ЧОБАЛЧАТХАННАРҒА ПОЛЫЗЫҒ

Чобалчатханнарға иң чахсы полызығ

ВОСПРОИЗВЕСТИ

ХАЛҒАНҶЫ ТУСТАРДА, ӰРЕЕН КІЗІНІҢ СООНҶА ЧОБАЛЧАТХАН КІЗІНІҢ ЧӰРЕЕ ХАЙДИ АҒЫРЧАТХАНЫН КӦП ІСТЕСЧЕЛЕР. Психологтар кӧп чӧптер пирчелер. Оларның иң чахсы чӧптері Библияның чӧптеріне килістірелер. Хайди кӧрчебіс, пу пурунғы кинде иргіленминче. Че Библия чӧптер ле пирчеткен кинде нимес, анда чобалчатхан кізіні саңай часхар полар информация пар.

Пістің ӱреен чағыннарыбыс ирееленминчелер

Библияда Экклезиаст 9:5-те чоохталча: «Ӧліглер, тізең, пір дее ниме пілбинчелер». 146 Псалом 4 стих хоостыра, ӱреен кізінің сағыстары саңай чох пол парчалар. Аннаңар Библия ӱреен кізіні тирең уйғудағы кізінең тиңнестірче (Иоанн 11:11).
Худай піске хынчатханын пілгені часхарча

Псалом 34:15-те чоохталча: «Иегованың * харахтары арығ чӱректіг кізілерзер кӧрчелер, аның хулахтары оларның, полызығ сурынып, аахтапчатханнарын исчелер». Пазырыс ол психологическай приём алай сағыстарны орынзар айландырып аларға оңдай ла нимес, ол піске Чайаачыбыснаң чағын палғалыстығ поларға полысча. Ол, тізең, піске сын часхарыс пир полар.
Пісті уғаа чахсы чуртас сағыпча

Сағын на кӧріңер, пістің ӱреен чағыннарыбыс ӱр ниместең чирде хатап чуртирлар! Библия аннаңар кӧп хати пасча. Ол туста хайдағ чуртас поларынаңар Библия піди пасча: «Худай оларның полған на харах чазын чызыбызар... ӧлім дее, ылғас таа, сыхтас таа паза ағырығлар даа чох пол парарлар» (Азых чоох 21:4).

Иегова Худайға киртінчеткеннер ӱреен чағыннарынаң хатап тоғазарларына киртінчелер. Анзы оларны часхарча. Ирі ӱреп парған Энн піди тіпче (олар 65 чыл чуртап салған полғаннар): «Ӱреен кізілер ирееленминчеткенін паза Худайның сағызында пар кізілер прайзы тірілерін мин Библиядаң пілчем. Ӱреен ирім сағысха кірзе, пу сағыстар мині часхарчалар. Олар мағаа мындағ уғаа аар чобалысты тобырарға полысчалар».

Мының алнындағы статьяларда чоохталған Тина піди тіпче: «Минің ирім, Тимо, ӱрееннең сығара Иегова мағаа полысча. Аның холын мин кӱннің сай кӧрчем. Мин тіріліс поларында ікінҷілебинчем. Ол ізеніс мағаа кӱс пирче. Тимонаң тоғазар кӱнні чидікпин сағыпчам».

Библияның молҷағларына киртінчеткен миллионнар, пу ипчілерӧк чіли, Библияа ізенерге чарир тіп чоохтап поларлар. Сірерге пу молҷағлар нымах тіп пілдірчелер, арса. Че сыныхтап кӧріңер: олар ізестіглер бе паза Библияның чӧптері тузалығлар ба? Аның чӧптерінең тузалан кӧрзер, олар чобалчатхан кізее иң чахсы часхарыс пирчеткенін постарың кӧрерзер.