1, 2. Илҷілернің 8:27—31, 35—38 хоостыра, эфиоп пастыхты кіреске тӱзерге ниме кӧӧктірген?

 ХРИСТОСТЫҢ ӱгренҷізі полып аларға паза кіреске тӱзерге хынчазар ба? Кӧп кізілер кіреске тӱзіп алғаннар. Оларны ол алтымны идерге хыныс паза алғыстығ чӱрек кӧӧктірген. Эфиоп хан ипчее нымысчыланған пастых кізінің кӧзідімін кӧр кӧреелер.

² Ызых Пічіктең алған пілістер сылтаанда, ол пастых, соона салдырбин, тудынған. (Илҷілернің 8:27—31, 35—38 хығырыбызыңар.) Ноға ол іди тудынған? Ікінҷілес чоғыл, ол Худай Сӧзін уғаа аарлыға санаан. Анзы ол, чолда парчадып, Исайя ухаанҷының киндезін хығырғанынаң кӧрінче. Филиппнең чоохтасхан соонда, Иисус ағаа иткен нимелернің ӱчӱн ол алғыстығ пол парған. Че ноға ол пастых кізі Иерусалимзер килген? Аның чӱреенде Иеговаа хыныс полған. Анзын хайдаң пілчебіс? Ол Иерусалимзер Иеговаа пазырарға килген. Ол, позының чонының худайларын артыс салып, сын Худайға пазырчатхан чонға хозыл парған полар. Иеговаа хыныс аны паза пір аарлығ алтым идерге кӧӧктірген — ол, кіреске тӱзіп алып, Христостың ӱгренҷізі полып алған (Матф. 28:19).

3. Кіреске тӱзерге ниме харығ поларға айабас? ( «Сірернің чӱрееңерні хайдағ чирнең тиңнестірерге чарир?» тіп рамканы кӧріңер.)

³ Хыныс кіреске тӱзерге кӧӧктірче. Че хынызох кіреске тӱзерге харығ поларға айабас. Мына нинҷе-де кӧзідім. Иеговаа нымысчыланминчатхан туғаннарға паза нанҷыларға тың хынчатса, кізі піди сағынарға айабас: «Кіреске тӱзіп алзам, олар миннең хыйа айланыбызарлар» (Матф. 10:37). Алай сірер Иегова хырт кӧрчеткен киректер идерге кӧнік парғазар, арса. Аннаңар сірерге чуртазыңарны аның нормаларына килістіре алыстырып аларға сидік тее полар (Пс. 97:10). Алай сірер кічігдең сығара чой религияларнаң палғалыстығ ӱлӱкӱннерге паза кибірлерге хынчазар, арса. Оларны сағысха кирерге хынча поларзар. Аннаңар, ол ӱлӱкӱннер Иегованың кӧңніне кірбинчеткенін пілчетсер дее, олардаң хыйа тудын полбинчазар (1 Кор. 10:20, 21). Андағда сірер ікі чол аразында турчазар. Сірерге хайдар парарын таллап аларға кирек.

4. Иң ӧӧнінде кіреске тӱзерге пісті ниме кӧӧктірерге кирек?

⁴ Кізі кӧп нимее хынча паза кӧп нимені аарлыға санапча. Кӧзідімге, сірер, Иегованың киречілерінең тоғазар алнында, Библияны уғаа аарлығ кинде тіп санаан поларзар. Паза сірер Иисусха хынғазар, арса. Иегованың киречілерінең танызып алғанда, оларнаң чоохтазарға хынча поларзар. Че прай пу нимелер сірерні чуртазыңарны Иеговаа пирібізерге паза кіреске тӱзерге кӧӧктірбестер дее. Ӧӧнінде кізіні кіреске тӱзерге Иеговаа хыныс кӧӧктірерге кирек. Иеговаа прай нимедең артых хынчатсар, сірер ағаа нымысчыланарға харығ поларға пір дее нимее пирбессер. Иеговаа хынысты кіреске тӱзерге апарчатхан хаалхаларнаң паза, сынның чолында халып, Худайға киртістіг поларға полысчатхан сиденнең тиңнестірерге чарир.

5. Пу статьядаң ниме піліп аларбыс?

⁵ Иисус Иеговаа прай чӱреебіснең, прай кӧңнібіснең, прай сағызыбыснаң паза прай кӱзібіснең хынарға кирек тіп чоохтаан (Марк 12:30). Иеговаа іди тың хынарға паза аны іди улуғлирға хайди ӱгреніп аларға? Иегова піске нинҷе тың хынчатханнаңар сағынғаны пісті ағаа хынарға кӧӧктірер (1 Иоан. 4:19). Иеговаа хынар паза кіреске тӱзер ӱчӱн ниме идерге кирек? Анзын пу статьядаң піліп аларзар b.

6. Римдегілерге 1:20 хоостыра, Иеговадаңар піліп аларға хайдағ оңдай пар?

⁶ Иеговадаңар, аның чайаахтарын кӧріп, піліп одырыңар. (Римдегілерге 1:20 хығырыбызыңар; Аз. ч. 4:11.) Ӧзімнернің паза малларның пӱдізін кӧрчетсер, оларның Чайаачызының хыйғазын кӧрерге ӱгреніңер. Иді-сӧӧгіңернің пӱдізін чахсы арах піліп алыңар (Пс. 139:14). Сағын кӧріңер, Кӱн кічиҷек ле чылтыс, андағ чылтыстарның саны миллиардтар, че андағ даа полза, аның кӱзі уғаа илбек (Ис. 40:26) c. Прай ол нимелерні сизінзер, Иеговаа улам тың хайхирзар. Че Иегованың хыйғазын паза кӱзін не пілгені асхынах. Иеговаа тың хынып алып, аның нанҷызы полып алар ӱчӱн, аның пасха сариларын піліп аларға кирек.

7. Иеговаа тың хынар ӱчӱн, нимеде ікінҷілебеске кирек?

⁷ Иегова сірерге хынчатханына киртініп аларға кирек. Тигірні паза чирні чайаан Чайаачы сірерге хынчатханына киртін полчазар ба? Киртін полбинчатсар, піліңер: Иегова «пістің полғаныбыстаң на тың даа ырах нимес» (Илҷ. 17:26—28). Ол прай чӱректерні сыныхтапча, аннаңар Давид позының оолғына Соломонға чоохтаан сӧстернең ол сірерзер айланча тіп сағыныңар. Ол теен: «Аны тілезең, син аны таап аларзың» (1 Лет. 28:9). Сағын кӧріңер, ам сірер Библияны Иегова ла хынчатхан ӱчӱн ӱгренчезер. Иегова піди теен: «Сині позымзар киртістіг хыныснаң тартып алғам» (Иер. 31:3, «Наа тилекей», 2013 чыл, англ.). Иегова сірерге итчеткен нимелерні нинҷе кӧп аарлыға санирзар, ағаа анҷох тың хынарзар.

8. Иегованың хынызын аарлапчатханыбысты хайди кӧзіт пирерге?

⁸ Иегованың хынызын аарлыға санапчатханнарыңны хайди кӧзіт пирерге? Кӧзітчең оңдайларның пірсі — пазырыста аннаң чоохтазарға. Сағыссырастарыңнаң аннаң ӱлессер паза прай ол итчеткен киректернің ӱчӱн аны алғыстазар, ағаа хынызыңар ӧзіп одырар. Пазырыстарыңа нандырчатханын сизінзер, Иегованаң ынархазыңар пик арах полып одырар (Пс. 116:1). Ол сірерні піл полчатханын кӧрерзер. Че Иеговаа чағын полып алар ӱчӱн, ол сірердең ниме сағыпчатханын піліп аларға кирек. Прай ол нимелерні аның Сӧзін, Библияны ла ӱгреніп, піліп аларға чарир.

9. Библияны аарлапчатханыбысты хайди кӧзіт пирерге?

⁹ Худайның Сӧзін, Библияны, аарлыға санирға ӱгреніп алыңар. Иеговадаңар сынны паза аның сірердеңер сағын салған сағызын Библия ла асча. Библияны аарлыға санапчатханыңарны хайди кӧзіт пирерге? Аны кӱннің сай хығырыңар. Иегованың киречізі сірернең иртірчеткен ӱгредіге тимненіңер паза анда алған пілістернең тузаланыңар (Пс. 119:97, 99; Иоанн 17:17). Сірернің Библия хығырҷаң график пар ба? Ол график хоостыра хығырчазар ба? Библияны кӱннің хығырарға килісче бе?

10. Библия пасха кинделерге нименең тӧӧй нимес?

¹⁰ Библияда Иисус Христосты кӧрген кізілернің чоохтары пазыл парған. Паза пір дее киндеде андағ ниме пазылбаан. Библия ла Иисус піске ниме иткеннеңер киртістіг иде чарыда чоохтапча. Иисус сірерге ниме иткеннеңер паза чоохтааннаңар хығырзар, сірер аның нанҷызы полып аларға хыныбызарзар, арса.

11. Иеговаа хынарға хайди ӱгреніп аларға?

¹¹ Иисусха хынарға ӱгреніп алзар, Иеговаа тың арах хынарзар. Иисус Пабазына уғаа тӧӧй полған (Иоанн 14:9). Аннаңар, Иисустаңар нинҷе кӧп піліп одырарзар, анҷох кӧп Иегованы піліп аларзар паза ағаа хынызыңар улам ӧзер. Иисус чох-чоос, ағырығ паза уйан кізілерге хайди айаанын сағысха кир кӧріңер. Ідӧк аның тузалығ чӧптерін сағысха кир кӧріңер. Паза, ол чӧптернің хоостыра тудынчатсар, чуртазыңар хайди чахсы саринзар алысчатханнаңар сағын кӧріңер (Матф. 5:1—11; 7:24—27).

12. Иисустаңар піліс сірерні ниме идерге кӧӧктірер?

¹² Иисус пирген тайығ сылтаанда, сірернің чазыхтарың тасталар. Ол тайығдаңар тирең сағын чӧрзер, сірер Иисусха тың арах хын сығарзар (Матф. 20:28). Иисус позының чуртазын сірернің ӱчӱн ӧрініснең пирібіскенін піліп алзар, сірер пыросынарзар паза Иегова пыроңарны тастазын тіп хынарзар (Илҷ. 3:19, 20; 1 Иоан. 1:9). Иегованаң Иисусха хынып алзар, сірер оларға хынчатхан кізілернең нанҷылазарға хынарзар.

13. Иегова піске ниме пирген?

¹³ Иегованың сӧбірезіне хынарға ӱгреніп алыңар. Сірернің Иеговаа нымысчыланминчатхан туғаннарың паза нанҷыларың ноға сірер чуртазыңарны Иеговаа пирібізерге хынчатханыңарны піл полбинча поларлар. Олар сірерге тоғырлан таа сығарлар. Че Иегова сірерге духовнай сӧбіре пирген. Духовнай харындас-пиҷелернең ынархазыңарны хайраллазар, сірерге кирек хынысты паза хабазығны таап аларзар (Марк 10:29, 30; Евр. 10:24, 25). Пола-пола сірернің туғаннарың ідӧк Иеговаа нымысчыланарға паза аның нормаларынҷа чуртирға хыныбызарлар, арса (1 Пет. 2:12).

14. 1 Иоанның 5:3-гі сӧстер сын полчатханын хайди піліп алғазар?

¹⁴ Иегованың нормаларын улуғлирға паза оларның хоостыра чуртирға ӱгреніп алыңар. Иегованаң танызып алар алнында, сірер постарыңның нормалары хоостыра чуртаан поларзар. Ам, тізең, Худайның нормалары хоостыра чуртааны нинҷе артых полчатханын пілчезер (Пс. 1:1—3; 1 Иоанның 5:3 хығырыбызыңар). Библия ирлерге, ипчілерге, іҷе-пабаларға паза палаларға пирчеткен чӧптердеңер сағын кӧріңер (Еф. 5:22—6:4). Ол чӧптернең тузалан сыххан соонда, сӧбіредегі чуртазыңар чахсы саринзар алысхан ма? Иегова пирген чӧптер хоостыра нанҷыларны таллап алған соонда, сірер чахсы саринзар алыс парғазар ба? Часкалығ арах пол парғазар ба? (Прит. 13:20; 1 Кор. 15:33). «Я», — тіп нандырарзар тіп сағынчабыс.

15. Библиядағы принциптернің хоостыра тудынарға сірерге ниме полыс пирер?

¹⁵ Сірер хайди Библиядағы принциптер хоостыра тудынарға пірееде пілбинчезер, арса. Иегова анзын пілче, аннаңар позының организациязынаң пастыра библейскай литература, видеороликтер паза интернет-публикациялар пирче. Олар «чахсынаң чабалны талластырарға» полысчалар (Евр. 5:13, 14). Ол материалларны ӱгрензер, оларның тузазын паза хайди олар хап-орта чоохтапчатханнарын сизінерзер. Анаң Иегованың организациязының чардығы полып аларға хыныбызарзар.

16. Иегованың организациязының пӱдізі хайдағ?

¹⁶ Иегованың организациязына хынарға паза ағаа хабазарға ӱгреніп алыңар. Иегова позының нымысчыларын ӧмелерге чыып алған. Ӧмелернің пазына, тізең, позының Оолғын, Иисус Христосты, турғыс салған (Еф. 1:22; 5:23). Иисус таңмалалған христианнарны пӱӱн иділерге кирек тоғыснаң устирға турғыс салған. Оларны ол «ізестіг паза хыйға нымысчы» тіп адап салған. Ол группаа кірчеткен харындастар оларға пирілген тоғысты — сірерге духовнай чиис пирерін паза сірерні хайраллирын — прай чӱрекнең толдырчалар (Матф. 24:45—47). Ол нымысчының тоғызы ӧмедегі ах сағаллар пастыра кӧрінче (Ис. 32:1, 2; Евр. 13:17; 1 Пет. 5:2, 3). Ах сағаллар сірерні ӱгретчелер, арачылапчалар, часхарчалар паза сірерге Иегованың чағын нанҷылары полып аларға полысчалар. Ідӧк олар сірерге Иеговадаңар пасха кізілерге чоохтирға полысчалар (Еф. 4:11—13).

17. Римдегілерге 10:10, 13, 14 хоостыра, ноға піс Иеговадаңар кізілерге чоохтапчабыс?

¹⁷ Пасхаларын Иеговаа хынарға ӱгредіңер. Иисус позының ӱгренҷілеріне кізілерге Иеговадаңар чоохтирға чахаан (Матф. 28:19, 20). Пастап ол тоғысты идерге ле кирек полчатхан ӱчӱн идерзер, арса. Иеговаа хынызыңар тыып одырза, сірер, Пётр паза Иоанн илҷілер чіли, сағынарзар. Олар тееннер: «Піс позыбыс кӧрген паза искен нимелердеңер чоохтабин пол полбинчабыс» (Илҷ. 4:20). Кізее Иеговаа хынып аларға полысханы пирчеткен ӧріністең артых ӧрініс тее чох полар. Сағын кӧріңер, эфиоп пастыхха сынны піліп аларға паза кіреске тӱзерге полыс пиргенде, Филипп искірігҷі хайди ӧрінген полар! Филиппке кӧӧгіп паза Худай сӧзін искірерге Иисус пирген чахығ хоостыра тудынып, сірер Иегованың киречізі поларға хынчатханыңарны кӧзідерзер. (Римдегілерге 10:10, 13, 14 хығырыбызыңар.) Андада сірер, эфиоп пастых чіли, сағынарзар, арса. Ол теен: «Мағаа кіреске тӱзерге ниме харығ полча?» (Илҷ. 8:36).

18. Мының соондағы статьяда ниме ӱзӱрібізербіс?

¹⁸ Кіреске тӱскені сірернің чуртазыңарда иң аарлығ пӧгін. Аннаңар мындағ сурығлардаңар чахсы сағынып алыңар: кіреске тӱзерінеңер ниме пілерге кирек? кіреске тӱзер алнында хайдағ алтымнар идерге кирек? кіреске тӱскен соонда ниме идерге кирек? Пу сурығлар мының соондағы статьяда ӱзӱрілерлер.