Кӱлӱк кізі тоғынааҷых пол чӧрбинче. Позына ахча тоғынып алар алай пасха кізілерге полыс пирер ӱчӱн, олаңай даа тоғыста тоғынарға тимде.

Хынчабыс па, хынминчабыс па, піске нандырығлығ кізі поларға кирек. Пу чир-чалбахта кізілер тоғынарға хынминчалар. Аннаңар кӱлӱк кізілер тоғыс чох хаҷан даа халбастар (Экклезиаст 3:13).

«Мин тоғызымны кӱстеніп итсем, позыма поғдархапчам паза мағаа ӧріністіг, аннаңар хайдағ даа тоғысты хынып итчем. Аның ӱчӱн кізілер мині улуғлапчалар» (Рейон).

БИБЛИЯДАҒЫ ПРИНЦИП: «Прай тоғыстың тузазы пар» (Притчи 14:23).

Тоғызыңа хынып аларға сағаа мындағ чӧптер полыс пирерлер.

Чахсы иткен тоғызыңа чӧпсінерге ӱгрен. Хайдағ даа тоғысты итчетсең, ибде алай пасха даа чирде тоғынчатсаң, тоғызыңны, прай чӱреең салып, ит. Пірее нимені чахсы итчетсең дее, хайди анзын аннаң даа чахсы паза табырах арах идерінеңер сағынып ал. Тоғызыңны нинҷе ус идерзің, ағаа анҷох ӧрінерзің.

БИБЛИЯДАҒЫ ПРИНЦИП: «Тоғызын ус итчеткен кізіні кӧргезің ме? Ол ханнарның алнында турар, олаңай кізілернің алнында турбас» (Притчи 22:29).

Пасхаларынаңар сағын. Сағаа пирілген тоғысты чахсы итсең, пасхаларына туза полар. Ибдегі тоғысты идерге полыссаң, іҷе-пабаңа ниик арах полар.

БИБЛИЯДАҒЫ ПРИНЦИП: «Пирчеткені алчатханынаң часкалығ» (Илҷілернің 20:35).

Кӧп арах ит. Пирілген тоғыстаң кӧп арах идерге кӱстен, андада син позың чуртазыңның ээзі поларзың. Ол тоғысты, пірее кізі кӱстеен ӱчӱн нимес, че позыңның кӧңніңнең иткезің нооза (Матфей 5:41).

БИБЛИЯДАҒЫ ПРИНЦИП: «Че синің чарадииң чох пір дее ниме идерге хынмадым: синің чахсы иткенің ирік чохтаң на полбазын, че пос кӧңнінең иділзін» (Филимонға 14).

Хыйға тудын. Тоғысха кӱлӱк кізілер арғаас ниместер, олох туста олар тоғысха иртіре сабылбинчалар. Олар кӱлӱк тоғынып аларға даа, чахсы тынанып аларға даа оңнапчалар.

БИБЛИЯДАҒЫ ПРИНЦИП: «Пір оос тынағ ікі оос аар тоғыстаң паза чилні сӱріс чӧргенінең хай-хай артых» (Экклезиаст 4:6).