1. Адамнаң Ева ниме чідір салғаннар паза анзы нимее ағылған?

 ХАЙДИ сағынчазар, чахсыны чабалдаң талластырарға полысчатхан нормаларны кем пирерге кирек? Адамнаң Ева чахсы-чабалны пілерге полысчатхан ағастың чистегін чібіскенде, Иеговаа ізенминчеткеннерін, аның чахсыны чабалдаң талластырҷаң нормаларын нимее салбинчатханнарын кӧзіт пиргеннер. Нимедір андағ чахсы ниме, нимедір андағ чабал ниме олар постары пӧгерге хынғаннар (Быт. 3:22). Че сағын кӧреелер: анзы нимее ағылған? Олар Иегованаң ынархастарын паза мӧгі чуртирға оңдайларын чідір салғаннар. Ағаа хоза, олар тӧліне чазых паза ӧлім ӱлӱске пиргеннер (Рим. 5:12). Адамнаң Еваның андағ пӧгіні прайзына ирее паза чобағ ағылған.

2, 3. а) Филипп Худай сӧзін искірген эфиоп евнух ниме идібіскен? б) Кіреске тӱсчетсебіс, піс хайдағ алғастар алчабыс паза хайдағ сурығлар ӱзӱрібізербіс?

² Амды, Филипп эфиоп евнухха Худай сӧзін искіргенде, ол евнух хайди тудынғаннаңар сағын кӧреелер. Иегованаң Иисус ағаа иткен нимелер ӱчӱн ол алғыстығ полған, аннаңар олох кӱнде кіреске тӱскен (Илҷ. 8:34—38). Иеговаа пазырыста чуртазыбысты пирчетсебіс паза кіреске тӱсчетсебіс, ниме кӧзітчебіс? Піс Иегованаң Иисусха олар піске иткен нимелер ӱчӱн алғызыбысты читірчебіс. Ідӧк Иеговаа ізенчеткенібісті паза чахсыны чабалдаң талластырҷаң нормаларны турғызарға аның правозы парын санға алчатханыбысты кӧзітчебіс.

³ Сағын кӧреелер, Иеговаа нымысчыланып пастапчатсабыс, хайдағ алғастар алчабыс. Ол піске Адамнаң Ева прай чідір салған нимені, оларның санында мӧгі чуртасты, нандыра айландыр пирерге молҷағ пирче. Иисус Христосха киртініске тӧстеніп, Иегова пістің алҷаастарыбысты тастапча паза арығ совесть пирче (Матф. 20:28; Илҷ. 10:43). Ағаа хоза, піс Иегованың сӧбірезінің чардығы пол парчабыс (Иоанн 10:14—16; Рим. 8:20, 21). Ол сӧбіредегі нымысчыларны чахсы алнынзархы чуртас сағыпча. Иеговаа нымысчыланыс анзына турыстығ. Че Иегованы піліп алғаннарның піреелері эфиоп евнухтың кӧзідімінҷе тудынарға тідінминчелер. Оларға ниме харығ полча? Паза ол харығ полчатхан нимелерні хайди тобырып аларға?

4, 5. Эйвери паза Ханна хайдағ сидіктерге урунғаннар?

⁴ Посха ізенмеені. Эйвери Иегованың киречілерінің сӧбірезінде ӧскен. Аның пабазын, хынчатхан паба паза уғаа чахсы ах сағал чіли, пілчелер. Андағ даа полза, Эйвери кіреске тӱзерге маңзырабаан. Ноға? Ол піди тіпче: «Мин сағынғам, мин пабам осхас пол полбаспын». Ағаа хоза, Эйвери, кіреске тӱскен соонда, ағаа пирілер тоғыстарны ит полбаспын тіп санаан. Ол тіпче: «Миннең пазырарға, чоох чоохтирға алай нымысчыланысха чыылығ иртірерге сурынарлар тіп хорыххам».

⁵ Он сигіс частығ Ханна позына ізенминчеткен кізі полған. Аның іҷе-пабазы Иегованың киречілері полған полза даа, ол позы Худайның нормаларынҷа чуртап поларында ікінҷілеен. Ноға? Ханна позын нимее чарабас кізее санаан. Пірееде ол, чобалчатса, позы позын палығлаҷаң. Че ағаа хомайдаң хомай полып одырҷаң. Ол тіпче: «Мин аннаңар пір дее кізее чоохтабаам, іҷе-пабама даа. Иегова андағ нымысчаа хынмас тіп сағынғам».

6. Ванессаа кіреске тӱзерге ниме харығ полған?

⁶ Нанҷылардаң хорыхханы. 22 частығ Ванесса чоохтапча: «Минің ӧӧрем полған. Піс аннаң он чыл нанҷыласхабыс». Ванесса кіреске тӱзерге хынған, че ӧӧрезі анзына хынмаан. Аның ӱчӱн Ванессаа уғаа хомай полған. Ол чоохтапча: «Мағаа кізілернең танызарға сидік, аннаңар пу ӧӧремнең нанҷыласпин сыхсам, наа ӧӧре таап полбаспын тіп хорыххам».

7. Макейла нимедең хорыххан паза ноға?

⁷ Алҷаас ит саларға хорыхханы. Макейлаа пис час полғанда, аның харындазын ӧмедең сығарыбысханнар. Аның харындазының тудынызы іҷе-пабазына хайдағ чобағ ағылчатханын ол кӧрген. Макейла чоохтапча: «Мин, кіреске тӱзіп алып, пірее алҷаас ит салзам паза аның ӱчӱн мині ӧмедең сығарыбыссалар, іҷе-пабама хай-хай хомай полар тіп хорыххам».

8. Майлз нимедең хорыххан?

⁸ Тоғырланыстаң хорыхханы. Майлзтың пабазы паза ӧӧй іҷезі — Иегованың киречілері, іҷезі, тізең, чох. Ол чоохтапча: «Мин іҷемнең 18 чыл чуртаам. Кіреске тӱзерге хынчам тіп ағаа чоохтирға хорыххам. Пабам Иегованың киречізі поларға пӧгін алғанына іҷем хайди ӱндескенін ундутпинчам. Ол мағаа ідӧк тоғырланар тіп хорыххам».

9. Иегованың хынызынаңар паза тыстанызынаңар алған пілістер сірерні ниме идерге кӧӧктірер?

⁹ Адамнаң Еваның Иеговаа хыныстары читпеен, аннаңар олар Иеговадаң хыйа парыбысханнар. Андағ даа полза, Иегова оларға нинҷе-де тус чуртирға оңдай пирген. Пос оңдайынаң палаларын ӧскірерге чаратхан. Адамнаң Еваның Худай чох чуртирға пӧгін алғаны хайдағ хомай сағыс полғаны ӱр ниместең кӧрін парған. Оларның улуғ оолғы пыро чох туңмазын ӧдірібіскен. Пола-пола кізілер постарынаңар ла сағын сыхханнар паза чабал пол парғаннар (Быт. 4:8; 6:11—13). Че Иегова ағаа нымысчыланарға хынчатхан Адамнаң Еваның тӧліне арачыланып аларға оңдай асхан (Иоанн 6:38—40, 57, 58). Иегованың хынызынаңар паза тыстанызынаңар нинҷе кӧп піліп одырарзар, анҷох ағаа хынызыңар ӧзер. Адамнаң Ева таллап алған чолны артыс саларға паза Иеговаа пазырыста чуртазыңарны пирібізерге хынарзар.

10. Псалом 19:7-деңер сағынғаны Иеговаа нымысчыланарға пӧгін аларға хайди полыс пирер?

¹⁰ Иеговадаңар піліс аларын тохтатпаңар. Иегованы нинҷе кӧп піліп одырарзар, анҷох кӧп ағаа нымысчылан поларында ікінҷілебессер. Пу статьяда чоохталған Эйвери чоохтапча: «Мин Псалом 19:7-гі сӧстердеңер сағынып, ікінҷілебин сыххам». (Хығырыбызыңар.) Иегова пирген сӧстерін толдырчатханын Эйвери позының чуртазында кӧрген, аннаңар аның хынызы пик пол парған. Иеговаа хыныс ікінҷілебеске паза иң пастағызын аннаңар паза аның кӧңнін толдырарынаңар сағынарға полысча. Ханнадаңар чи, ниме тирге чарир? Ол чоохтапча: «Библияны хығырып паза пос алынҷа ӱгреніп, мин піліп алғам: позымны палығлап, Иегованың чӱреен ағыртчам» (1 Пет. 5:7). Ханна Худай Сӧзінең алған пілістерҷе чуртап сыххан (Иак. 1:22). Анзы нимее ағылған? Ханна чоохтапча: «Иегованың сӧзінҷе чуртааным хайдағ туза ағылчатханын кӧргем, аннаңар минің хынызым хай-хай пик пол парған. Амды мин пілчем: мағаа полызығ кирек полза, Иегова мині орта чолҷа апарар». Ханна позын паза палығлабин сыххан, чуртазын Иеговаа пир салып, кіреске тӱскен.

11. Хайди Ванесса чахсы нанҷылар таап алған паза анзы пісті нимее ӱгретче?

¹¹ Нанҷыларны орта таллаңар. Ванесса ӧӧрезінең чағын нанҷыласханы ағаа Иеговаа чуртазын пирібізерге харығ полчатханын піліп алған. Аннаңар ол ӧӧрезінең нанҷыласпин сыххан паза ӧмеде нанҷылар таап аларға кӱстенген. Ванесса ағаа Нойның паза аның сӧбірезінің кӧзідімі полыс пирген тіпче. Ол чоохтапча: «Олар Иеговаа хынмаан кізілер аразында чуртааннар, че удур-тӧдір пик палғалыстығ полғаннар». Ванесса, кіреске тӱзіп алып, пионер полып, нымысчылан сыххан. Амды ол піди чоохтапча: «Іди мин позымның ӧмемде ле нимес, пасха даа ӧмелерде чахсы нанҷылар таап алғам». Иегова пирген тоғыста, прай кӱс салып, аралассар, сірернің ідӧк чахсы нанҷылар полар (Матф. 24:14).

12. Адамнаң Еваның хайдағ хорғыс чох полған паза анзы нимее ағылған?

¹² Худайдаң хорығарға ӱгреніңер. Пірееде хорыхханы туза полча. Кӧзідімге, Иегованы ачырғандырарға хорығарға кирек (Пс. 111:10). Адамнаң Еваның чӱректерінде андағ хорғыс полған полза, олар хаҷан даа Иеговадаң хыйа айланмасчыхтар. Олар ағаа тоғырланғанда, оларның харахтары азыл парған: чазыхтығ пол парғаннарын піліп алғаннар. Амды олар палаларына ӱлӱске чазых паза ӧлім не пир полғаннар. Ниме ит салғаннарын піліп алып, Адамнаң Ева чалаас чӧрчеткеннеріне уйат сыхханнар паза наннарын чаап салғаннар (Быт. 3:7, 21).

13, 14. а) 1 Петрның 3:21 хоостыра, ноға ӧлімнең иртіре хорығарға кирек чоғыл? б) Иеговаа хынарға хайдағ сылтағлар пар?

¹³ Пір саринаң піске Иегованы ачырғандырарға хорығарға кирек, пасха саринаң ӧлімнең иртіре хорыхпасха кирек. Иегова піске мӧгі чуртирға оңдай ас пирген. Чазых ит салып, прай чӱрекнең пыросынчатсабыс, Иегова Иисус Христостың тайиина тӧстеніп, пыробысты тастир. Анзына киртінчеткенібіс ӧӧнінде, чуртазыбысты Худайға пиріп, кіреске тӱсчеткенібістең кӧрінче. (1 Петрның 3:21 хығырыбызыңар.)

¹⁴ Пістің Иеговаа хынарға уғаа кӧп сылтағлар пар. Ол пирчеткен нимелер пісті кӱннің сай ӧріндірчелер. Ол піске позынаңар паза сағынған сағыстарынаңар сыннарны асча (Иоанн 8:31, 32). Христианскай ӧме пастыра піске хабасча паза пісті ӱгретче. Сидіктерібісті тобырарға полысча паза райда мӧгі чуртирға ізеніс пирче (Пс. 68:19; Аз. ч. 21:3, 4). Иегова, хынызын кӧзідер ӱчӱн, піске нинҷе кӧп ниме ит салғаннаңар сағынзабыс, ағаа удур хынмин пол полбаспыс. Иеговаа хынзабыс, тізең, аның чӱреен ағыртарға хорығарбыс.

15. Макейла алҷаас ит саларға хорыхханын хайди тобырып алған?

¹⁵ Ӱстӱнде чоохталған Макейла Иеговаа чазыхтарыбысты хыныснаң тастапчатханын піліп алғанда, алҷаас идерінең иртіре хорыхпин сыххан. Ол чоохтапча: «Піс прайзыбыс толдыра нимеспіс, аннаңар алҷаастар идербіс. Иегованың піске хынчатханы паза толыға тӧстеніп, пыроларыбысты тастапчатханы ам на чӱрееме читкен». Макейла Иеговаа хынған, аннаңар ағаа пазырыста чуртазын пирібіскен паза кіреске тӱскен.

16. Майлз хорғызын хайди тобырып алған?

¹⁶ Кіреске тӱзерге итчеткеннеңер піліп алза, іҷезі тоғырланар тіп хорыххан Майлз аймах ах сағалынзар айланған. Майлз чоохтапча: «Аймах ах сағалының іҷе-пабазының пірсі ле Иеговаа нымысчыланған. Ол мағаа кіреске тӱзерге пӧгініңні пабаң нимес, син позың алғаныңа іҷеңні хайди киртіндіріп аларға сағынып ал теен». Майлзтың іҷезі тың чабалланған. Пола-пола ағаа оонаң чуртирға парыбызарға киліскен, че кіреске тӱзерге сағызын тастабаан. Ол чоохтапча: «Иегова мағаа нинҷе кӧп уғаа чахсы нимелер ит салғанын піліп алғамда, минің чӱреем тибіреен. Иисус Христос пирген тайығдаңар тирең сағынып, Иегова мағаа нинҷе тың хынчатханын кӧр салғам, аннаңар мин чуртазымны Иеговаа пирібізіп, кіреске тӱзіп алғам».

17. Пістің прайзыбыстың хайдағ оңдай пар?

¹⁷ Чахсы-чабалны талластырарға полысчатхан ағастың чистегін чібізіп, Ева Пабазынаң хыйа айланыбысхан. Адам, тізең, Еваа хозылып, ағаа кӧп чахсы ниме иткен Иеговаа алғыстығ полбаанын кӧзіт пирген. Оларға тӧӧй поларға хынминчатханыбысты піс прайзыбыс кӧзіт поларбыс. Кіреске тӱзіп, Иегованың чахсы-чабалның нормаларын турғызарға правозы парына киртінчеткенібісті кӧзітчебіс. Пабабысха хынчатханыбысты паза ағаа ізенчеткенібісті киречілепчебіс.

18. Хаҷан Иеговаа нымысчыланыс чахсы салтарларға ағылар?

¹⁸ Кіреске тӱскен соонда, піске кӱннің сай, позыбыстың нимес, Иегованың нормаларынҷа чуртирға кӱстенерге кирек. Худайның нинҷе-нинҷе миллион нымысчылары іди чуртапчалар. Библиядаң пілістер аларын тохтатпазар, харындас-пиҷелернең сыбыра айғассар, тигірдегі хыныстығ Пабабыстаңар пасхаларына чоохтирға хынзар, сірер дее іди чуртап поларзар (Евр. 10:24, 25). Пӧгін алчатсар, Иегова Библияның паза позының организациязының пастыра пирчеткен чӧптер хоостыра тудыныңар (Ис. 30:21). Анзы чахсы салтарларға ағылар (Прит. 16:3, 20).

19. Нимедеңер хаҷан даа ундутпасха кирек паза ноға?

¹⁹ Иегованың чӧптері сірерге нинҷе кӧп алғастар ағылчатханын піліп алзар, сірер ағаа паза аның нормаларына уламох тың хын сығарзар. Андада Сайтан сірерге Иеговаа нымысчыланарға харығ пол полбас. Постарыңны 1000 чыл пазынаң кӧр кӧріңер. Ікінҷілес чоғыл, кіреске тӱзерге пӧгін алғаныңарны сағысха киріп, сірер тирзер: «Ол пӧгін иң чахсы пӧгін полған!»