Чоохтап пиріңер: ноға сірер эволюцияа киртінгезер?

Католиктер сӧбірезінде ӧскен ползам даа, религияда кӧмес ікінҷілеем. Худай кізілерні адта иреелепчеткеніне киртінерге аар полған. Университетте чуртасты Худай чайабаан, ол эволюция пастыра пол парған тіп ӱгреткеннер. Ол теория киречілестерде тӧстелген тіп сағынып, ағаа киртін сыххам. Ағаа хоза, минің религиям эволюция полбаан тіп ӱгретпеен, Худай, прай тіріг нимелерні чайаанда, эволюциянаң тузаланған тіп ӱгреткен.

Ноға Библиязар айланғазар?

Минің ипчім, Сюзанна, Иегованың киречілерінең Библияны ӱгрен сыххан. Олар Библиядаң Худай кізілерні адтағы отта ӧртебинчеткенін киречілепчеткен стихтарны хығыр пиргеннер *. Ідӧк олар Худайның чирні рай ит саларға молҷапчатханын кӧзіт пиргеннер *. Піс піліп алғабыс: орта сағысха тоғырланминчатхан религиознай ӱгредіг пар. 1989 чылда минзер Иегованың киречізі Ник кил сыххан. Пірсінде кізі хайдаң сыхханынаңар паза кізінің ит-сӧӧгі хайхастығ пӱткеннеңер чоохтасхабыс. Еврейлерге 3:4-те пазылған сӧстерні хығырып алып, тың хайхап парғам. Анда пазылча: «Ноо даа тураны кем-де пӱдір салған. Худай, тізең, прай ниме пӱдір салған».

Медицинаны пілгені сірерге Худай пісті чайаанына киртініп аларға полыс пирген ме?

Я. Кӧзідімге, кізінің ит-сӧӧгінің позы позын имнеп оңнапчатханы. Ікінҷілес чоғыл, анзы Худай пісті чайаанын киречілепче. Палығлатхан орын удур-тӧдір палғалыстығ нинҷе-де стадияа пӱтче. Анзы мағаа мин, хирург полып, ағырығ кізінің организміне имненерге ле полысханымны кӧзітче.

Палығ хайди пӱтчеткенін чоохтап пиріңер.

Палығлатхан соонда нинҷе-де секунда аразына организм хан тохтадарға кӱстен сыхча. Анзы пастағы стадия. Чоохтирға кирек, пістің хан тамырларының узуны 100 000-ҷа километр. Аның позы позын тыхтап оңнапчатханына хайдағ даа инженер-сантехник атархир.

Ікінҷі стадияда чи ниме полча?

Нинҷе-де ле часха хан тохтап парча. Анаң воспаление пасталыбысча. Ол туста пістің организмде кӧп аймах-пасха процесстер полчалар. Хан тохтадар ӱчӱн, ніскеҷек пол парған тамырлар чоон арах пол сыхчалар. Аның сылтаанда палығлатхан орынзар хан кӧп килче. Палығда белоктарға пай сууғас ниме чыыл парча, аннаңар палығ сіс парча. Ол сууғас нимеде токсиннер изілчелер паза ол талалған клеткаларны организмнең сығарча. Полған на этапта миллиона́р аймах-пасха молекулалар паза клеткалар пӱтчелер. Пірее процесстер тоозылар алнында, аның соондағы процесске пасталарға сағба пирчелер.

Аннаң андар ниме полча?

Ікі-ӱс кӱн пазынаң пістің организм палығ пӱдірҷең материал ит сыхча. Іди палығ имнеҷең ӱзінҷі стадия пасталча, ікіҷе неделя пазынаң ол стадия иң чахсы тоғын сыхча. Палығ ӱстӱне тартыл парған клеткалар палығ істіне кіріп, чарыл сыхчалар. Уғаа ніскеҷек хан тамырлары палығ істінзер ӧс сыхчалар. Іди хан палығдаң кирек чох нимелерні сығарча паза палығ пӱдірерге кирек нимелерні ағылча. Олох туста пасха олаңай нимес процесстер полчалар. Ол процессте палығны чыы тартарға полысчатхан клеткалар пӱтчелер.

Уғаа кӧп тоғыс иділчеттір! Палығ нинҷе ӱр пӱтче?

Пірееде палығ пӱткенҷе нинҷе-де ай ирт парча. Сынған сӧӧктер сынмаан сӧӧкке тӧӧй пик пол парчалар. Наа палығдағы чіптер орнына пасха пик арах клеткалар пӱтчелер. Палығлар пӱдірҷең хайхастығ процесс, пасхох процесстер чіли, кізінің организмінде азынада турғызылған программа хоостыра тоғынча.

Сірерні хайхатхан пірее кӧзідім чоохтап пирерзер бе?

Я. Пірсінде піссер улуғ аварияа кір парған 16 частығ хысты ағыл килгеннер. Ол уғаа хомай полған: аның тилеені чарыл парған паза хан істінзер ахчатхан. Мының алнында тилеенні тағырыбызарға алай ал тастабызарға операция идерҷікпіс. Пӱӱнгі имҷілер организм позы позын имнеп поларына ізенчелер. Аннаңар піс хан асхынах пол парбазын тіп, имнер урғабыс паза инфекциянаң, анемиянаң харбасхабыс. Нинҷе-де неделя пазынаң снимок иткебіс, хыстың тилеені пӱт партыр! Кізінің ит-сӧӧгі позы позын имнеп полчатханына сыбыра хайхапчам. Анзы пісті Худай чайаанына киртінізімні уламох тыытча.

Ноға Иегованың киречілеріне хын сыххазар?

Олар хаҷан даа ачых чарых полғаннар паза минің сурығларыма Библия хоостыра нандырғаннар. Оларның Худайдаңар пасха кізілерге махачы чоохтапчатханнары мағаа уғаа хайхастығ полған.

Сірер Иегованың киречізі пол парғазар. Анзы тоғызыңарға хайди влиять полған?

Уғаа чахсы. Иң пурнада, анзы мағаа эмоциональнай саринаң полыс пирген. Піс, имҷілер паза медсестралар, ағырығларны, иреелерні удаа кӧрчебіс. Аннаңар кізее айап, майых парчабыс. Ам мин іди тың сағыссырабинчам. Пациенттер миннең чоохтазарға хынчатсалар, мин оларға Чайаачының молҷағларынаңар чоохтаҷаң полғам. Ол ағырығларны, иреелерні * чох идібізерге паза «Пірдеезі мин ағырчам тібес» * уғаа чахсы наа тилекейні турғыс саларға молҷапча.