Библияның кӧрізі

«Экстремальнай спорт». Чуртасты хорғысха суғарға кирек пе?

«АМҒЫ ТУСТА КІЗІЛЕР ПОСТАРЫ САМОЛЕТТАРДАҢ СЕГІРЧЕЛЕР, ТАҒ ӰСТӰНЕҢ ПАҒҶА ТӰСЧЕЛЕР, ВОДОПАДТАР ХЫРИНДА БАЙДАРКАЛАРНАҢ ПАЗА СУҒ АЛТЫНДА АКУЛАЛАРНАҢ ХАДА ЧӰС ЧӦРЧЕЛЕР» («WILLOW GLEN RESIDENT» ТІП ГАЗЕТА).

ІДИ экстремальнай спорттаңар пазылча. Пӱӱн кӧп кізі парашютнаң атыхча, ледниктерге сыхча, дельтапланнарнаң учухча, пӧзік орыннардаң атыхча (BASE jumping) *. Анзы прай чир-чалбах хорғыс ағылчатхан нимелернең айғазарға хынчатханын кӧзітче. Кізілер, чікім хайаларҷа, пӧзік тағларҷа сноуборднаң чылып, тағҷа чӧрчеткен велосипедтернең чӧріп, скейтбордтарнаң паза роликовай конькинең катайланып паза пӧзік орыннардаң атығып, кізі ит полбас нимелерні идерге кӱстенчелер. Хайди «Тайм» журнал пасча, «экстремальнай» алай анда араласчатханнарның чуртастарын хорғысха сухчатхан спортнаң кӧптең кӧп кізі айғазарға хынча. Анзы миллионнар «хорғыс, мастерство паза кізі позы хорыхчатханы тоғасчатхан орынға чидіп аларға кӱстенчеткенін кӧзітче. Іди олаңай даа кізілерге, профессиональнай спортсменнерге дее кізі ит полбас ниме ит полчабыс тіп пілдірче».

Экстремальнай спортнаң айғазарға хынчатханнар аарлығ тӧлепчелер. Олаңай ла спортты экстремальнай идіп алып, киненге кір парчалар. 1997 чылда США-ғы больницаларға кір парған скейтерлернің саны 33 азыра процентке, сноубордерлернің — 31 процентке, скалолазтарның — 20 процентке ӧс парған. Спорттың пасха видтерінде кирек аннаң даа хомай. Анзын экстремальнай спортнаң айғасчатханнарның кӧптең кӧп ӧлчеткені кӧзітче. Андағ спортха хынчатханнар ол спорт хорғыстығ полчатханын пілчелер. Пір горнолыжник-экстремал ипчі тіпче: «Мин ӧлімнеңер сыбыра сағынчам». Ідӧк пір профессиональнай сноубордер піди тіпче: «Киненге кірбинчетсең, син кӱстенминчезің». Аның сӧстері экстремалларның кӧрізін кӧзітче.

Хайди христианнарға андағ спортха хайарға? Экстремальнай спортнаң айғазарға ба, чох па пӧгін аларға Библия хайди полыс пирер? Пу сурығларға нандырығлар піліп алар ӱчӱн, Худайның хараанда чуртас нинҷе ах-арығ полчатханын піліп алаалар.

Чуртасха Худай хайди кӧрче?

Библия Иегова чуртас пирче тіп чоохтапча (Псалом 35:10). Ол кізілерні чайап салған на нимес, че пісті чуртасха ӧрінзіннер тіп, піске кирек нимелерні прай пирген (Псалом 138:14; Илҷілернің 14:16, 17; 17:24—28). Аннаңар Худай пістең аның сыйыхтарынаң сибер тудынзыннар тіп сағыпча. Аны піліп аларға Израиль чонына пирілген принциптер паза чахығлар полысчалар.

Моисей чахии хоостыра кізілернің чуртастарын арачылирға кирек полған. Кемнің-де ӱчӱн пірее кізі ӧл парза паза ол аның чуртазын ал халарға пір дее ниме итпеен полза, ол аның ӧлімінде пыролығ полған. Кӧзідімге, наа тураның ээзіне тура хырының ибіре пӧзік нимес сиден алай перила идібізерге кирек полған. Сиден чох тура ӱстӱнең кізі тӱс парып, ӧл парған полза, ол тураның ээзі аның ӧлімінде пыролығ поларҷых (Второзаконие 22:8). Пуға кізіні, сӱсклеп, ӧдір салза, ол пуғаның ээзі пыролығ тіп саналбаҷаң. Че пуғаның ээзіне синің пуғаң сӱзечі тіп чоохтаан ползалар, ол, тізең, малын чахсы кӧрбеен полза, андағ пуға кізіні, сӱсклеп, ӧдір салза, ээзі пыролығ поларҷых. Аны ӧлімге дее чарғылабызарҷыхтар (Исход 21:28, 29). Иегованың хараанда чуртас уғаа аарлығ, аннаңар аның Чахиинда чуртасты арачылирға кирек полчатханы кӧрінче.

Пу принциптер хоостыра постың даа чуртазын хорғысха суғарға чарабас полчатханын Худайға киртістіг нымысчылар пілгеннер. Библияда пір кӧзідім пар: Давид Вифлеемдегі хутухтаң пірее кізі мағаа суғ ағыл пирген полза тіп чоохтаныбысхан. Ол туста Вифлеем филистимляннарның холында полған. Давидтің сурынызын ис салып, аның ӱс чааҷызы, филистимляннарнаң чаалазып ала, Вифлеемдегі хутухтаң суғ алып алып, Давидке ағыл пиргеннер. Давид анзына хайди хайған? Давид ол суғны, іспин, чирзер тӧгібіскен. Ол теен: «Хан Худайым, мағаа андағ ниме идерге пирбе! Минің ӱчӱн чуртастарын салған иреннернің ханын ізербін ме?! Олар, постарының чуртастарын минің ӱчӱн хорғысха суғып, мағаа суғ ағыл пиргеннер нооза» (1 Паралипоменон 11:17—19). Давид позының хынығыстарының ӱчӱн пасха кізінің чуртазын хорғысха суғарға чарабас тіп санаан.

Пірсінде Дьявол Иисусты кӧспекте сыныхтаан. Ол ағаа, ангеллер сині арачылап поларлар тіп, храмның хырынаң чирзер сегірібізерге чоохтаан. Иисус ағаа нандырған: «Худайыңны сынаба» (Матфей 4:5—7). Давид тее, Иисус таа пілгеннер: сынап ла кирек полбаза, Худай кізінің чуртазын хорғысха суғарға чаратпинча.

Пу кӧзідімнер сурығлар сығарчалар: хаҷан олаңай спорт экстремальнай пол парча? Олаңай даа хорғыстығ нимес тынағны хорғыстығ идіп аларға чарир, аннаңар хаҷан тохтабызарға чарир?

Чуртасты хорғысха суғарға кирек пе?

Пу сурыға нандырығ піліп алар ӱчӱн, піс идерге сағынчатхан киректі сынап кӧрерге кирек. Кӧзідімге, посха мындағ сурығлар турғызарға: пу спортта хайди удаа киненнер пол парчалар? Ол спортта киненге кір парбас иде тимненіп алғам ма паза арачылаҷаң тиріглерім пар ба? Аңдарыл парзам, саба сегірібіссем алай страховать полҷаң нимелер полыспин салзалар, мин хайди пол парам? Олаңай ла аңдарыл парам ма, тың пиртін парам ма алай ӧл тее халам ма?

Сын христианин, ағаа хынығ ла ползын тіп, чуртазын хорғысха сухчатса, аның Иегованаң аарлығ палғалызы сайбалча. Ідӧк ағаа ӧмеде нандырығлығ тоғыстар пирілбес (1 Тимофейге 3:2, 8—10; 4:12; Титке 2:6—8). Ниме піліп алдыбыс? Христианнарға, тынанчатса даа, Чайаачы чуртасты ах-арыға санапчатханын ундутпасха кирек.

[Сноска]