Тідімніг полыңар

«Пос посты кӧӧктіргені кӧп кізее тамкы тастабызарға полыс пирген» («Stop Smoking Now!»).

ПАСХА сӧстернең чоохтаза, тамкы тастабызарға тың хынарға кирексің. Хайди анзында тідімніг поларға? Иң пурнада, анзы сағаа хайдағ туза ағыларынаңар сағын.

Ахча хорадылбас. Пір кӱнде пір пачка тартыбысчатсар, пір чылға уғаа кӧп ахча хорадыл парча. «Тамкаа нинҷе ахча парчатханын хаҷан даа сағынмаам» (Гиану, Непал).

Чуртазыңар хай-хай ӧріністіг пол парар. «Тамкы тастабысхан соонда ла, сынап чуртап сыххам. Чуртазым кӱннең кӱнге чахсыдаң чахсы пол сыххан» (Регина, ЮАР). Кізі тамкы тастабысса, чиистің тадиин піл сыхча, чыс піл сыхча, кӱзі хозыл парча паза тастындағы кӧрімі сіліг арах пол парча.

Хазииңар чахсы арах пол парар. «Чииттер дее, улуғлар даа, ипчілер дее, ир кізілер дее тамкы тастаан соонда, хазыхтары чахсы арах пол парғанын сизінгеннер» (Центры по контролю и профилактике заболеваний, США).

Постарыңны улуғлап сығарзар. «Мин тамкының хулы поларға хынмаам паза ит-сӧӧгімнің ээзі поларға хынғам, аннаңар тамкы тастабысхам» (Хеннинг, Дания).

Анзы чағыннарыңа туза полар. «Тамкы тартханы... ибіркі кізілерге ӱрег ағылча. [...] Істезіглер кӧзітчелер: тамкының ызынаң тынған ӱчӱн чыл сай муңар кізілер, чӱректері ағырып паза ӧкпелерінде рак полып, ӧл парчалар» (Американское онкологическое общество).

Чайаачыңарны ӧріндірерзер. «Хынғаннарым... ит-ханыбыста паза худыбыста пар чабал нимедең арығланып алааңар» (2 Коринфтегілерге 7:1). «Постарыңны Худайға пир салыңар. Худайның кӧңніне чарас тіріг, ах-арығ тайығ иткені ползын ол» (Римдегілерге 12:1).

«Тамкы тартханы кізінің ит-сӧӧгін кірлепчеткенін паза анзы Худайның кӧңніне кірбинчеткенін піліп алғамда, мин тамкы тастабызарға сағыныбысхам» (Сильвия, Испания).

Че хынғаны ла удаа асхынах. Пасха кізілернің, оларның санында туғаннарның паза нанҷыларның, полызии кирек полар. Хайди олар полыс поларлар?