Полызығ тілеңер
Полызығ тілеңер
«Кем-де пір кізее сыдап паритса, ікӧлең ағаа сыдирлар» (Экклезиаст 4:12).
ХАЙДАҒ даа ыырҷыны, хырибыста киртістіг нанҷылар полза, чиңіп аларға хай-хай оой полар. Тамкы тастабызар ӱчӱн, сірерге прай чӱрекнең полыс пирерге паза тыстаныснаң хабас пирерге хынчатхан туғаннарыңзар паза нанҷыларыңзар айланарға кирек.
Таныстарыңның аразында ол кӧнігісті тобыр полған, сірерге айап полар паза полыс полар кізі пар ба? Даниядағы христианин Торбен тіпче: «Пасхаларының полызии чох мин тамкы тастап полбасчыхсым». Индиядағы Эйбрахам піди тіпче: «Мағаа сӧбіремнің паза христианнар полчатхан нанҷыларымның улуғ хыныстары полыс пирген». Че пірееде, туғаннарның паза нанҷыларның на полызии асхынах полча.
«Мин 27 чыл тамкы тартхам, — Бхагвандас ирен тіпче, — че Библия кірліг кӧнігістерні хырт кӧрчеткенін піліп алғамда, тамкы тартарын тастабызарға пӧгін алғам. Мин тамкыны асхынахтаң асхынах тарт сыххам. Тамкы тартчатхан нанҷыларыма тоғаспин сыххам. Хайди аны тастирға чӧп тілеем, че пір дее ниме полыспаан. Пірсінде хараазын мин Иегова Худайға, мағаа полыс пирзін тіп, прай чӱреемні ас пиргем. Іди мин тамкы тартарын тастабысхам!»
Паза пір аарлығ сағыс: сірер урунар сидіктерге тимненіп алыңар. Ол сидіктердеңер мының соондағы статьяда чоох парар.
[Рамка]
ИМНЕР КИРЕК ПЕ?
Амғы туста тамкы тартарын тастирға полысчатхан имнернең, кӧзідімге, никотиновай пластырьнаң, кӧп кізі тузаланча. Оларны сатханы миллирдтар ахча ағылча. Че оларнаң тузаланар алнында, пу сурығларға нандырығлар таап алыңар.
Чахсы сарилары хайдағ? Имнер хоостыра «симптом отмены» нымзах арах иртче тіп саналча. Че ол имнер ӱр тус полысчатханында кӧп кізі ікінҷілепче.
Хомай сарилары хайдағ? Пірее имнер кізінің хазиин ардатчалар, кӧзідімге, кізінің кӧңні айланча, депрессия пол сыхча паза ӧлінібізерге сағыстар кір сыхчалар. Ундутпасха кирек, никотиннің орнына ағааох тӧӧй нименең тузаланчалар. Кізінің хазии ардапча паза никотинге кӧнігізі халча.
Пасха оңдайлар пар ба? Пір опрос кӧзітче: тамкы тартарын тастабысханнарның 88 проценті имнер чох тамкы тартарын тастап алғаннар.