Хығырығҷыларның сурығлары

Ханнаңар Библияда пазылған чахығлар хоостыра, Иегованың киречілеріне постарының ханынаң иділчеткен имнег процедураларын идерге чарапча ба?

Христианин имнег кирегінде позының сағыстары паза имҷілер чӧптері хоостыра ла нимес, че ол киректеңер Библия ниме чоохтапчатханын санға алып, пӧгін аларға кирек. Ол сурығ Иегованаң ынархаснаң палғалыстығ.

Піске чуртас пирген Иегова «ханны чи́рге» чаратпаан (Бытие 9:3, 4). Хан чуртасты таныхтапча, аннаңар Худай пурунғы израильтяннарға ханнаң тузаланарынаңар кӧні устағлар пирген. Ол теен: «Прай тіріг нимелернің чуртазы ханда. Чазыхтарың тасталзын тіп, мин аны тайыға саларға чахаам». Че малны чи́рге сохчатса чи, ниме идерге? Андада кізее соххан малның «ханын ағызып, ханны чирнең кӧм саларға» кирек полған a (Левит 17:11, 13). Иегова ол чахығны хатап-хатап чоохтаан (Второзаконие 12:16, 24; 15:23). Пір еврейскай пічікте чоохталча: «Ханны ибде тударға чарабас. Аны чи́рге чарабас полчатханын кӧзідіп, чирзер тӧгібізерге кирек» («Soncino Chumash»). Прай тіріг нимелернің чуртазы Худайни, аннаңар пір дее израильтянинге ханны чыырға, ибде тударға паза пасха оңдайларнаң аннаң тузаланарға чарабас полған.

Мессий ӱреен соонда, Моисей чахиин толдырарға кирек чох пол парған. Че Худай ам даа ханны ах-арыға санапча. Илҷілер «ханны чібеске» устағ пиргеннер. Оларны ызых хут кӧӧктірген, аннаңар ол чахығны нимее салбасха чарабас. Ханны чеені чӧреес хылых паза чой худайларға пазырғаны осхас чазыхха саналча (Илҷілернің 15:28, 29; 21:25). XX векте донорлар хан пир сыхханда паза имҷілер кізілерге хан ур сыхханда, Иегованың киречілері анзы Библияа тоғырланчатханын піліп алғаннар b.

Пірееде, имҷілер кізіні операцияның нинҷе-де неделя алнында позының ханын пирерге кӧӧктірчелер (предоперационнай забор аутокрови, алай ПЗА). Андада, кирек пол парза, ол кізінің позының ханын ағаа урарға оңдай полча. Че ханны чығаны, аны хайраллааны паза урғаны Левитте паза Второзакониеде пазылғанына тоғырланча. Ханны хайда-да тударға чарабас, аны чирзер тӧгібізерге кирек алай, пасха сӧстернең чоохтаза, Худайға нандыра пирібізерге. Амғы туста Моисей чахии хоостыра тудынминчабыс. Андағ даа полза, Иегованың киречілері анда пазылған принциптерні улуғлапчалар паза «хан чібеске» пик пӧгін тутчалар. Аннаңар піс донор полбинчабыс паза позыбыстың ханын нандыра урар ӱчӱн, аны хайда-да чығбинчабыс. Аны чирзер тӧгерге кирек нооза. Ханны хайда-да чығаны паза аны кізее урғаны Худайның чахиина тоғырланча.

Пасха процедуралар паза ханны анализке пиргені Худайның принциптеріне тоғырланчатханы іле кӧрінминче. Кӧзідімге, кӧп христианнар ханны анализке пирчелер. Анализке пирілген хан соонаң тӧгіл парча нооза. Ідӧк имҷілер пірееде кізінің позының ханынаң пасха процедуралар идерге чӧптепчелер.

Кӧзідімге, хирургическай операция тузында гемодилюция итчелер. Ол процедурада кізінің ханының чардығын аппаратча позыдыбысчалар. Кізіде халған ханны порабысчалар. Операция соонда аппаратча чӱгӱрткен ханны кізізер нандыра айландырчалар. Андада кізінің гемоглобині кӧдіріл парча. Пірееде, операция тузында ахчатхан ханны, чыып алып, арығлабысчалар. Іди кізінің ханына эритроциттерні нандыра айландырчалар. Анзы ханны хайраллааны тіп адалча. Пасха процедурада ханны кізінің пірее органы орнына тоғынчатхан аппаратча позыдыбысчалар (кӧзідімге, чӱрек, ӧкпе алай пӱгӱрек). Анаң ханны кізізер нандыра айландырыбысчалар. Паза пір процедурада ханны сепаратор (центрифуга) пастыра позыдыбысчалар. Іди ханның хомай алай ағырығ чардыхтарын арығлабысчалар. Паза имҷілер центрифуга пастыра ханның компоненттерін оонаң чарып алчалар. Анаң ол компонентнең кізінің организмінің пасха чардығында тузаланчалар. Ідӧк процедура пар, хаҷан кізінің ханының хайдағ-да чардығын алып алып таныхтапчалар алай, андар имнер хозып, кізізер нандыра айландырчалар.

Имнег процедуралары пасха-пасха полчалар. Ікінҷілес чоғыл, диагностировать полҷаң паза имнеҷең оңдайлар кӧптең кӧп ле полып одырарлар. Піс полған на процедураны істезерге паза олардаңар пӧгін аларға кӱстенминчебіс. Христианин хирургическай операция тузында, анализке хан пирерінде алай пірее пасха имнег процедураларында позының ханынаң хайди тузаланарға позы пӧгерге кирек. Ағаа аның ханын хайди идерінеңер имҷілердең піліп аларға кирек. Анаң позының совезі хоостыра пӧгін аларға кирек. (Рамканы кӧріңер.)

Христианнарға чуртастарын Худайға пирін салғаннарын паза Худайға «прай чӱрекнең, прай кӧңнінең, прай кӱснең паза прай сағыснаң хынарға» чахығны толдырарға сӧс пиргеннерін ундутпасха кирек (Лука 10:27). Иегованың киречілері Худайнаң палғалысты уғаа аарлыға санапчалар, пу чир-чалбахтағы кізілернің кӧбізі, тізең, аны нимее салбинча. Пістің Чайаачыбыс Иисус тӧккен ханға киртінерге хығырча. Библияда чоохталча: «Худай... Христостың пастыра, Аның ханынаң пісті пос ит салған паза чазыхтарыбысты позытхан» (Ефестегілерге 1:7).

[Сноскалар]

[Рамка]

ПОСТЫ СЫНЫХТАҶАҢ СУРЫҒЛАР

Ит-сӧӧгімнең оонаң алып алған алай нинҷе-де тус ахпин турыбысхан ханны ит-сӧӧгімнің чардығына санирға, аны чирзер тӧгерге кирек чоғыл тіп сағынарға совезім чарадар ба?

Диагностическай алай имнег процедураларында ханымның хайдағ-да чардығын алып алып, ағаа ниме-де хозып алып, минзер нандыра айландырзалар, Библия хоостыра ӱгреділген совезім арығ халар ба?