Хан-ӱлгӱнің искірігҷілері чоохтапчалар

Ол чуртастың смыслын таап алған

ИИСУС позының хойларын чахсы пілче (Иоанн 10:14). Кізі паарсастығ чӱректіг полза, чахсы киректерге паза сын тудынысха хынза, Иисус андағ кізіні позынзар тартып алар. Андағ кізі чуртастың смыслын таап полар. Ідӧк чуртастың смыслын Бельгиядағы ипчі таап алған. Аның чуртазын хысхаҷахти кӧр кӧреелер:

«Иегованың киречілері ибімзер килгенде, мағаа уғаа хомай полған. Минің ӧлінібізерім килчеткен. Олар пу чир-чалбахтаң чабал ниме чох иділер тіп чоохтааннар. Аны ис салғамда, ӧрінгем. Че ол алызығлар Худайнаң палғалыстығ полчатханы кӧңніме кірбеен. 8 чыл мының алнында тигірибзер чӧргемде, андағы кізілернің чойырхос тудыныстырына пір дее хынмаам, аннаңар андар чӧрбин сыххам. Че Иегованың киречілері азых чӱректіг кізілер полғаннар. Олар сынны чоохтапчатханнарын піліп алғам. Мин мындағ сағысха килгем: „Худай чох чуртирға аар“.

Нинҷе-де тус пазынаң Иегованың киречілерінең тоғас полбин сыххам. Минің чуртазымда часка чох полған. Кӱнде ікі пачка тамкы тартчаң полғам паза наркотиктернең айғас сыххам. Ӱреен улуғ пабамнаң чоохтазар ӱчӱн, спиритизмнең айғас сыххам. Пірсінде хараазын айналар мині сох салғаннар. Іди олар мині нинҷе-де ай иреелееннер. Мин чалғызан халарға хорыхчаң полғам.

Пірсінде мин чӧрбеҷең чолҷа парчатхамда, пӱдіріг парчатхан орынға урун парғам. Анда кӧп кізі чыыл партыр. Иегованың киречілері постарының Залын пӱдірчеттірлер. Оларның минзер мының алнында хайди кил турғаннары сағысха кір килген. Андағ кізілер прай чир ӱстӱнде чуртаан ползалар, хайдағ чахсы поларҷых тіп сағын салғам.

Иегованың киречілері минзер килзіннер тіп уғаа тың хынғам, аннаңар Залны пӱдірчеткен кізілерзер, минзер килзіннер тіп, пастыр килгем. Мин Худайға пазырғам. Іди миннең иң пастағызын чоохтасхан ир кізі он кӱн пазынаң ибімзер килген. Ол миннең Библия ӱгрен сыххан паза Иегованың киречілерінің залынзар килерге хығырған. Залзар килгемде, мин уғаа хайхап парғам! Мин андағ ниме хаҷан даа кӧрбеем. Удур-тӧдір хынысчатхан кізілерні ӱр тілеем. Амды мин оларны таап алғам!

Ол тустаң ала мин чыылығларға чӧр сыххам, чуртазымны чахсы саринзар алыстыр сыххам. Ӱс неделя пазынаң тамкы тастабысхам. Астрологияның кинделерін чох идібіскемде паза сатанинскай музыканы испинібіскемде, айналар мині мының алнындағы чіли іди тың иреелебин сыхханнар. Мин Библияның принциптерінҷе чуртап сыххам. Ӱс ай пазынаң Худай сӧзін искір сыххам. Алты ай пазынаң, тізең, кіреске тӱскем. Кіреске тӱскен соонда, ікі кӱн пазынаң, подсобнай пионер полып, нымысчылан сыххам.

Иегова мағаа иткен нимелер ӱчӱн уғаа алғыстығзым. Мин чуртаста смысл таап алғам. Я, Иегованың ады — пик сівее. Мин, андар тизіп, арачыланыс таап алғам (Притчи 18:10). Минің Псаломны пасхан кізінің осхас чувстволар. Ол теен: „Пір кӱн синің чуртыңда муңар кӱннердең артых. Чазыхтығ кізілернің отахтарында чуртаанҷа, Худайымның туразының ізік иркенінің алныда турарбын“ (Псалом 84:10)».

Пу азых чӱректіг ипчі чуртастың смыслын таап алған. Чуртастың смыслын Иегованы тілепчеткен чахсы чӱректіг полған на кізі таап полар.