Постарыңның олған тузынаңар чоохтап пиріңер.

Мағаа тоғыс час полғанда, пістің сӧбіре Испаниядаң Франциязар кӧс килген. Іҷемнең пабам католиктер полғаннар, мин, тізең, 16 частығда Худайға киртінмин сыххам. Религия чуртастаң оортах тіп сағынғам. Худай чох полза, чуртас хайдаң килген тіп сурзалар, мин нандырҷам: «Учёнайлар анзына нандырығ пілбинчелер, че олар нандырығ хайди даа таап аларлар».

Ноға сірер пӱгӱрек ағырығларын істес сыххазар?

Мин Францияда Монпелье университеттегі медицинскай факультетте ӱгренгем. Профессор нефрологиянаң айғазарға чоохтаан. Медицинаның ол облазы пӱгӱректің пӱдізін, аның хайди тоғынчатханын паза аның ағырығларын істесче. Ол тоғысха істезіг паза имнег кірген. Мин анзын идерге уғаа тың хынғам. 1990 чылда рекомбинантнай эритропоэтин чіліңні кӧп арах эритроциттер идер иде тоғындырчатханын істес сыххам. Анзынаң кізілер имнирінде чарир ба тіп сағынғабыс. Ол туста анзы науканың наа хыри полған.

Сірерні Худайдаңар сағынарға ниме кӧӧктірген?

1979 чылда минің ирім, Флореаль, Библияны Иегованың киречілерінең ӱгрен сыххан. Че мин кічігдӧк религияа киртінмин сыххам, аннаңар Библияны ӱгренерге мағаа хынығ полбаан. Ирім, палаларым Иегованың киречілері пол парғаннар. Нанҷыларыбыстың кӧбізі ідӧк Иегованың киречілері полғаннар. Оларның пірсі Патрисья мағаа пазырарға чӧп пирген. Ол теен: «Тигірде пір дее ниме чох полза, син пір дее ниме чідірбинчезің, че пар полза, ниме пол парарын кӧрерзің». Соонаң мин чуртастың смыслынаңар сағын сыххамда, аның сӧстерін сағысха киргем. Ноо нимее чуртапчатханыбысты піліп алар ӱчӱн, пазыр сыххам.

Ноға чуртастың смыслынаңар сағын сыххазар?

Нью-Йорктағы Всемирнай торговай центрдегі теракт соонда, ноға тилекейде анҷа кӧп чабал киректер иділче тіп сағын сыххам. Мин сағынғам: «Религиознай экстремизм пістің алнынзархы чуртазыбысха хорғыс ағылча. Че минің нанҷыларым, Иегованың киречілері, амырға хынчалар, олар экстремисттер ниместер. Олар Библия хоостыра чуртапчалар. Арса, ниме анда чоохталчатханын мағаа позыма піліп аларға кирек». Аннаңар мин Библияны хығыр сыххам.

Сірерге, имҷее, Чайаачаа киртініп аларға аар полған ма?

Чох, аар полбаан. Мині ит-сӧӧгібістің пӱдізі тың хайхатхан. Кӧзідімге, пістің пӱгӱректерібіс. Олар хандағы эритроциттернің саны нинҷе поларға кирек тіп сыныхтапчалар. Анзы тың хайхатча.

Ноға сірер аннаңар чоохтапчазар?

Сірер пілче поларзар, эритроциттер кислородты тамырларҷа ал чӧрчелер. Кӧп хан чідір салзар алай пӧзік чирзер сыхсар, кислород читпинчеткенін сизінерзер. Че пістің пӱгӱректерібісте кислороднай рецепторлар пар. Ханда кислород читпинчеткенін сизін салзалар, олар сах андох эритропоэтин ит сыхчалар. Іди эритропоэтин ханда чӱзер хати кӧп пол парча. Эритропоэтин чіліңні кӧп арах эритроциттер идер иде тоғындырча, эритроциттер, тізең, кӧп арах кислород апарчалар. Ол уғаа хайхастығ процесс! Худай ла андағ удур-тӧдір палғалыстығ системаны чайап поларын піліп алар алнында, мин ол процессті она́р чыллар істескем.

Сірерні Библия нименең хайхатхан?

Мин кӧп тархын кинделерін паза саблығ романнарны хығырған полғам, че Библияны хығырып пастапчатхандох, ол саңай пасха кинде полғанын піліп алғам. Аның чӧптері андағ тузалығ, ікінҷілес чоғыл, олар ӧӧртін пирілгеннер. Мағаа Иисустың качестволары хайхастығ полған. Ол сынап чуртаанын піліп алғам. Аның пістің осхас чувстволар, нанҷылар полғаннар. Мин Иегованың киречілерінің пічіктерін хығырарға хынмаам, аннаңар Библиядаңар сурығ полза, мин нандырығларны аймах-пасха энциклопедияларда паза справочниктерде тілеҷең полғам.

Хайдағ сурығларға нандырығлар тілеезер?

Минің аймах-пасха сурығлар полҷаң, че Библияда Иисустың кіреске тӱскен чылын хап-орта чоохталғаны мағаа уғаа хайхастығ полған. Анда Перс ханы Артаксеркс 20-ҷі чыл устапчатханнаң Иисус Мессий пол парғанҷа, нинҷе чыл ирт парар хап-орта чоохталған *. Мин істезіглер апарарға кӧнік парғам, ол минің тоғызым нооза. Аннаңар, Артаксеркс устаан паза Иисус нымысчыланған чылларны піліп алар ӱчӱн, мин тархын кинделерінзер айланғам. Анзы мині Библияның ухаанҷылазы хап-орта тол парғанын піліп аларға полыс пирген. Худайдаң пасха іди пірдеезі ухаанҷылап полбасчых.