Нанҷы нимес, ыырҷы

Син ол «нанҷыңны» кічігдең сығара пілчезің. Аннаң хада син улуғ кізее тӧӧйзің тіп пілдірген паза синің пір частығ кізілернең табырах нанҷылас сыхчаңзың. Ол сағаа стрессті тобырып аларға сыбыра «полысчаң». Ідӧк син ағаа ізенерге кӧнік парғазың.

Нинҷе-де тус пазынаң ол «нанҷың» андағ чахсы нанҷы полбаандыр тіп піліп алғазың. Пасхаларының кӧңніне кірбезе дее, ол аны позыңнаң хада сыбыра ал чӧрерге киректепче. Аннаң хада син позыңны улуғ кізее санаан ползаң даа, синің хазииң аның ӱчӱн уйан пол парған. Ағаа хоза, ол синің ахчаңны оғырлапча.

Ӱр ниместе син аннаң нанҷыласпиныбызарға кӱстенгезің. Че ол синнең аннаң андар нанҷылазарға хынча. Син аның хулы пол парғазың паза аннаң нанҷылас сыхханыңа ачырғанчазың.

АНДАҒ «ынархастаңар» тамкы тартчатхан кӧп кізі чоохтап полар. 50 чыл тамкы тартхан Эрлин чоохтапча: «Тамкы мағаа кізілердеңӧк чағын. Ол минің киртістіг, пірееде чалғыс ла нанҷым полған». Че нинҷе-де тус пазынаң Эрлин піліп алған: тамкы нанҷы нимес, че кӧйтік ыырҷы. Статья алнындағы кӧзідім Эрлинге уғаа килісче. Че Эрлин тамкы тартханы кізіні кірлепчеткенін паза Худайның хараанда чазых полчатханын піліп алғанда, ол хомай кӧнігісті тастабысхан (2 Коринфтегілерге 7:1).

Худайға киртініс Фрэнкті ідӧк тамкы тастирға кӧӧктірген. Халғанҷы тамкыны тартып алған соонда, пір-ікі кӱн пазынаң, туразының кірлезінің алтынзар кіріп, чардылар аразына тӱс парған окуроктарны тілеп сыххан. Фрэнк сағысха кирче: «Ол туста хайдағ аар кирекке кір парғанымны піліп алғам: мин хайдағ-да окуроктарның ӱчӱн палчахта імектеп чӧрчем!.. Мин позыма чиркенгем. Аның соонда мин тамкы саңай тастабысхам».

Ноға кізі тамкының хулы пол парча? Учёнайлар нинҷе-де сылтағ адапчалар: 1) кізі тамкаа, наркотиктерге чіли, кӧнік парча; 2) никотин кізінің миизіне читі секундаа чит парча; 3) тамкы тартханы кізінің чуртазының чардығы пол парча: кізі чіпчетсе, ісчетсе, кізілернең чоохтасчатса паза пасха даа нимелер итчетсе, тамкы тартча, стрессті тобырып алар ӱчӱн, ідӧк тамкы тартча.

Эрлиннің паза Фрэнктің кӧзідімнері кӧзітчелер: пу чабал кӧнігісті тобырып аларға оңдай пар. Тамкы тастирға хынчатсар, мының соондағы статьялар сірерге анзын идерге паза наа чуртас пастирға полыс пирерлер.