КІЗІЛЕР НИМЕ ЧООХТАПЧАЛАР

Кӧп кізі хазнада чарадылчатхан азартнай ойыннарда пір дее хомай ниме чоғыл тіпче. Хазнада чарадылған пірее азартнай ойыннардаң, кӧзідімге, лотереялардаң килген ахчалар чонның кирексіністеріне парчалар.

БИБЛИЯ НИМЕ ЧООХТАПЧА

Библияда азартнай ойыннардаңар кӧні пазылбинча. Че анда ол ойыннарға Худайның кӧрізін кӧзітчеткен принциптер пар.

Азартнай ойыннарда кізілер уттыр салғанынаң ахча итчелер. Анзы Библияда пазылған принципке тоғырланча: «Кӧріңер, азымахчы полардаң китеніңер» (Лука 12:15). Кізілер харанғаннарының ӱчӱн ойнапчалар. Кізілер, пайып парарға тың хынып, ойыннарға кӧп ахча хорат салчалар. Азартнай ойыннар иртірчеткен организациялар улуғ джекпотнаң кізілернің хайиин тартчалар. Че олох туста утып аларға сидік полчатханын чоохтабинчалар. Ахчаны оой ла идіп аларға хынчатхан кізілерге харам хылыхтарына пастыр салбасха оой ла нимес.

Азартнай ойыннар ойнапчатхан кізілер пасха кізілернің уттыр салған ахчаларына пайып аларға хынчалар. Че Библия чӧп пирче: «Пірдеезі постин тілебезін, че пасхазына туза идерге кӧрглезін» (1 Коринфтегілерге 10:24). Он Чахығның пірсі мындағ полған: «Чағыныңның... пір дее нимезін — алып аларға хынма» (Исход 20:17). Утып аларға кӱстенчеткен кізі пасха кізілернің ахчалары аның холына кір парзыннар тіп сағынча.

Библия сизіндірче: талаанны часка ағылчатхан мистическай кӱске санирға чарабас. Пурунғыда пірее израильтяннарның Худайға киртіністері читпеен, аннаңар олар «талаанның худайына чиис салғаннар». «Талаанның худайына» пазырғаны Худайның кӧңніне кірген ме? Ол оларға теен: «Мин чабалға санапчатхан киректерні идерін тохтатпаазар. Минің кӧңніме кірбинчеткен нимелер таллап турғазар нооза» (Исайя 65:11, 12).

Хазнада чарадылчатхан азартнай ойыннардаң килчеткен ахча ӱгредіге, экономикаа паза пасха даа социальнай программаларға хорадылчалар. Че ол ахча, чахсы нимее хорадылчатса даа, харам поларға, постаңар ла сағынарға паза табырах пайып аларға кӧӧктірчеткен ойыннардаң килче.

«Чағыныңның... пір дее нимезін — алып аларға хынма» (Исход 20:17).

БИБЛИЯ НИМЕ ЧООХТАПЧА

Библияда чоохталча: «Пайирға кӱстенчеткен кізі хыҷаланысха пирінче. Ол чабал, тузазы чох, ӱреге кирчеткен хынығыстар хахпанына хаптырча» (1 Тимофейге 6:9). Харам полғаны кізілерні азартнай ойыннар ойнирға кӧӧктірче. Анзы Худай хырт кӧрчеткен киректернің пірсі полча (Ефестегілерге 5:3).

Азартнай ойыннар оой пайып аларға оңдай пирчелер. Аннаңар олар ойнапчатхан кізіде ахчаа хыныс ӧскірчелер. Библияда ахчаа хыныс «тооза чабал нименің ӧзені» тіп чоохталча. Кізі пайып аларға тың хынчатса, чӱреенде амыр чідір салча паза Худайға киртінізі сайбал парча. Библияда ахчаа хынчатхан кізілер «постарын кӧп чобағларға кир салғаннар» тіп чоохталча (1 Тимофейге 6:10).

Кізінің харамы чӱреенде ӧсчетсе, ол пар нимезіне чӧпсінмин сыхча паза ӧрініс чідір салча. Библияда чоохталча: «Кӱмӱске хынчатхан кізі кӱмӱске тоспас, ис-пайға хынчатхан кізі парызына хаҷан даа чӧпсінмес» (Экклезиаст 5:10).

Кӧп кізі, азартнай ойыннарға сабыл парып, хахпанға кір парған. Азартнай ойыннарға кір парған кізілернің саны кӧптең кӧп полып одырча. Кӧзідімге, Піріккен Штаттарда ла миллионнар азартнай ойыннарға тартыл парғаннар.

Библияда пазылча: «Харам кізінің ис-пайы ағаа часка ағылбас» (Притчи 20:21). Азартнай ойыннар ойнап, кізілер ӧдіске кір парчалар паза ахча чох халчалар, ідӧк тоғыстарын, нанҷыларын паза сӧбірелерін чідір салчалар. Че кізі, Библиядағы принциптернең тузаланза, азартнай ойыннар ағылчатхан хомай киректерге кір парбас.

«Пайирға кӱстенчеткен кізі хыҷаланысха пирінче. Ол чабал, тузазы чох, ӱреге кирчеткен хынығыстар хахпанына хаптырча» (1 Тимофейге 6:9).