Ноға ипчі кізее ирінің сӧзін истерге кирек?

«Ипчізінің [пазы] — ирі» (1 КОР. 11:3).

1, 2. а) Чоох истерінеңер паза кем кемнің пазы полчатханнаңар Павел ниме пасхан? б) Пу статьяда хайдағ сурығлар ӱзӱрібізербіс?

 «НОО даа ирге пазы Христос полча... Христосха, тізең, — Худай», — тіп пазып, Павел илҷі Худайның кӧрізін пас салған (1 Кор. 11:3). Пу статьяның алнындағы статьяда Иисус Христос позының пазының, Иегованың, чооғын искенін аарлыға санааннаңар паза христианин иреннің пазы Христос полчатханнаңар пазылған. Иисус кізілерге паарсаан, айаан, нымзах тудынған паза позына ла тартынмаан. Ир кізілерге ӧмедегі кізілернең ідӧк тудынарға кирек. Ипчізінең іди тудынғаны уламох аарлығ полар.

² Ипчі кізілердеңер ниме тирге чарир? Оларның пазы кем полча? Павел илҷі пасхан: «Ипчізінің [пазы] — ирі». Худай пирген принципче ипчі кізее хайди тудынарға? Ирі Худайға киртінминчетсе, пу принципнең тузаланарға чарир ба? Сӧбіреде аарлығ сурығ ӱзӱрілчетсе, ипчізіне ол сурығда аралазарға чарир ба? Нименің ӱчӱн ипчі кізі махтаға турыстығ?

«Ағаа килістіре полысчы чайап пирим»

3, 4. Главенство принципінең тузаланғаны ноға туза ағылча?

³ Главенство принципін Худай турғыс салған. Адамны чайаан соонда, Худай теен: «Кізее чалғысхан хомай. Ағаа килістіре полысчы чайап пирим». Худай Адамға Еваны, аның полысчызын, чайап салғанда, Адам ӧрінгеніне хысхырыбысхан: «Мына сӧӧктерімнең сӧӧк паза ит-ханымнаң ит-хан» (Быт. 2:18—24). Адамнаң Еваа чазых чох, толдыра кізілернің іҷе-пабазы поларға оңдай полған. Ол кізілер чирдегі райда мӧгі тус часкалығ чуртирҷыхтар.

⁴ Адамнаң Ева Эдемде чазых ит салған ӱчӱн кізілер главенство принципін толдыразынаң тудын полбинчалар. (Римдегілерге 5:12 хығырыбызыңар.) Че ол принципче ам даа тудынарға кирек. Аннаң орта тудынғаны хоныхха туза полча паза часкаа ағылча. Іди піс, Иисус Иегованың, позының пазының, чооғын искен ӱчӱн хайди ӧрінген, ідӧк ӧрінербіс. Иисус чирзер килер алнында, «[Иегованың] алнында сыбыра ӧрінген» (Прит. 8:30). Чазых ӱчӱн ир кізілер толдыразынаң сӧбіре пазы пол полбинчалар. Ипчілер дее ирлерінің чооғын толдыразынаң ис полбинчалар. Че ирлер паза ипчілер главенство принципінҷе тудынзалар, сӧбіреде часкалығ поларлар.

5. Ноға ирепчілерге Римдегілерге 12:10-ғы чӧпче тудынарға кирек?

⁵ Хоныхта часкалығ полар ӱчӱн, ирепчілерге христианнарға пирілген пу чӧпче тудынарға кирек: «Харындастар чіли, хынызыңар. Улуғлазарында пірсі пірсінең пуруннирға кӱстеніңер» (Рим. 12:10). Ағаа хоза, иріне паза ипчізіне удур-тӧдір паарсаснаң хайарға, айазарға паза прай чӱрекнең пыро тастазарға кирек (Еф. 4:32).

Хоных хонғаның Худайға киртінминчетсе

6, 7. Худайға киртінминчеткен ирінің чооғын искені удаа нимее ағылча?

⁶ Хоных хонғаның Иеговаа киртінминчетсе чи? Удаа хоныхта ирі Иеговаа киртінминче. Андада ипчізі иріне хайди хайарға кирек? Библияда анзына чӧп пирілче: «Сірер, ипчілер, ідӧк ирлеріңнің сӧзінең сыхпаңар. Андада Худай сӧзін испинчеткен хай пірее ирлер, ипчілерінің чуртастары пастыра ла, артых чоохтаспин, Худайға хозыл парарлар. Сірернің арығ сағыстығ, Худайдаң хорығып чуртапчатханнарыңны кӧрзелер, оларға пір дее ниме чоохтирға кирек чох полар» (1 Пет. 3:1, 2).

⁷ Худай Сӧзі ипчі кізее Худайға киртінминчеткен ирінің чооғын истерге чоохтапча. Аның чахсы тудынызы, арса, ирін ноға ол іди чахсы тудынчатханнаңар сағынарға кӧӧктірер. Соонаң ирі христианка полчатхан ипчізі нимее киртінчеткенін паза Худайның сынын піліп аларға хыныбызар, арса.

8, 9. Ипчі кізі чахсы тудынза даа, аның ирі сынзар тартылбаза, христианка полчатхан ипчі ниме ит полар?

⁸ Ипчізі чахсы тудынарға кӱстенчетсе дее, ирі Худайзар тартылбаза, ниме идерге? Библия ипчі кізее, аар полза даа, христианскай качестволар кӧзідерге чоохтапча. Кӧзідімге, 1 Коринфтегілерге 13:4-те хығырчабыс: «Хыныс тыстанча». Аннаңар ипчізі пазымнығ паза нымзах тудынчатса, тоозылбас тыстаныстығ полчатса паза иріне хынчатса, чахсы итче (Еф. 4:2). Ипчі кізее сидік тее полза, Худай ызых худы пастыра христианскай качестволар чідірбеске полысча.

⁹ Павел пасхан: «Иисус Христос мині пик итчеткенде, прай нимее кӱзім чидер» (Флп. 4:13). Худайның худы ир кізее паза ипчі кізее кӧп киректерде орта тудынарға полысча. Кӧзідімге, хоных хонғаны хазыр тудынза, кізінің ідӧк нандырары килче. Че Библия прай христианнарға мындағ чӧп пирче: «Чабалға чабалнаң нандырбаңар. [...] ...Пазылых нооза: Мин ӧс аларбын, Мин тӧлирбін, — тіпче Хан Худай» (Рим. 12:17—19). Ідӧк 1 Фессалониктегілерге 5:15-те пазылча: «Кӧріңер, пірдеезі чабалға чабалнаң нандырбазын, пос посха даа, пасхаларына даа чахсы итчедіңер». Иегованың худының полызиинаң позыңның кӱзіңнең ит полбас нимені идіп аларға чарир. Хайди кӧрчебіс, піс ит полбинчатхан нимені ит полар ӱчӱн, ызых хут сурынып пазырарға кирек!

10. Иисусты сӧклеенде паза ағаа хомай иткенде, ол хайди тудынған?

¹⁰ Иисусты сӧклеен паза ағаа хомай иткен кізілернең хайди ол тудынғаны піске кӧзідім полча. 1 Петрның 2:23-те чоохталча: «Аны сӧклееннер, ол, тізең, удур тапсабаан. Ол ирееленген, че пірдеезіне хыҷанмаан. Орта Чарғыҷының холына ол прай нимезін пирібіскен». Піске аның кӧзідімінҷе тудынарға кирек. Кізілер сірерге хомай итселер, сірер оларға хомай итпеңер. Прай христианнарға пирілген чӧпче тудыныңар: «Сірер прайларың пір сағыстығ, кізее ачынаачы... пазымнығ поларға кирексер. Чабалға чабалнаң, хырызынысха хырызыныснаң нандырбаңар» (1 Пет. 3:8, 9).

Ипчілернің аарлығ рольы

11. Пірее христианкаларға хайдағ улуғ аарлас пирілер?

¹¹ Ирі ипчізінің пазы полза, сӧбіреде аарлығ сурығлар ӱзӱрілчетсе, ипчінің кӧрізі санға алылбинча ба? Ағаа сыбыра сым поларға кирек пе? Чох. Иегова ипчі кізее, ир кізее чіли, аарлығ тоғыстар пирген. 144 000-ңа пирілген аарластаңар сағын кӧреелер! Ол ханнар паза абыстар Иисус Христоснаң хада тигірдең чирнең устирлар. Оларның санына ипчілер кірчелер (Гал. 3:26—29). Хайди кӧрчебіс, Иегова позының организациязында ипчі кізілерге аарлығ роль пирген.

12, 13. Ипчі кізілер ухаанҷылаанын кӧзітчеткен кӧзідімнер кӧзіт пиріңер.

¹² Кӧзідімге, библейскай тустарда ипчілер ухаанҷылааннар. Иоиль 2:28, 29-та мындағ ухаанҷылас пирілче: «Мин прай кізілерге ызых хут пирем. Сірернің оолларың паза хыстарың ухаанҷылирлар. [...] Хулларға даа, сӱмекчіннерге дее ол кӱннерде ызых худымны пирем».

¹³ П. э. 33 чылда, Пятидесятницада Иерусалимдегі тураның ӱстӱндегі пӧлігінде чыыл парған 120 ӱгренҷілернің аразында ир кізілер дее, ипчі кізілер дее полғаннар. Оларға прайларына ызых хут пирілген. Аннаңар Петр ир кізілерге паза ипчі кізілерге теелчеткен Иоильнің сӧстерін чоохтап пирген: «Пу ниме прай ухаанҷы Иоилнің чоохтааны хоостыра полча: „Халғанҷы кӱннерде, тіпче Худай, Мин Позымның Худымны полғанына ла чай пирем. Сірернің оол-хыстарың ухаанҷылирлар; чиит ооллар кӧрінҷектер кӧрерлер... Мин ирен дее, ипчі дее нымысчыларыма ол кӱннерде Худымны чайам, олар, тізең, ухаанҷылирлар“» (Илҷілернің 2:16—18).

14. Христианство тӧстелчеткен туста христианство тарадарында ипчілер хайдағ аарлығ тоғыстар иткеннер?

¹⁴ Пастағы векте ипчі кізілерге христианствоны тарадарында аарлығ тоғыс пирілген. Олар пасха кізілерге Худайның Хан-ӱлгӱзінеңер чоохтааннар паза искіріг тоғызынаң палғалыстығ киректер иткеннер (Лука 8:1—3). Кӧзідімге, Павел Фиваны «Кенхрей саардағы тигірибнің полысчызы» тіп адаан. Павел, аннаң хада тоғынған кізілерге изен читіргенде, нинҷе-де ипчілернің аттарын адаан. Оларның санында «Хан-пиге прай кӱстерін салған» Трифен паза Трифос полғаннар. Ідӧк ол «Хан-пиге матап тоғынчатхан» Персиданы сағысха кирген (Рим. 16:1, 12).

15. Пістің туста христианствоны тарадарында ипчі кізілер хайди араласчалар?

¹⁵ Амғы туста Худайның Хан-ӱлгӱзінеңер чахсы хабарны читі миллион азыра кізі искірче. Оларның кӧбізі аймах-пасха частығ ипчілер (Матф. 24:14). Олар пионерлер, миссионерлер полчалар паза Вефильде нымысчыланчалар. Псалмопевец Давид сарнаан: «Иегова устағ пирче; Чахсы хабарны искірчеткен ипчілер улуғ войско» (Пс. 68:11). Пу уғаа сын сӧстер! Иегова ипчі кізілернің аның кӧңнін толдырарында паза чахсы хабарны искірерінде араласчатханнарын уғаа аарлыға санапча. Ипчі кізілер ир кізілернің чооғын истерге кирек полчатханы, пір дее чоохтанмин, чоох истерге кирек полчатханын таныхтабинча.

Сым полбаан ікі ипчі

16, 17. Хайди Сарраның кӧзідімі ипчі кізілерге сӧбіреде постарының кӧрістерін чоохтирға чаратчатханын кӧзітче?

¹⁶ Иегова ипчілерге аарлығ тоғыстар пирчеткенде, ирлері аарлығ пӧгіннер алар алнында, ипчілерінең чӧптезіп аларға кирек ниместер бе? Ирлері іди итчетселер, хыйға тудынчалар. Библияда ипчілері, ирлерінең чараспин, тоғыр чоохтанғаннаңар алай иткеннеңер нинҷе-де кӧзідім пазылча. Ікі кӧзідім кӧр кӧреелер.

¹⁷ Сарраны Авраамның ікінҷі ипчізі улуғлабин сыхханда, Сарра Авраамға аны паза аның оолғын сығара сӱрібізерге чоохтаан. Авраамға ол сӧстерні истерге аар полған. Че Иегова ағаа теен: «Сарра оолахтаңар паза синің хул ипчіңнеңер чоохтаан ниме ӱчӱн пичелленме. Ол чоохтаан оңдайнаң тудын» (Быт. 21:8—12). Авраам, Иегованың чооғын истіп, Сарраның сурынызын толдыр салған.

18. Авигея, ирінең чӧптеспин, ниме идібіскен?

¹⁸ Навалның ипчізін, Авигеяны сағысха кир кӧреелер. Давид, Саулдаң, істі кӧйеечі ханнаң, тис чӧргенде, пір туста Навалның малларының хыринда чуртаан. Давид аннаң пір дее ниме албаан, че аның малларын арачылаан. Навал, тізең, чабал паза хазыр кізі полған. Давидтің кізілері андар киліп, чіҷең ниме сурғанда, ол, чахсы сағынып албин, оларны сӧклеп, сығара сӱрібіскен. Авигея, ол киректі ис салып, ниме иткен? Навалға пір дее ниме чоохтабин, ол ікі чӱс лепешка, ікі чоон кувшин хызыл араға, пис хой, пис сат хоорған тамах, изюмнаң иткен пір чӱс лепешка, инжирнең иткен ікі чӱс лепешка алып алып, маңзырап, Давидке паза аның кізілеріне апар пирген. Авигея орта тудынған ма? Я. Соонаң полған киректер анзын чахсы кӧзітчелер. Библияда Иегова Навалны ӧдірібіскен тіп пазылча. Нинҷе-де тус пазынаң Давид Авигеяны позына ипчее алып алған (1 Сам. 25:3, 14—19, 23—25, 38—42).

Махтаға турыстығ ипчі

19, 20. Ипчі кізіні ниме сынап махтаға турыстығ итче?

¹⁹ Ызых Пічік Иегованың кӧңнінҷе тудынчатхан ипчіні махтапча. Библияда Притчи тіп киндеде чахсы ипчідеңер чоохталча: «Ол кораллардаң хай-хай аарлығ. Аның ирі ағаа прай чӱрекнең ізенче паза ол пір дее хызылбас. Ипчізі ағаа чуртазы тооза хомай нимес, чахсы итче». Ағаа хоза, «Аның чоохтары хыйға, аның тілінде чахсы ла сӧстер. Ол ибдегі киректерін чахсы итче, хаҷан даа тусты тик иртірбинче. Палалары, турып алып, аны саблапчалар. Ирі, турып алып, аны тың махтапча» (Прит. 31:10—12, 26—28).

²⁰ Ниме ипчі кізіні сынап махтаға турыстығ итче? Притчи 31:30-та чоохталча: «Кӧӧленістіг кӧрім пірееде кізіні алаахтыр салча, кізінің сілии табырах ирт парча, че Иеговадаң хорыхчатхан ипчі махтаға турыстығ». Иеговадаң хорыхханына пу принцип хоостыра чуртааны кірче: «Ноо даа ирге пазы Христос полча, ипчізіне — ирі, Христосха, тізең, — Худай» (1 Кор. 11:3).

Худай пирген сыйых ӱчӱн алғыстығ полыңар

21, 22. а) Хоныхта чуртапчатханнарға Худайны махтирға хайдағ сылтағ пар? б) Ноға піске Иегова турғысхан ӱлгӱлерні паза главенство принципін улуғлирға кирек? (17-ҷі страницадағы рамканы кӧріңер.)

²¹ Хоныхта чуртапчатхан христианнарға Иеговаа алғыстығ поларға кӧп сылтағлар пар! Иегова оларға, чуртастарын піріктіріп, часкалығ ирепчілер чіли, чуртирға чаратхан ӱчӱн оларға уғаа алғыстығ поларға кирек (Руфь 1:9; Мих. 6:8). Иегова хоныхты тӧстеп салған, аннаңар сӧбіренің часказына ниме кирек полчатханын пілче. Сыбыра аның кӧңнінҷе тудыныңар. Андада хорғыстығ чир-чалбахта даа «Иегова пирчеткен ӧрініс сірернің сівееңер» полар (Неем. 8:10).

²² Ипчізіне, позына чіли, хынчатхан ирен ипчізіне паарсах паза айаачы пас полча. Аның Худайдаң хорыхчатхан ипчізі аны улуғлапча паза ағаа хабасча, аннаңар ол хынысха турыстығ. Оларның хонығы, тізең, махтаға турыстығ Худайны, Иегованы, саблапчатханы иң аарлығ.

Хайди нандырарҷыхсар?

• Иегова турғысхан устағ хоостыра, кем кемнің пазы полча?

• Ноға ирепчілерге удур-тӧдір улуғлазарға кирек?

• Христианка Худайға киртінминчеткен иріне хайди хайарға кирек?

• Ноға ирлерге, аарлығ пӧгіннер алар алнында, ипчілерінең чӧптезерге кирек?

[Ӱгредіг сурығлары]

[Рамка]

Ноға ӱлгӱні улуғлирға кирек?

Иегова хыйға чайаахтарның аразында ӱлгӱні паза главенство принципін турғыс салған. Анзы духовнай даа чайаахтарға, кізілерге дее туза полча. Пу принцип пос чуртаснаң орта тузаланарға паза Худайға пір чӧптіг нымысчыланып, аны саблирға оңдай пирче (Пс. 133:1).

Таңмалалған христианнар Иисус Христосты позының пазына санапчалар паза аның ӱлгӱзінде чӧрчелер (Еф. 1:22, 23). Нинҷе-де тус пазынаң «Оолғы Позын даа Худайның холына пирібізер. Худай андада прай нимее хан-ӱлгӱзін тудар» (1 Кор. 15:27, 28). Іди ол Иегованың ӱлгӱзінең чарасчатханын кӧзідер, аннаңар Худайға пирін салған кізілер ӧмеде паза сӧбіреде полған на кізінің пазы пар тіп принципче чуртапчалар (1 Кор. 11:3; Евр. 13:17). Ол принципче чуртапчатханыбысты кӧріп, Иегова ӧрінче паза пісті алғастапча (Ис. 48:17).

[Хоос]

Христианин полчатхан ипчее Худайның кӧңніне кірчеткен качестволарны тилідерге пазырыс полызар

[Хоос]

Ипчілер Хан-ӱлгӱнің кирегінде итчеткен киректерні Иегова аарлыға санапча