Посты холда тудып оңнапчатхан кізі:

• хынған нимені сахтап аларға оңнапча,

• кӧңнін кӧзітпеске оңнапча,

• хынминчатхан тоғыс идерге оңнапча,

• пасха кізілерні позынаң пӧзік санапча.

Посты холда тударға ӱгреніп алған палалар оларға хынығ пілдірчеткен, че сынында хомай нимедең отказ поларға оңнирлар. Посты холда тударға ӱгреніп албаан палалар удаа:

• чабалланчалар,

• депрессияа пастырчалар,

• тамкы тартчалар, араға ісчелер алай наркотиктернең айғасчалар,

• кізінің хазиин ардатчатхан чиисті чіпчелер.

Хайди пір істезіг кӧзіт пирген: холда постарын тудып оңнаан палалар соонаң асхынах арах ағырғаннар, ахчаа хызылғаннар паза закон сайбааннар. Ол істезіге тӧстеніп, Пенсильваниядағы университеттің профессоры Анжела Дакворт мындағ сағысха килген: «Посты холда тутханы кізее хаҷан даа хомай итпинче».

«Чох» тирге ӱгреніңер паза сӧстерің хоостыра тудыныңар.

БИБЛЕЙСКАЙ ПРИНЦИП: «„Я“ тееніңер „я“ ползын, „чох“ тееніңер чох ползын. Аннаң пасха чоохтанғаны — Чабалдаң» (Матфей 5:37, НТ).

Пірееде палалар, іҷе-пабаларының тыстанызын сыныхтап, чон аразында даа сайлан сыхчалар. Андағ туста іҷе-пабазы паланың кӧңнін толдыр салза, ол пала пілче: сайланып, іҷе-пабазы чаратпаан нимені алып аларға оңдай пар.

Іҷе-пабалары, «чох» тіп алып, алған пӧгіннерін алыстырбинчатсалар, пала аарлығ сынны піліп алча: піс хынчатхан нимені полған на сай ал полбинчабыс. Позының киндезінде психолог Дэвид Уолш пасча: «Хайхастығ, че пу ӱгредігні піліп алған кізілер часкалығ арах кӧрінчелер. Піс палаларға прайлары оларның хынығыстарын толдырарға киректер тіп кӧзітчетсебіс, оларға хомай итчебіс» a.

Палаа сірер ам «чох» тіпчетсер, соонаң ол позы позына «чох» тирге оңнир. Кӧзідімге, наркотиктернең айғаспас, хоных хонғалахха половой чуртаснаң чуртабас, позына алай пасхаларына хомай идер киректерде араласпас.

Палаларны хомай даа, чахсы даа салтарлардаңар сағынарға ӱгредіңер.

БИБЛЕЙСКАЙ ПРИНЦИП: «Кізі позы таарыпчатхан нимені чыып алча» (Галат чиріндегілерге 6:7).

Пала пілерге кирек: ноо даа киректің салтарлары пар полча. Посты холда тудып оңнабинчатханы пір дее чахсы нимее ағылбинча. Кӧзідімге, сірернің оолғыңар, кӧңні тӱс парза, чабалланчатса, кізілер кӧбізін аннаң оортах тудынарлар. Че тыстанызы сыныхталчатхан тустарда позын холда тударға ӱгреніп алза алай пасхалары чоохтанчатса, оларға харығ полбин, тыстаныснаң исчетсе, кізілер андар тартыларлар. Палаа чарыда чоохтап пиріңер: посты холда тудып оңназа, ол часкалығ полар.

Приоритеттер турғызарға ӱгредіңер.

БИБЛЕЙСКАЙ ПРИНЦИП: «Хаҷан даа сынап аарлығ нимені таллаңар» (Филипптегілерге 1:10, НТ).

Посты холда тудып оңнапчатхан кізі хомай киректердең не хыйа тудынча нимес, че кирек полза, позы хынминчатхан даа киректерні итче. Паланы аарлығ киректерні иң пурун идерге ӱгредерге кирек. Кӧзідімге, ойнир алнында, ағаа уроктарны ит саларға кирек.

Чахсы кӧзідім полыңар.

БИБЛЕЙСКАЙ ПРИНЦИП: «Сірерні дее, минӧк сірерге иткен чіли, итсіннер тіп, сірерге кӧзідім артыс салдым» (Иоанн 13:15).

Сірерні тарындырчатсалар, хайди тудынчатханыңарны палалар сизінчелер. Посты холда тутханы чабаллан сыхханынаң хай-хай аарлығ полчатханын палаа кӧзіт пиріңер. Кӧзідімге, пала сірернің тыстанызыңарны сыныхтапчатса, хайди тудынчазар: чабаллан сыхчазар алай амыр халчазар?