1. Давидтің Иеговаа хайдағ чувстволар полған? Ол чувстволар Давидті ниме иттіргеннер?

 ДАВИД ХАН пасхан: «Иегова илбек паза илбек махтаға турыстығ» (Пс. 145:3). Ол Иеговаа хынған, аннаңар аны «чыылығда саблаан» (Пс. 22:22; 40:5). Ікінҷілес чоғыл, сірер Иеговаа хынчазар паза аны, Давид чіли, махтирға хынчазар. Ол теен: «Иегова, пістің пабабыстың, Израильнің, Худайы, сағаа махтағ мӧгі тус ползын» (1 Лет. 29:10—13).

2. а) Иегованы хайди сабландыр поларбыс? б) Пірее христианнар хайдағ сидікке урунчалар? Пу статьяда ниме ӱзӱрербіс.

² Хайди Иегованы саблирға? Кӧзідімге, христианскай чыылығда аралазарға. Че пірее харындас-пиҷелерге ӱзӱрігде аралазарға уғаа аар. Олар аралазарға хынчалар, че хорыхчалар. Хайди ол хорығысты тобырып аларға? Чыылығларда аралазып, удур-тӧдір кӧңнілерібісті кӧдірізерге хайдағ чӧптер полызарлар? Пу сурығларға нандырығлар таап алар алнында, ноға чыылығларда араласчатханыбысха тӧрт ӧӧн сылтағ кӧр кӧреелер.

3—5. а) Еврейлерге 13:15-тің хоостыра ноға піс чыылығлардағы ӱзӱрігде араласчабыс? б) Чыылығда прайзыбысха пір тиң аралазарға кирек пе? Чарыда чоохтап пиріңер.

³ Иегова піске полғаныбысха аны махтирға оңдай пирген (Пс. 119:108). Пістің чыылығларыбыста нандырығ пиргені «аастаң сыххан» тайығларның пірсі. Ол тайығны пістің ӱчӱн пірдеезі пир полбас. (Еврейлерге 13:15 хығырыбызыңар.) Че Иегова аның нымысчылары прайлары пір тиң тайығ пирзіннер тіп киректепче бе? Чох!

⁴ Иегова пілче: полған на кізінің чуртазы паза способностьтары пасха, аннаңар піс ағаа пир полчатхан тайығларны ол уғаа аарлыға санапча. Иегова израильтяннардаң хайдағ тайығ алғанын сағысха кир кӧреелер. Піреезі чиит хой алай ӧске тайыға пирҷең, че израильтянин хызылып чуртапчатса, ағаа сас алай иб тахырағын тайыға пирерге чарадылҷаң. Че анзына даа ахчазы читпезе, иң чахсы унның ефаның онынҷы чардығын пирерге чарадылҷаң (Лев. 5:7, 11). Унның паазы ниик полған, че иң чахсы ла унны тайыға пирзелер, Иегова анзын аарлыға санаҷаң.

⁵ Пістің Худайыбыс алыспаан. Ол пісті, Аполлос чіли, сіліг паза, Павел чіли, кӱстіг сӧстернең чоохтанзыннар тіп сағыбинча (Илҷ. 18:24; 26:28). Ол пісті чыылығларда, прай кӱзібіс салып, аралассыннар тіп сағыпча. Иегова пістең піс ит полбас нимені сағыбинча. Чох чуртаан ӧкіс ипчіні сағысха кир кӧріңер. Ол ікі оох ахча тайыға пирген. Иегова аның тайиин уғаа аарлыға санаан. Ол пар нимелерінің иң чахсызын тайыға пирген нооза (Лука 21:1—4).

6. а) Чыылығларға килчеткеннернің нандырығлары Еврейлерге 10:24, 25 хоостыра піске хайди теепчелер? б) Ӱзӱрігде араласчатханнарның кӱстенчеткеннерін аарлапчатханнарыбысты хайди кӧзіт пирерге?

⁶ Ӱзӱрігде араласчатсабыс, піс кӧңнілерібісті кӧдірісчебіс. (Еврейлерге 10:24, 25 хығырыбызыңар.) Піс харындас-пиҷелернің аймах-пасха комментарийлерін истерге хынчабыс. Палаларның прай чӱрекнең чоохтаан сӧстеріне ӧкерсінчебіс. Сынны ӱр ниместе піліп алған кізілернің сӧстерінде кӧңнілері чалбырапчатханы пісті ӧріндірче. Уйатчыл алай тілні хомай пілчеткен харындас-пиҷелернің постарының сағыстарынаң ӱлескені пісті хайхатча (1 Фес. 2:2). Оларның кӱстенчеткеннерін аарлыға санапчатханыбысты хайди кӧзідерге? Чыылығ соонда оларны пирген нандырығлар ӱчӱн махтирға чарир. Ідӧк позыбысха чыылығда аралазарға чарир. Андада пістің не кӧңнібіс кӧдірілбес, пасхаларының даа кӧңнілері кӧдірілер (Рим. 1:11, 12).

7. Ӱзӱрігде араласханы нименең туза?

⁷ Ӱзӱрігде араласханы піске постарыбысха туза (Ис. 48:17). Ноға? Пастағызын, аралазарға хынчатсабыс, піске чахсы тимненерге кирек. Чахсы тимненгені Худай Сӧзін тирең арах пілерге полызар. Худай Сӧзін нинҷе кӧп пілербіс, анҷох кӧп аннаң чуртазыбыста тузаланарбыс. Ікінҷізін, чыылығда аралассабыс, чыылығдаң кӧп арах ӧрініс аларбыс. Ӱзінҷізін, тимненерге кӱс саларға кирек, аннаңар чыылығда ӱлескен сағыстарыбысты ӱр ундутпаспыс.

8, 9. а) Чыылығларда араласчатсабыс, Иегова ниме чувствовать полча? Анзы Малахия 3:16-даң хайди кӧрінче? б) Ноға пірее христианнар ӱзӱрігде араласпинчалар?

⁸ Киртінізібістеңер чоохтапчатсабыс, Иегованы ӧріндірчебіс. Ікінҷілес чоғыл, Иегова пістің нандырығларыбысты исче паза нандырығ пирер ӱчӱн кӱс салғаныбысты аарлыға санапча. (Малахия 3:16 хығырыбызыңар.) Аны ӧріндірер ӱчӱн, прай кӱс салчатсабыс, ол пісті алғастапча (Мал. 3:10).

⁹ Хайди кӧрчебіс, христианскай чыылығларда аралазарға пістің уғаа кӧп сылтағлар пар. Че андағ даа полза, піреелері хол кӧдірерге хорыхчалар. Сірер дее хорыхчатсар, хомзынмаңар. Библейскай принциптер, тузалығ чӧптер паза чуртаста полған киректер кӧрібізеелер. Олар піске прайзыбысха чыылығларда удаа арах аралазарға полызарлар.

10. а) Кӧп христианнар нимедең хорыхчалар? б) Андағ хорығыс ниме кӧзітче?

¹⁰ Нандырығ пирерге хол кӧдірерге сағыс полза, чӱректерің талбырап сыхчатса, пичелленмеңер: сірер чалғызан нимессер. Піс прайзыбыс таа чыылығда аралазарға хорыхчабыс. Хорығыстарға пастыр салбас ӱчӱн, піске ноға хорыхчатханыбысты піліп аларға кирек. Чоохтирға иткен сағысты чідір саларға алай саба нандырыбызарға хорыхчазар, арса. Пасха кізілер чіли, чахсы нандырығ пир полбаспын тіп сағынчазар, арса. Сірернің андағ сағыссырастар полза, чахсы. Анзы сірер пазымнығ паза пасхаларын постарыңнаң пӧзік санапчатхан кізі полчатханын кӧзітче. Иегова пазымнығ кізілерге хынча (Пс. 138:6; Флп. 2:3). Олох туста, Иегова ӧме чыылығларында аның адын сабландырзыннар паза харындас-пиҷелер кӧңнілерін кӧдіріссіннер тіп хынча (1 Фес. 5:11). Худай сірерге хынча, аннаңар махачы поларға хайди даа полыс пирер.

11. Библиядағы хайдағ сағыстар хорығысха пастыр салбасха полыс пирерлер?

¹¹ Библиядаң нинҷе-де сағыс кӧр кӧреелер. Анда піс прайзыбыс саба чоохтаныбысчабыс тіп пазылча (Иак. 3:2). Иегова пістең алҷаас чох чоохтанарыбысты сағыбинча. Пістің харындас-пиҷелер ідӧк анзын сағыбинчалар (Пс. 103:12—14). Олар пістің духовнай сӧбіребіс, олар піске тың хынчалар (Марк 10:29, 30; Иоанн 13:35). Пірееде сағыстарыбысты орта чоохтап полбинчатханыбысты олар пілчелер.

12, 13. Неемияның паза Ионаның кӧзідімнері пісті нимее ӱгретчелер?

¹² Библиядағы пірее кӧзідімнердеңер сағын кӧреелер, олар піске хорығысты тобырып аларға полыс пирерлер. Кӧзідімге, Неемия. Ол илбек ханның нымысчызы полған. Иерусалимнің стенелері паза хаалхалары, иңзеріл парып, чатчатханын ис салып, ол тың ачырған парған (Неем. 1:1—4). Хан Неемиядаң ноға андағ мӧгіссің тіп сурғанда, Неемияның чӱрее тың талбырап сыххан полар. Неемия, сах андох пазырып алып, ханға прай ниме чоохтап пирген. Анзы нимее ағылған? Хан Худайның чонына полыс пирген (Неем. 2:1—8). Ідӧк Ионаның кӧзідімін кӧр кӧреелер. Иегова аны Ниневияда чуртапчатхан кізілерге Худай сӧзін искірерге ысханда, ол саңай пасха саринзар, Фарсиссер пар сыххан (Иона 1:1—3). Че Худайның полызиинаң ағаа пирген тоғысты ол ит салған. Ол иткен тоғыс сылтаанда, Ниневиядағы чуртағҷылар пыросынғаннар паза арачыланып алғаннар (Иона 3:5—10). Неемияның кӧзідімі нандырар алнында пазырарға кирек полчатханына ӱгретче. Ионаның кӧзідімі кӧзітче: Иегова, піс хорыхчатсабыс таа, ағаа нымысчыланарға полыс пирер. Сағын кӧріңер: пістің харындас-пиҷелер Ниневияда чуртаан кізілер осхас хорығыстығлар ба?

¹³ Хайдағ чӧптер піске нандырығларыбыснаң кізілернің кӧңнілерін кӧдірерге полызар? Ол чӧптернің піреезін ӱзӱрібізеелер.

14. Чыылығларға ноға чахсы тимненерге кирек паза хаҷан тимненерге?

¹⁴ Полған на чыылыға тимненіңер. Азынада тимненгені паза материалны чахсы пілгені ӱзӱрігде аралазарға хорыхпасха полызар (Прит. 21:5). Хаҷан тимненерге полған на кізі позы пӧкче. Кӧзідімге, 80 азыра частығ ӧкіс ипчі Элоиз «Сторожевой башнядағы» статьяға, неделя пасталчатса, тимненче. Ол чоохтапча: «Азынада тимненіп алзам, чыылығлардаң кӧп арах ӧрініс алчам». Кӱн тооза тоғынчатхан пиҷе Джой «Сторожевой башнядағы» статьяға субботада тимненче. Ол тіпче: «Наа ла тимненіп алзам, чыылығда аралазарға оой арах полча». Ӧмеде кӧп тоғыс итчеткен ах сағал паза пионер Айк піди тіпче: «Мин прай материалны пір саңайға тимнебинчем. Неделя аразында кӧместең тимненчем».

15. Чыылыға хайди чахсы тимненіп аларға?

¹⁵ Хайди чыылыға чахсы тимненіп аларға? Тимненер алнында Иеговадаң ызых хут сурынып ал турыңар (Лука 11:13; 1 Иоан. 5:14). Нинҷе-де минутаа материалнаң танызып алыңар: заголовокты, подзаголовоктарны, хоостарны паза рамкаларны кӧріп алыңар. Абзацтарны ӱгренчетсер, абзацтарда пирілген библейскай стихтарны хығырыңар. Хығырып алған нимедеңер сағынып алыңар. Ӱлезерге сағынчатхан сағыстарға кӧп арах хайығ салыңар. Нинҷе кӧп тимненерзер, анҷох кӧп туза аларзар паза аралазарға анҷох ниик полар (2 Кор. 9:6).

16. Хайдағ электроннай тиріглернең тузаланҷаң оңдай пар паза хайди оларнаң тузаланчазар?

¹⁶ Сірер пілчеткен тілнең электроннай тиріглер пар полза, оларнаң тузаланыңар. Иегова паза аның организациязы піске чыылығларға тимненерге полысчатхан электроннай тиріглер сығарғаннар. Кӧзідімге, JW Library^®, ол приложениені смартфонға алай планшетке турғызып алза, істесчең материалны андар скачивать полып аларға чарир. Андада істесчең материалны хайда даа, хайдағ даа туста хығырып аларға алай истіп аларға чарир. Кӧзідімге, пірее харындас-пиҷелер ӱгренҷең материалны чолда алай тоғыста паза школада обед тузында істесчелер. Пірее сурығларны тирең арах істезерге сағынчатсабыс, электроннай библиотеканаң алай «Сторожевой башняның онлайн-библиотеказынаң» тузаланарға чарир.

17. а) Ноға нинҷе-де нандырығ тимнеені чахсы? б) «Стань другом Иеговы. Подготовь свой комментарий» тіп видеороликтең ниме піліп алғазар?

¹⁷ Полған на статьяға нинҷе-де комментарий тимнеп саларға кӱстеніңер. Ноға? Сірер тимнеп салған сурыға чыылығ иртірчеткен харындас пасха кізіні сурыбысса, сірер нандыр полбассар. Харындас прайларын сурза, чыылыға пирілген тусха ӱзӱрігні иртірерге маңнанмас. Аннаңар, пастап сірерні сурбаза, ачырғанмаңар. Нинҷе-де нандырығ тимнеп салзар, аралазарға кӧп арах оңдай полар. Библияның стиғын хығырарға паза постың сӧстерінең нандырығ пирерге тимнен саларға чарир *.

18. Ноға хысхаҷахти нандырғаны чахсы?

¹⁸ Нандырығларың хысхаҷах ползын. Хайдағ нандырығлар харындас-пиҷелернің кӧңнілерін кӧдір поларлар? Хысхаҷах паза олаңай. Аннаңар хысхаҷах нандырығлар пирерге кӱстеніңер. Нандырығлар 30 секундадаң артых полбазыннар (Прит. 10:19; 15:23). Нинҷе-де чыл нандырығлар пирчетсер, хысхаҷах комментарийлер пиріп, пасхаларына кӧзідім полыңар. Узун нандырығлар пирзер, наа харындас-пиҷелер мин андағ нандырығ хаҷан даа пир полбаспын тіп сағынарлар. Ағаа хоза, хысхаҷах нандырығлар пасха харындас-пиҷелерге аралазарға оңдай пирче. Сірерні пурун сурзалар, кӧні нандырығ пирерге кӱстеніңер. Абзацтағы прай сағыстарны чоохтирға кӱстенмеңер. Ӧӧн сағыс чоохтал парза, хоза сағыстарны чоохтирға чарир. ( «Нандырығлар хайдағ поларға кирек?» тіп рамканы кӧріңер.)

19. Хайдағ-да сурыға нандырарға хынчатсар, ниме итсе, чахсы полар?

¹⁹ Ӱзӱріг иртірчеткен харындасха хайдағ абзацха нандырығ пирерге хынчатханыңарны азынада чоохтап пиріңер. Харындас ол абзацха сурығ сурза, ол сірерні кӧр салзын тіп, холыңарны пӧзік кӧдіріңер.

20. Ӧме чыылиин ноға нанҷыларнаң хада азыранғанынаң тиңнестірерге чарир?

²⁰ Ӧме чыылиин нанҷыларнаң хада пір стол кистінде азыранғанынаң тиңнестірерге чарир. Кӧзідімге, сірерні ааллап хығырғаннар паза олаңай чіҷең ниме, ит салып, ағыл килерге сурынғаннар. Сағыссыразар даа, прайзының кӧңніне кірер чіҷең ниме ит саларға кӱстенерзер. Чыылығларда Иегова уғаа пай стол салча (Пс. 23:5; Матф. 24:45). Пар нименің иң чахсызын ағаа пирзебіс, ол ӧрінче. Аннаңар чыылығларға чахсы тимненіңер паза холларыңны удаа кӧдіріңер. Андағ оңдайнаң Иегова салған столға постарың на ӧрінмессер, пасхаларын даа ӧріндірерзер.