Сірерні кічігде нимее ӱгреткеннер?

Мин 1979 чылда Піріккен Штаттарда тӧреем. Мағаа ӱс час полғанда, пабамнаң іҷем чарылыс парғаннар. Іҷем мині иудейлер кибірлерінің хоостыра ӱгредіп ӧскірген, аннаңар ол мині ешивазар, иудейлер школазынзар, пирібіскен. Мағаа 7 час тол парғанда, піс пір чылға Израильзер парыбысхабыс, анда мин кибуцта — аал хонии коммуназында — школаа чӧргем. Анаң піс Мексиказар чуртирға парыбысхабыс.

Піс чуртапчатхан орында синагога чох полған полза даа, мин иудейлер кибірлерін тудынҷаң полғам: субботада свечалар ӧртеҷеңмін, Тораны хығырҷаңмын паза сиддур — пазырыс чыындызы — пастыра пазырҷаңмын. Школада хада ӱгренчеткен палаларға минің религиям иң пурунғы паза сын религия тіп чоохтаҷаң полғам. Иисус Христостың чуртазынаңар паза ӱгредіглерінеңер чоохталчатхан Наа Молҷағны мин хаҷан даа хығырбаам. Іҷем, мині пасха религияа тартыл парыбызар тіп, аны хығырарға чаратпаҷаң.

Ноға сірер Наа Молҷағны хығырып аларға пӧгін алғазар?

17 частағда, аннаң андар ӱгренер ӱчӱн, мин Піріккен Штаттарзар айланғам. Пір таныс: «Иисус Христос чох чуртаста сын смысл чох полар»,— теен.

— Чуртаста астых парған кізілер ле Иисусха киртінчелер,— нандырғам мин.

— Син Наа Молҷағны хығыр кӧргезің ме?

— Чох.

— Андағда син пілбинчеткен нимедеңер чоохтапчазың! Андағ нимес пе?

Пілбинчеткен нимедеңер чоохтапчатхан кізілерні мин алығлар тіп санаҷаң полғам. Аннаңар уйат парып, аның Библиязын алып алып, Наа Молҷағны хығыр сыххам.

Хығырған ниме сірерге хайди влиять полған?

Наа Молҷағны еврейлер пасханын піліп алып, уғаа хайхап парғам. Нинҷе кӧп хығырғам, анҷох чахсы піліп одырғам: Иисус чахсы, пазымнығ еврей полған, кізілерге полызарға хынған паза оларның сылтаанда пайирға кӱстенмеен. Мин Библиотекада аннаңар нинҷе-де кинде алып алғам. Че оларның пірдеезі мині Иисус Мессий полчатханына киртіндір полбаан. Пірее кинделерде Иисусты Худай тіп адааннар, че мин анзын саңай саба сағыс тіп санаам. Кӧріңер: андағда Иисус кемге пазырған — позына ба? Ағаа хоза, Иисус ӧл парған, че Библияда Худайдаңар чоохталча: «Син хаҷан даа ӧлбессің» *.

Сурығларыңа нандырығлар хайди таап алғазар?

Сын позы позына тоғырланминча, мин, тізең, аны таап аларға пӧгін алғам. Мин пастағызын на сиддур чох, прай чӱрекнең, ылғап ала, Худайға пазырғам. Пазырарын тоосхалах таа полғам, ізігімні тохлатханнар. Иегованың киречілері полтыр. Олар мағаа Библия ӱгренҷең пособие пиргеннер. Оларның ӱгредіглері Библияда тӧстелчеткеніне киртініп аларға мағаа ол публикация паза Киречілернең чоохтасханы полыс пирген. Кӧзідімге, олар Иисус Христос Троицаның чардығы нимес, че «Худай Оолғы» * паза «Худай чайаан нимелернің Пазы» * тіп ӱгретчелер.

Ӱр ниместең мин Мексиказар айланғам. Анда мин Иегованың киречілерінең Мессийдеңер ухаанҷыластарны аннаң андар ӱгренгем. Мессийдеңер анҷа кӧп ухаанҷылас полтыр! Че мин аннаң андар ікінҷілепчеткем. Мин сағынҷаң полғам: «Ол ухаанҷыластар Иисуста ла толғаннар ба? Алай ол позының рольын уғаа чахсы ойнабысхан артист полған ма?»

Сірернің кӧрістеріңні ниме алыстырыбысхан?

Киречілер мағаа пу ухаанҷыластар минде тол парды тіп полбас ухаанҷыластар кӧзіт пиргеннер. Кӧзідімге, Иисус тӧрирінең 700 чыл алнында Михей ухаанҷы Мессий Вифлеем * саарда тӧрир тіп чоохтаан. Хайда тӧрирін кізі хайди таллап полар? Исаия Мессийні, сайбағҷы чіли, казнить поларлар, че аны пайларнаң * хада чыып саларлар тіп пасхан. Прай пу ухаанҷыластар Иисуста тол парғаннар.

Мессий хайдағ тӧлдең сығарынаңар ухаанчыластар мині ідӧк киртіндіргеннер. Библияда Мессий Давид * ханның тӧлі полар тіп пазылча. Пурунғы иудейлер родословнай пічіктерін ибде паза хазна архивтерінде чығҷаңнар. Иисус Давидтің тӧлінең сыхпаан полза, аның ыырҷылары аннаңар прай чирде сығдырат чӧрерҷіктер! Че Иисус Давидтің тӧлі полғанын ыырҷылар даа чахсы пілгеннер. Чон даа Иисусты «Давидтің тӧлі» * тіп адаан.

П. э. 70 чылда, Иисус ӱрееннең 37 чыл ирт парғанда, Рим чааҷылары Иерусалимні иңзерібіскенде, родословнай пічіктер чіт парғаннар алай оларны чох идібіскеннер. Аннаңар Мессий п. э. 70 чыл алнында килерге кирек полған. Аның соонда пір дее кізі Давидтің тӧлі полчатханын киречілеп полбасчых.

Прай пу пілістер сірерге хайди теелгеннер?

Второзаконие 18:18, 19-та Худай Израильде Моисейге тӧӧй ухаанҷы турғыс салар тіп пазылча. Худай теен: «Пірее кізі, ол ухаанҷы минің адымнаң чоохтаан сӧстерімні испезе, минің алнымда нандырығ тудар». Мин прай Библияны тирең істезіп, Назареттең сыххан Иисус ол ухаанҷы полчатханына киртін сыххам.