Ізестіг кізее іҷе-пабазы, нанҷылары, пастыхтары ізенчелер. Ол турғысхан правилолар хоостыра тудынча, сӧзін тутча паза чойланминча.

Нинҷе ізестіг кізізің, сағаа анҷох пос чуртас пирілер.

«Іҷе-пабаң сағаа ізензіннер тіп хынчатсаң, олар сині кӧрчетселер дее, кӧрбинчетселер дее, син позың орта пӧгіннер алчатхан паза нандырығлығ кізі пол парғаныңны кӧзіт пирерге кирексің» (Сарахи).

БИБЛИЯДАҒЫ ПРИНЦИП: «Постарыңны сынаңар» (2 Коринфтегілерге 13:5).

Сағаа ізенминібісселер, пазох ізензіннер паза кӧп арах пос чуртас пирзіннер тіп хынчатсаң, пу чӧптернең тузалан кӧр.

Чойланма. Чойланзаң, сағаа пір дее кізі киртінмес. Алҷаастарыңнаңар даа чойланмин чоохтазаң, кізілер сағаа уламох ізенерлер.

«Прай ниме чахсы полза, чойланмасха оой. Хомай сариларыңны іле кӧзітчеткен алҷаастарыңның ӱчӱн пыросынзаң, сині ізестіг кізее санирлар» (Кайман).

БИБЛИЯДАҒЫ ПРИНЦИП: «Піс хаҷан даа орта идерге кӱстенчебіс» (Еврейлерге 13:18).

Нандырығлығ кізі пол. США-да кізее тоғысха кіріп аларға полысчатхан специалисттернің 78 проценті піди санапча: «Пастыхтар опыттары чох кізілернің аразында нандырығлығ кізілерні тоғысха аларға хынчалар». Нандырығлығ кізі ползаң, анзы сағаа чуртас тооза туза полар.

«Ибдегі тоғысты, іҷемнең пабам мағаа идерге чоохтабинчатсалар даа, позым итчетсем, олар ӧрінчелер. Мин сыбыра нандырығлығ кізі поларға кӱстенчетсем, олар мағаа уламох ізенчелер» (Сара).

БИБЛИЯДАҒЫ ПРИНЦИП: «Пілчем нооза мин чоохтааннаң син артых таа идерзің» (Филимонға 21).

Тыстаныстығ пол. Синің ӧс парғаның прайзына кӧрінче, че синің нандырығлығ паза ізестіг кізі полчатханыңны піліп алар ӱчӱн, тус кирек.

«Пір ле хати орта тудынған ӱчӱн іҷе-пабаң паза пасха кізілер сағаа ізен сыхпастар. Сағаа ізензіннер тіп хынчатсаң, кӱннің сай ізестіг тудынарға кирексің» (Брэндон).

БИБЛИЯДАҒЫ ПРИНЦИП: «Тоозылбас тыстаныстығ пол парыңар» (Колосстағыларға 3:12).