Полған на киректе Библияның кӧні чахии кирек пе?

ПІС кічіг палалар полған туста іҷе-пабаларыбыс кӧп правилолар турғысханнар. Соонаң, ӧс парғанда, іҷе-пабабыс пістеңер сағыссырап, андағ правилолар турғысханын піліп алғабыс. Ам улуғ кізі пол парып, іҷе-пабадаң хыйа парыбысхан туста даа, ол правилоларнаң піреелерінең тудынчабыс.

Пістің тигірдегі Пабабыс, Иегова, позының Сӧзінде, Библияда, піске кӧні устағлар алай чахығлар пирче. Кӧзідімге, ол идолларға пазырарға, сайбах тудынарға паза оғыр идерге чаратпинча (Исход 20:1—17; Илҷілернің 15:28, 29). Духовнай саринаң пызығ полыбысханда, піс піліп алғабыс: прай ол чахығлар піске чахсы ползын тіп пирілгеннер паза олар пістің пос чуртазыбысты хызырбинчалар (Ефестегілерге 4:15; Исайя 48:17, 18; 54:13).

Че кӧп киректерде Библияда кӧні устағ пазылбинча. Аннаңар піреелері піди сағынчалар: «Пу кирекке Библияда кӧні чахығ пазылбаанда, мин хайди хынзам, іди тудынам». Олар тіпчелер: «Кирек полған полза, Худай пу киректеңер кӧні устағ пас саларҷых».

Іди сағынчатхан кізілер удаа алған пӧгіннеріне соонаң ачырғанчалар. Олар Библияда Худайның чахығларына хоза Худайның кӧрізі пазылчатханын санға албинчалар. Библияны ӱгренчетсебіс, піс хайди Иегова аймах-пасха сурығларға кӧрчеткенін піліп одырчабыс. Андағ оңдайнаң позыбыстың совезібісті ӱгретчебіс паза хыйға пӧгіннер аларға ӱгренчебіс. Іди піс Иегованың чӱреен ӧріндірербіс паза хыйға пӧгіннер піске туза ағыларлар (Ефестегілерге 5:1).

Библиядағы чахсы кӧзідімнер

Библияда Худайның пурунғы нымысчыларынаңар хығырып, піс кӧрчебіс: хайдағ-да сурыға Худай кӧні чахығ пирбеен полза, аның нымысчылары Иегованың кӧңнін санға алҷаңнар. Кӧзідімге, Иосиф. Потифарның ипчізі ағаа хада узирға сыынған туста, Худайның пазылған чахии чох полған. Пасха кізінің ипчізінең хада узирға чаратпинчатхан чахығ чох полған полза даа, Иосиф пілген: Потифарның ипчізінең хада узааны аның совезінең тоғыр паза Худайдаң тоғыр чазых полар (Бытие 39:9). Эдем садта Худай чоохтаан сӧстерні Иосиф пілген полар, аннаңар пасха кізінің ипчізінең узааны Худайның кӧңніне кірбезін ол пілген (Бытие 2:24).

Ам пасха кӧзідім кӧр кӧреелер. Илҷілернің 16:3-ҷі стихта Павел Тимофейні чорыхха хада алып алар алнында ағаа сӱннет иттірібіскен тіп чоохталча. Анаң піс 4-ҷі стихты хығырчабыс: Павелнің Тимофей саардаң саарға чӧріп, «Иерусалимдегі илҷілернің паза тигіриб ах сағалларының чарадығларын, чахығларын толдыр турыңар» тіп чоохтап турғаннар. Ол чахығларның аразында христианнарға паза сӱннет идерге кирек чоғыл тіп чахығ полған (Илҷілернің 15:5, 6, 28, 29). Ноға андағда Павел Тимофейге сӱннет иттірген? Анда чуртапчатхан иудейлернің ӱчӱн, «Тимофейнің пабазы грек кізі полчатханын пілгеннер» нооза. Павел пірдеезін хомзындырарға алай харылҷаң тас поларға хынмаан. Ол христианнарны Худайның алнында орта тудынчатханнарын прайзына кӧзітсіннер тіп хынған (2 Коринфтегілерге 4:2; 1 Коринфтегілерге 9:19—23).

Павел илҷі дее, Тимофей дее іди сағынғаннар. Римдегілерге 14:15, 20, 21, 1 Коринфтегілерге 8:9—13 паза 1 Коринфтегілерге 10:23—33 хығырып алзабыс, піс Павел илҷі пасхаларының духовнай хазиинаңар хайди сағыссыраанын кӧрербіс. Павел илҷі сынында чазых полбинчатхан киректерні кӧріп, киртіністері уйан пол парар кізілердеңер уламох сағыссыраан. Тимофейдеңер, тізең, Павел илҷі пасхан: «Тимофей чіли, сірердеңер пар-чох кӧңнінең сағыссырапчатхан андағ кӱстенҷік кізі дее паза чоғыл. Тоозылары даа Иисус Христостине нимес, че постарының на киректеріне сағыссырапчалар нооза. Аның киртістіг тудынғанын, тізең, сірер пілчезер. Ол Чахсы Хабарны тарадарында, оолғы пабазына чіли, мағаа матап хабасхан» (Филипптегілерге 2:20—22). Пу харындастар піске уғаа чахсы кӧзідім полчалар! Худайның кӧні устағ чох киректерде олар постары ла хынған оңдайнаң тудынманнар. Иеговаа паза Иисусха кӧӧгіп, олар алған пӧгіннер пасха кізілерге духовнай саринаң хайди теелерін санға алғаннар.

Ідӧк Иисус Христосты сағысха киріңер. Ол піске ӧӧн кӧзідім полча. Иисус Тағдағы ӱгредігде Худайның чахығларын піліп алған кізі ол чахығ чаратчатхан алай чаратпинчатхан киректердең хай-хай кӧп идер тіп кӧзіт пирген (Матфей 5:21, 22, 27, 28). Иисус таа, Павел дее, Тимофей дее паза Иосиф тее Худай кӧні чахығ пирбеен киректерде кізі хайди хынза, іди тудын полар тіп сағынмааннар. Олар Худай кӧрізі хоостыра чуртааннар. Худайға паза чағыннарына хынғаннар. Иисус, тізең, анзын ікі аарлығ чахығ тіп адаан (Матфей 22:36—40).

Пӱӱнгі христианнар

Хайди піс кӧрчебіс Библияны піске ниме идерге кирек полчатханын кӧні паза тиксі чоохтапчатхан юридическай документ тіп санирға чарабас. Худайның чахығлары піске хайди тудынарға кӧні чоохтабинчатхан даа киректерде аның кӧрістерінің хоостыра пӧгіннер алчатсабыс, піс Иегованы уғаа тың ӧріндірчебіс. Пасха сӧстернең чоохтаза, Худайның кӧні устағларын тілир орнына, аның кӧңні хайдағ полчатханын пілерге кӱстенерге кирек (Ефестегілерге 5:17; Римдегілерге 12:2). Ноға анзы Иегованы ӧріндірче? Андағ оңдайнаң піс позыбыстың хынығыстарыбысты алай праволарыбысты нимес, че аның кӧңнін толдырғанын пастағы орынға турғысчабыс. Ідӧк піс аның хынызын аарлыға санапчабыс, аннаңар ол хынысха кӧӧгерге хынчабыс паза андағ хыныс пісті чуртасча апарчатхан кӱс полча (Притчи 23:15; 27:11). Ағаа хоза, чахығ киректепчеткен нимелердең артых идерге кӱстензебіс, духовнай паза физическай саринаң хазых поларбыс.

Чуртаста хайди пу принципнең тузаланарға кӧр кӧреелер.

Хайди ӱтертістерні таллирға

Кӧзідімге, чиит кізі хайдағ-да музыкальнай альбом алып аларға хынча. Ол альбомның пірее сарыннары аның кӧңніне кірче, че альбомның обложказын кӧргенде, ағаа анда сексуальнай паза уйады чох сарыннар уғаа кӧп тіп пілдірче. Паза ол ырҷы хазыр паза чабал сарыннар сарнапчатханын ол пілче. Чиит кізі Иеговаа хынча, аннаңар пу сурыға хайди ол кӧрчеткенін тілепче. Хайди ағаа Худайның кӧңнін піліп аларға?

Галат чиріндегілерге пічікте Павел илҷі кізінің позының кӧңнінің иділчеткен киректерінеңер паза Худай худы пирген нимістердеңер пасча. Худай худы пирчеткен ниміске мындағ киректер кірчеткенін пілче поларбыс: хыныс, ӧрініс, амыр хоных, тыстаныс, паарсас, айас, киртініс, тоғырланмааны, посты тудын пілгені. Че постың кӧңнінҷе иділчеткен киректерге ниме кірче? Павел пасча: «Чӧреес хылых, ойнас, арығ нимес киректер, уйат пілбеені, пасха худайларға пазырғаны, аптағ, ыырлас, хырыс-табыс, кӱннес, хазырланыс, тыртыстаныс, кӧкеесімненіс, тартыс, чара полғаны, хыртыстаныс, іскі, кӱлет паза андағох пасха нимелер. Анда даа сизіндіргемӧк, ам даа сизіндірчем: пу оңдайларнаң полчатханнар Худай хан-чирінде ӱлӱс албастар» (Галат чиріндегілерге 5:19—23).

Павел мында «андағох пасха нимелер» пасханын сизіндер бе? Павел хайдағ киректерні пос кӧңнінҷе иділчеткен киректерге санирға кирек полчатханын прай пас салбаан. Павелнің пічии хығырчатхан кізі піди сағын полбасчых: «Пу списокта Павел паспаан нимелернең айғазарға минің библейскай тӧстег пар». Хығырчатхан кізі хайдағ кирек пу списокта чох таа полза, «андағох пасха нимелерге» кірчеткенін піліп аларға кирек. Павел илҷі чоохтабаан «андағох пасха нимелерге» кірчеткен киректернең пыросынмин айғасчатхан кізее Худай Хан-ӱлгӱзінің алғастары пирілбес.

Піске хайдағ киректер Иегованың кӧңніне кірбинчеткенін піліп аларға кӱстенерге кирек. Анзы сидік пе? Кӧзідімге, имҷі сірерге фрукттарны паза чир тамағын кӧп арах чирге, пирожнай, мороженай паза пасха даа андағ нимелерні асхынах арах чирге чоохтапча. Торт хайдағ чиис полчатханын піліп аларға сірерге сидік полар ба? Худай худы пирген нимістердеңер паза пос кӧңнінең иділчеткен киректердеңер хатап чоохтас кӧреелер. Сағам чоохталған альбом оларның хайзына кірче? Анда Худайның худына кірчеткен хыныс, ӧрініс, амыр хоных паза Худайның худының нимістері полчатхан пасха даа качестволары кӧрінминче. Андағ кӧглер Худайның кӧңніне кірбинчеткенін піліп алар ӱчӱн, хайдағ-да кӧні чахығлар кирек чоғыл. Хығырчаң материалларны, фильмнерні, телепрограммаларны, компьютернай ойыннарны, веб-сайттарны паза пасха даа андағ нимелерні таллапчатса, пуох принциптернең тузаланарға чарир.

Хайди тонанарға?

Библияда кип-азахха паза тастындағы кӧрімге теелчеткен принциптер парох. Олар полған на христианинге чахсы паза сіліг кӧрінерге полысчатхан устағ пирчелер. Иеговаа хынчатхан кізі пу киректе позының кӧңнінҷе тудынмас, че пістің тигірдегі Пабабысты ӧріндірер оңдай табар. Хайди піс кӧрдібіс, хайдағ-да сурығда Иегова, кӧні устағ пирбинчетсе дее, аның нымысчылары ол сурығда хайди даа тудынзалар, чахсы полар тіп сағынминча. Кізіні тонанчатханы аның чуртапчатхан орнынаң палғалыстығ. Пір орында даа пола-пола кип-азах алыс сыхча. Андағ даа полза, кип-азахтаңар Худай ӧӧн принциптер пирче. Аның нымысчылары ол принциптернең хайда даа паза хаҷан даа тузаланарға киректер.

Кӧзідімге, 1 Тимофейге 2:9, 10-да чоохталча: «Ипчілері дее, ипти-оңдайли килістіре тонан салып, арығ чӱректіг полып, састарын кеен ӱргеннең нимес, алтыннаң-нинҷінең паза аарлығ кип-азахнаң нимес, че Худайны улуғлап тудынчатхан ипчілерге килістіре киректернең постарын чазазыннар». Андағ оңдайнаң христианнарға — ипчілерге дее, иреннерге дее — пу сурығлардаңар чахсы арах сағынып аларға кирек: мин чуртапчатхан орындағы кізілер Худайны улуғлапчатхан кізілер хайди тонанарға кирек тіп сағынчалар? Минің хайди тонан салғанымның ӱчӱн кізілер чахсы хабардаңар ниме сағынарлар? (2 Коринфтегілерге 6:3). Пызығ христианин мин піди тонанарға хынчам алай піди тонанарға правом пар тіп сағынмас, че хайди кізілерге харылҷаң тас пол парбасха тіп сағынар (Матфей 18:6; Филипптегілерге 1:10).

Христианинге аның кӧрімі пасхаларын изі чохтандырчатса алай оларға харылҷаң тас полчатса, оларның духовнай хазии позының хынығыстарынаң пӧзік турғызып, Павел илҷее кӧӧгерге чарир. Павел пасхан: «Мин Христосха кӧӧкчеткенни, мағаа кӧӧгіңер» (1 Коринфтегілерге 11:1). Иисустаңар Павел піди пасхан: «Христос таа позының кӧңнін чӧпсіндірбеен». Христианнардаң ниме киректелчеткенін пілдістіг: «Піс, кӱстіглер, пос кӧңнінҷе полбин, чазығ кізілернің аарсаанын артынарға кирекпіс. Полғаныбыс ла чағыныбыстың кӧңнінҷе поларға кирекпіс. Киртіністерің пик полар ӱчӱн, ағаа чахсы идерге кирекпіс» (Римдегілерге 15:1—3).

Сизіктіг поларға ӱгренерге

Хайди піске кӧні чахығ пирілбинчеткен киректерде дее, Иегованың кӧңніне кірер иде тудынып оңнирға? Худайның Сӧзін кӱннің сай хығырчатсабыс паза аны істезіп, аннаңар тирең сағынчатсабыс, піс сизіктең сизік полып одырарбыс. Хайди пала кӧместең ӧсче, духовнай саринаң кізі ідӧк кӧместең ӧсче. Кізі пір саңайға сизіктіг пол парбинча. Анзына тус кирек. Аннаңар табырах алыс полбинчатсабыс, тыстаныстығ поларға паза ачырғанмасха кирек. Пір хыринаң, тус ла иртчеткен ӱчӱн піс сизіктіг пол парбаспыс. Хайди чоохталған, піс сыбыра Библияны ӱгренерге паза анда пазылған нимелер хоостыра чуртирға кӱстенерге кирекпіс (Еврейлерге 5:14).

Худайның чахығлары Худайның чооғын исчеткенібісті сыныхтапчалар. Аның принциптері, тізең, духовнай саринаң піс нинҷе пызығбыс паза тигірдегі Пабабыстың кӧңніне кірерге нинҷе тың хынчатханыбысты сыныхтапчалар. Духовнай саринаң ӧзіп одырзабыс, піс Иеговаа паза аның Оолғына кӧӧгерге кӧптең кӧп кӱстенербіс. Позыбыстың пӧгіннерібісті Худайның сағынчатхан оңдайнаң хоостыра аларға хынарбыс. Аның сағынчатхан оңдайын піс Библиядаң піліп аларбыс. Пістің тигірдегі Пабабысты прай киректерібіснең ӧріндірзебіс, позыбыс таа ӧріністігдең ӧріністіг полып одырчатханыбысты сизінербіс.

[Хоос]

Пасха-пасха орыннарда чуртапчатхан кізілер аймах-пасха оңдайнаң тонанчатсалар даа, піске библейскай принциптернең устанарға кирек.