезі, тізең, ылғабин, сыдас парыбысча.
ПРИНЦИП: «Чӱрек позының пичелін пілче» (Притчи 14:10).
5. ХАЗЫХ АРДАТЧАТХАН НИМЕЛЕРДЕҢ ХЫЙА ТУДЫНЫҢАР
Піреелері стрессті тобырып алар ӱчӱн, араға ісчелер, наркотиктернең алай медицинскай препараттарнаң айғасчалар. Че ол хорғыстығ чол: олар чӱректі ӱр нимеске амыратчатсалар даа, хазыхты ардатчалар. Аннаңар хазых ардатпас оңдайларнаң тузаланарға кирек.
ПРИНЦИП: «Кірлепчеткен нимелердең прай арығланып алаалар» (2 Коринфтегілерге 7:1, НТ).
6. ТУСТЫ САҒЫНЫП ХОРАДЫҢАР
Кӧп кізілер, чобаға пастыр салбас ӱчӱн, ол чобағдаңар сағынмасха полысчатхан киректерні идерге кӱстенчелер.
Наа нанҷылар таап алыңар, иргі нанҷыларнаң кӧп арах тус иртіріңер, пірее наа нимее ӱгреніп алыңар алай тынанып алыңар.
Пола-пола чобағдаңар сағынмасха полысчатхан киректернең кӧп арах тус айғасчатханнаңарны сизін саларзар. Анзы чобалыс иртчеткенін кӧзітче.
ПРИНЦИП: «Прай нимее позының тузы... ылғаҷаң тус паза хатхырҷаң тус, чобалҷаң тус паза плесет салҷаң тус» (Экклезиаст 3:1, 4).
7. ОЛАҢАЙ ЧУРТАСХА АЙЛАНЫҢАР
Табырах арах олаңай чуртасха айланарға кӱстен.
Тоғын сыхсар, тузында узирға чатсар паза пасха даа киректернең айғас сыхсар чуртас орынзар айланчатханын сизін саларзар.
Тузалығ паза ӧрініс ағылчатхан киректер чобағдаң хыйа тартарлар.
ПРИНЦИП: «Андағ кізі чуртазы нинҷе хысхаҷах полчатханнаңар сағынмас таа, сын Худай аның чӱреене ӧрініс толдырча нооза» (Экклезиаст 5:20).
8. ААРЛЫҒ ПӦГІННЕРНІ, САҒЫНЫП АЛБИН, АЛБАҢАР
Чағыны ӱреп парған соонда, ӱр ниместең алған пӧгіннеріне кӧп кізі ачырғанча.
Кӧс парыбызарға, тоғыс алыстырыбызарға паза ӱреен кізінің нимелерін чох идерге маңзырабаңар.
ПРИНЦИП: «Кӱстенҷік кізінің планнары маңнанысха ағылчалар, полған на маңзыраах кізі хызылар» (Притчи 21:5).
9. ЧАҒЫН КІЗІНІ УНДУТПАСХА КӰСТЕНІҢЕР
Кӧп кізі ӱреен кізіні ундутпасха полысчатхан нимелер идерге кӱстенчелер.
Ӱреен кізінің фотографияларынаң алай нимелерінең коллекция идіп алыңар алай ол кізінең палғалыстығ чӱрекке аарлығ сағыстарны пас салыңар.
Ӱреен кізідеңер чылығ сағыстар кирчеткен нимелерні чыып салыңар. Соонаң оларны кӧріп ал турарзар.
ПРИНЦИП: «Пурунғы кӱннерні сағысха кир» (Второзаконие 32:7).
10. ПІРЕЕ ЧИРЗЕР ПАР КИЛІҢЕР
Отпускха хайдар-да пар киліңер.
Ӱрге отпускха парарға киліспинчетсе, нинҷе-де кӱнге пірее чирзер пар киліңер. Кӧзідімге, походха, музейзер алай машиналығ хайдар-да пар килерге чарир.
Пасха чирде ӱр нимес тее полып алғаны тың сағыссырабасха полызар.
ПРИНЦИП: «Кізі чох чирзер парып, анда ағылахти кӧмес тынанып алыңар» (Марк 6:31).
11. ПАСХАЛАРЫНА ПОЛЫЗЫҢАР
Ундутпаңар, пасхаларына полызып, сірер постарыңа полысчазар.
Иң пурнада сірерге чағын кізее чобалчатхан нанҷыларыңа алай туғаннарыңа полызарға чарир.
Пасхаларына полыссар паза оларны часхарзар, постарыңны кирек кізізім тіп санирзар. Анзы ӧрініс ағылар.
ПРИНЦИП: «Пирчеткені алчатханынаң часкалығ» (Илҷілернің 20:35).
12. СІРЕРГЕ НИМЕ СЫНАП ААРЛЫҒ?
Чобағ кізее сынап ниме аарлығ полчатханын піліп аларға полысча.
Ам, чуртас алыс парғанда, ниме сынап аарлығ сыныхтап кӧріңер.
Кирек полза, чуртас алыстырыңар.
ПРИНЦИП: «Чобалчатханнарның туразынзар чӧргені кӱлеттепчеткеннернің туразынзар чӧргенінең артых» (Экклезиаст 7:2).
Чоохтирға кирек, чобалчатхан кізінің чӱрее саңай ағырбас итчең оңдай чоғыл. Че ниме-де идерге, кӧзідімге, пу статьяда пирілген чӧптернең тузаланарға кӱстенчеткен кізі олаңай чуртасха табырах арах айланып алча. Пу статьядағы чӧптердең пасха даа чӧптер пар. Че пу чӧптернің піреезінең тузалан кӧрзер, сірерге сынап ниик арах полчатханын сизінерзер.
^ абз. 13 «Усхуныңар!» тіп журнал хайдағ-да имнег оңдайының сарина турбинча.