Иегова — танызарға турыстығ Худай

ЧУРТАСТА сірерге ниме-де читпинче тіп пілдірче бе? Худайдаңар асхынах пілчетсер, анзы андағ полар. Ноға? Худайдаңар Библиядаң пілістер алғанының тузазын миллионнар кӧрчелер. Ол пілістернің тузазын амғы паза алнынзархы туста кӧрерзер.

Библияның Авторы, Иегова Худай, пісті аннаң таныссыннар тіп хынча. Псаломны пасхан кізі теен: «Кізілер пілзіннер, син не, кемнің ады Иегова, чир ӱстӱнде Иң Пӧзік Худайзың». Худай пілче: піске аны пілерге кирек. Ол чоохтапча: «Мин Иегова — синің Худайыңмын, сині тузалығ нимее ӱгретчем». Иегованаң, Иң Пӧзік Худайнаң танысханы піске хайдағ туза ағылар? (Псалом 83:18; Исаия 48:17).

Худай пісті кӱннің сай полчатхан сидіктерні тобырарға ӱгретче, чӱрекке амыр пирче паза полар чуртасха ізеніс пирче. Прай ол нимелер піске туза. Ідӧк, Иегованаң чағын арах танысчатсабыс, прай кізілерні сағыссыратчатхан сурығларға пасха харахнаң кӧрчебіс. Хайдағ сурығларға?

Чуртазыңарның смыслы пар ба?

Кізілер наукада паза техникада улуғ чидіглерге читкеннер, че чуртастаңар аарлығ сурығларға нандырығлар ам даа тілепчелер: ноо нимее мин чуртапчам? Полар туста мині ниме сағыпча? Чуртастың смыслы хайдағ? Пу сурығларға кізі ізестіг нандырығлар таппаза, аның чуртазында смысл полбас. Кӧп кізі іди чуртапча ба? 1990 чыллар тоозылчатханда, Германияда пір істезігнің сурығларына нандырған кізілернің чарымы оларға удаа алай пірееде чуртастың смыслы чоғыл тіп пілдірче тееннер. Сірер чуртапчатхан орында кізілер ідӧк чуртапчалар, арса.

Кізі, чуртастың смыслын кӧрбезе, хайди аннаң андар чуртазын апарарға пілбинче. Кӧп кізі карьерада паза ис-пайда чуртастың смыслын тілепче, че таппинча. Аннаңар андағ кізілернің піреелерінің чуртирлары килбинібісче. Пір сіліг чиит ипчінің чуртиры ідӧк килбеен. Аннаңар «Интернэшнл геральд трибюн» тіп газетада пазылған. Кічігдең сығара ол пай сӧбіреде ӧскен, че позын пір дее кізее кирек чоғыл тіп сағынған паза ағаа чуртастың смыслы чоғыл тіп пілдірген. Аннаңар ол снотворнай ізібіскен. Аны ӧліг таап алғаннар. Сірер дее чуртастарын іди тоос салған кізілерні пілчезер, арса?

Наука чуртастың чазыттарын ас пирер тіпчеткеннерін искезер бе? «Вохе» тіп немецкай еженедельникте ниме пазылғанына хайығ салыңар: «Наука орта полза даа, духовнай устағ пир полбинча. Эволюция теориязы читіре сағынып албаан теорияа тӧӧй. Квантовай физика даа, аның флуктуацияларынаң хада часхарыс паза ізеніс пир полбинча. Наука чуртасты, аның аймах-пасха формаларын паза чуртас ползын тіп, чир-чайаанда ниме полчатханын чарыда чоохтапча. Че наука чуртастың смыслын паза пісті алнында ниме сағыпчатханын чоохтап полбинча. Нандырығларны наукада ла тілепчетсебіс, чуртастың ӧӧн сурығларына нандырығлар таап полбаспыс. «Зюддойче цайтунг» тіп газетада хайди пазылча: «Чуртастың прай сариларында устағлар кирек».

Чайаачыдаң артых устағ кем пир полар? Ол кізілерні чирде чуртат салған, аннаңар ноға піс чуртапчатханыбысты пілерге кирек. Библияда Иегова кізілерні чир ӱстӱне тарирға паза чирні хайраллирға чайап салған тіп чоохталча. Кізілернің прай киректері Худайның качестволарын: сын тудынызын, хыйғазын паза хынызын кӧзідерге кирек полғаннар. Иегова хайдағ кӧстегнең пісті чайап салғанын піліп алып, чуртастың смыслын чахсы арах пілчебіс (Бытие 1:26—28).

Ниме идерге?

Ноо нимее мин чуртапчам? Полар туста мині ниме сағыпча? Чуртастың смыслы хайдағ? — пу сурығларға нандырығлар таппаан ползар, ниме идерге? Библия Иегованаң чағын арах танызып аларға чоохтапча. Иисус позы чоохтаан: «Мӧгі чуртас Сині — чалғыс сын Худайны — паза Син ысхан Иисус Мессий-Христос полчатханын пілчеткені полча». Ідӧк Библия Худайның кӧңніне кірчеткен качестволарны, уламох хынысты, тилідерге паза, Худайның Мессианскай Хан-ӱлгӱзінде чуртир ӱчӱн, прай кӱс саларға кирек тіпче. Пу хығырыға ӱндессер, сірернің чуртастарыңда смысл паза алнынзархы чуртасха пик ізеніс полар. Паза сірерні сағыссыратхан ӧӧн сурығларға нандырығлар таап аларзар (Иоанн 17:3; Экклезиаст 12:13).

Анзы сынап аарлығ ба? Аннаңар Ханс * чоохтап полар. Ол Худайға киртінҷең, че анзы аның чуртазына теелбеен. Ханс наркотиктернең, ипчілернең, мотоцикллернең айғасчаң паза оох-теек сайбағлар итчең. «Че минің чуртазымда смысл чох полған паза сын ӧрініс пір дее таппаам», — тіп чоохтаан ол. 25-че час полғанда, Ханс Худайнаң чағын арах танызып алар ӱчӱн, Библияны хығыр сыххан. Иегованаң чағын танызып алғанда, чуртастың смыслын піліп алған. Ханс чуртазын алыстырыбысхан, анаң кіреске тӱзіп, Иегованың киречізі полып алған. Ам, тізең, ол он чыл, прай тузын пиріп, Худайға нымысчыланча. Ол чоохтапча: «Иеговаа нымысчыланғаны минің чуртазымда иң чахсы ниме. Анзынаң пір дее ниме тиңнес полбас. Иегованаң танызып алғамда, мин чуртастың смыслын таап алғам».

Сынында чуртастың смыслынаңар сурығдаң пасха даа сурығлар кізілерні сағыссыратчалар. Чир-чалбахта чуртас хомайдаң хомай ла полып одырча, аннаңар кӧп кізіні пасха аарлығ сурығ сағыссыратча.

Ноға хыйаллар полчалар?

Хыйал пол парза, кізі мындағ сурыға нандырығ тілепче: ноға андағ кирек пол парды? Пу сурыға орта нандырығ кізее чобаға пастыр салбасха полызар. Чӱрекке чарас нандырығ таппаза, кізі чобалар, чӱрегі дее хат парар. Брунинең ниме пол парғанын кӧр кӧреелер.

Бруни, ортымах частығ ипчі, чоохтапча: «Нинҷе-де чыл мының алнында минің хызыҷағым ӱреп парған. Мин Худайға киртінгем, аннаңар, часхарыс тілеп, абыссар айланғам. Ол мағаа минің Зузаннамны Худай тигірзер алып алған, ол ангел пол парған тіп чоохтап пирген. Палам ӱреен соонда, минің чуртазым саңай тискер айлан парған, ағаа хоза, минің паламны позынзар алып алған ӱчӱн, мин Худайға тың тарын парғам». Бруни нинҷе-де чыл уғаа тың чобалған. Анаң ол тіпче: «Ол туста пір ипчі, Иегованың киречізі, Худайға тарынарға сылтағ чох полчатханын Библия хоостыра кӧзіт пирген. Иегова Зузаннаны тигірзер алып албаан паза ол ангел пол парбаан. Прай кізілер чазыхтығлар, аннаңар палам ағырыбысхан. Зузанна ӧлім уйғузынаң узупча паза Иегова аны усхурыбызарын сағыпча. Ідӧк, Худай кізілерні чирдегі райда мӧгі чуртазынар тіп чайаанын паза ӱр ниместең аның сағызы тол парарын піліп алғам. Иегованы чахсы арах піліп алған соонда, мин ағаа чағын пол парғам паза минің чӱреем амырап парыбысхан» (Псалом 36:29; Илҷілернің 24:15; Римдегілерге 5:12).

Миллионнар аймах-пасха хыйаллар ӱчӱн ирееленчелер, оларның санында: кізінің позының хыйаллары, чаалар, ӧзӧгіс паза чир-чайааннаң сыххан саайлар. Пістің иреелерібісті Иегова пыролығ полбинчатханнаңар, кізілер иреелензіннер тіп хаҷан даа хынмааннаңар паза ӱр ниместең прай чабалны чох идібізерінеңер Библиядаң піліп алғанда, Брунинің чӱреенде истіг пол парған. Чабал ниме иртіре кӧп полчатханы пу чир-чалбахтың тӱгенҷі кӱннерінде чуртапчатханыбысты кӧзітче. Піс прайзыбыс чуртас чахсы саринзар алызарын уғаа тың сағыпчабыс. Ол алызығлар уғаа чағын (2 Тимофейге 3:1—5; Матфей 24:7, 8).

Худайнаң хайди танызып аларға

Ханснаң Бруни Худайға киртінгеннер, че аннаңар асхынах пілгеннер. Олар Иеговадаңар орта пілістер аларға тус таап сыхханнар. Іди олар амғы туста кӧп кізілерні сағыссыратчатхан аарлығ сурығларға пілдістіг нандырығлар таап алғаннар. Анзы оларның чӱректерін амыратхан паза полар чахсы чуртасха пик ізеніс пирген. Иегованың миллиона́р нымысчыларына ол пілістер ідӧк часхарыс ағылған.

Иегованаң чағын арах танызып аларға хынчатсабыс, Библияны ситкеп ӱгренерге кирек. Библияда Худай кем полчатханнаңар паза ол пістең ниме сағыпчатханнаңар чоохталча. Пастағы векте піреелері ідӧк Худайнаң танысханнар. Тархынҷы паза имҷі Лука Верий саардағы (Греция) еврейлер Павелнең Сила искірген хабарға хайди ӱндескеннеңер піди пасхан: «Олар, кӱннің сай Худай Пічиин хығырып, андағ ба, андағ нимес пе тіп сыныхтап ала, Чахсы Хабарны хынып алғаннар» (Илҷілернің 17:10, 11).

Пастағы вектегі христианнар, ӧмелерге пірігіп, чыылығлар иртірҷеңнер (Илҷілернің 2:41, 42, 46; 1 Коринфтегілерге 1:1, 2; Галат чиріндегілерге 1:1, 2; 2 Фессалониктегілерге 1:1). Амғы туста Иегованың киречілері ідӧк хада чыылысчалар. Ол чыылығлар кізілерге Иеговаа чағын арах поларға паза ағаа ӧрініснең нымысчыланарға полысчалар. Хонҷыхти чуртапчатхан Иегованаң киречілерінең чоохтасханы пасха даа туза ағылча. Кізілер постары пазырчатхан Худайға пола-пола тӧӧй пол парчалар. Иегованың киречілерінің дее чуртастарында Иегованың качестволары кӧрінче. Аннаңар Иегованың киречілерінең чоохтасханы Иегованаң чахсы арах танызып аларға полысча (Еврейлерге 10:24, 25).

Сірер тирзер, арса: «Пір ле Личностьнаң танызар ӱчӱн, анҷа кӧп кӱс саларға кирек пе?» Я, кӱс саларға кирек. Пасха кӧстеглерге чидіп алар ӱчӱн, ідӧк кӧп кӱс саларға кирек нимес пе? Сағын кӧріңер, саблығ спортсменнер тренировкаларына нинҷе кӱс салчалар. Кӧзідімге, олимпийскай ойыннарда алтын медаль алған французскай лыжник, Жан-Клод Кили, международнай марығда утып алар ӱчӱн, ниме идерге кирек полчатханнаңар чоохтапча: «Марыға он чыл алнынҷа тимненерге кирек. Кӱннің кӱнге, чылдаң чылға ол кӱннеңер сағынарға кирек... [...] Чыл сай 365 кӱн сағыснаң паза азах-холнаң тоғынчазың». Он на минут полчатхан марығда аралазар ӱчӱн, анҷа тус паза кӱс хорадарға кирек! Иегованаң танызып, тізең, хай-хай кӧп чидіглерге чидіп аларға чарир!

Кӱннең кӱнге пиктең пик полып одырчатхан палғалыс

Чуртаста аарлығ нимее чит полбин халарға піреезі хынча ба? Пірдеезі хынминча. Аннаңар, сірернің чуртазыңарда смысл читпинче тіп пілдірчетсе, алай ноға иреелер полчатханын піліп аларға чидікпинчетсер, Библияда чоохталчатхан Иегова Худайнаң танызып аларға пӧгін алыңар. Худайдаңар пілістер алып, сірер чуртазыңарны чахсы саринзар алыстырыбызарзар паза ол пілістернің тузазын хаҷан даа кӧрерзер.

Иеговадаңар пілістер аларын хаҷан-полза тохтат саларбыс па? Онар чыллар Иеговаа нымысчыланчатханнар аннаңар хаҷан-да алған паза ам алчатхан пілістерге уғаа тың хайхапчалар. Піліс алғаны пісті часкалығ итче паза Худайға улам чағын поларға полысча. Піс Павел илҷі пас салған сӧстернең чарасчабыс, ол пасхан: «Худайның хыйғазы паза пілізі хайдағ илбектір! Аның пӧгіннерін пілҷее чоғыл, Аның чолын чолласчаа чоғыл. Худайның сағызын кем піліп алған? Кем Ағаа чӧп пирген?» (Римдегілерге 11:33, 34).

[Сноска]

[Вставка]

Кізілер чуртастаңар пу аарлығ сурығларны ам даа турғысчалар: ноо нимее мин чуртапчам? Полар туста мині ниме сағыпча? Чуртастың смыслы хайдағ?

[Вставка]

«Иегова хайдағ Худай полчатханын піліп алғамда, мин ағаа чағын арах пол парғам».

[Вставка]

«Иеговаа нымысчыланыс — чуртаста пар нименең иң чахсызы. Анзынаң пір дее ниме тиңнес полбас. Иегованаң танызып алып, чуртастың смыслын піліп алғам».