Пыро тастапчатсаң, хомай сағыстарны паза хомзынысты позыдыбысчазың. Пыро тастааны пір дее ниме полбаан чіли тудынғаны алай хомзындырғанын нимее салбааны нимес.

БИБЛИЯДАҒЫ ПРИНЦИП: «Пірее кізінің піреезіне хоп полза, удур-тӧдір тыстанызыңар паза прай чӱрекнең пыроларыңны тастазыңар» (Колосстағыларға 3:13, НТ).

«Кізее сынап хынчатсаң, читпес хыриларын кӧрбинчезің, че ирің алай ипчің хайдағ кізі поларға кӱстенчеткенін кӧрчезің» (Эрон).

Хомзынысты чӱректе тутчатсабыс, анзы пістің хазиибысты уйан итче, чӱреебісті ағыртча паза хоныхты сайбапча.

«Пірсінде ирім мині тың хомзындыр салған, че соонаң пыросынған. Мин аның пырозын ӱр тастап полбаам. Ам аның ӱчӱн ачырғанчам. Сах андох пырозын тастаан ползам, хонығыбыс андадох амыр пол парарҷых» (Джулия).

ПОСТАРЫҢНЫ СЫНЫХТАП КӦРІҢЕР

Ирің алай ипчің хомзындыр салза, позыңны сурыбыс:

• «Арса, иртіре чӱрекке алчам?»

• «Минің алнымда ағаа пыросынарға хайди даа кирек пе? Алай хайығ салбин, анзын ундут саларға чарир ба?»

ХАДА ӰЗӰРІБІЗІҢЕР

• Удур-тӧдір пыро тастазарға нинҷе тус кирек?

• Пыроны табырах тастир ӱчӱн, ниме идерге кирек?

ЧӦПТЕР

• Ирің алай ипчің сині хомзындыр салза, аннаңар хомай сағынма.

• Піс тее удаа саба ниме ит салчабыс. Хомай хыриларын на нимес, че чахсы хыриларын кӧрерге кӱстен (Иаковтың 3:2).

«Ікӧлең пыролығ полза, пыро тастирға оой. „Мин пыролағ нимессім“ тіп сағынзаң, пыро тастирға оой нимес. Пыросынар паза пыро тастир ӱчӱн, поғдархабин, пазымнығ поларға кирек» (Кимберли).

БИБЛИЯДАҒЫ ПРИНЦИП: «Ыырласхан кізіңнең чолдох чаразып ал» (Матфей 5:25).