1. Иисус тӧрт палыхчыны ниме идерге хығырған паза олар ол хығырыға хайди ӱндескеннер?

 ПЕТР, Андрей, Иаков паза Иоанн, палых тудып, чуртаҷаңнар. Иисус оларға: «Мин сірерні, палых тутханни, кізілерні тут полар ит саларбын» *, — теенде, олар хайди хайхап парған поларлар. Че олар хайди ӱндескеннер? «Олар сах андох, сӧзірбелерін тасти, Аның соонҷа пар сыхханнар», — тіп пазылча (Матф. 4:18—22). Ол пӧгін оларның чуртастарын саңай алыстырыбысхан. Палых тудар орнына олар кізілерні тут сыхханнар (Лука 5:10). Пӱӱн дее Иисус сынға хынчатхан кізілерні «кізілерні тударға» хығырча (Матф. 28:19, 20). Сірер аның хығыриина ӱндескезер бе? Кізілерні тутчазар ба?

2. Кізілерні, палыхчы чіли, тударға пӧгін алар алнында, ноға чахсы сағынып аларға кирек паза ол пӧгінні аларға ниме полыс пирер?

² Сірер, Библияны ӱгреніп, чуртазыңарда хайдағ-да кирек алызығлар иткезер, арса. Ам мағаа чахсы хабарның искірігҷізі поларға кирек пе тіп сурығның алнында турчазар. Чахсы хабарның искірігҷізі поларға тідінминчетсер, сағыссырабаңар, сірер аарлығ пӧгін алнында турчатханыңарны пілче поларзар. Библияда Петр, Андрей, Иаков паза Иоанн сах андох Иисустың соонҷа пар сыхханнар тіп пазылча. Че оларның пӧгіні сағын албин алған пӧгін полбаан. Олар, Иисуснаң чарым чыл аның алнында танызып алып, ол Мессий полчатханын піліп алғаннар (Иоанн 1:35—42). Сірер дее Иеговадаңар паза Иисустаңар кӧп ниме піліп алған поларзар паза духовнай саринаң аннаң андар ӧзерге хынча поларзар. Че искірігҷі поларға пӧгінні, чахсы сағынып албин, аларға чарабас. Ол тӧрт палыхчаа андағ пӧгін аларға ниме полысхан?

3. Ус искірігҷі паза ӱгретчі поларға піске ниме полыс пирер?

³ Иисустың пастағы ӱгренҷілері постарының тоғыстарына хынғаннар паза аны чахсы пілгеннер, махачы полғаннар паза самодисциплина кирек полчатханын пілгеннер. Анзы оларға кізілерні ус тударға полысхан. Пу статьяда піс ниме сірерге чахсы хабарның ус искірігҷізі паза ӱгретчізі поларға полыс поларын ӱзӱрібізербіс.

4. Ноға Петр палыхчы полған?

⁴ Петр, позының сӧбірезін азырирға кирек полчатхан ӱчӱн не, палыхты тутпаан, ол позының тоғызына хынған (Иоанн 21:3, 9—15). Ідӧк ол Иисус пирген тоғысха — «кізілерні тударына» — хынып алған. Иегованың полызиинаң Петр ол тоғысты уғаа маңнаныстығ иткен (Илҷ. 2:14, 41).

5. Лука 5:8—11 хоостыра, Петр нимедең хорыххан паза піске хорыхпасха ниме полыс пирер?

⁵ Пісті искіріг тоғыста аралазарға Иеговаа хыныс кӧӧктірче. Олох хыныс позыбыстың хорығыстарыбысты тобырып аларға полысча. Петрны «кізілерні тударға» хығырғанда, Иисус ағаа: «Хорыхпа», — теен. (Лука 5:8—11 хығырыбызыңар.) Петр, Христостың ӱгренҷізі полып алған соонда, аны ниме сағыпчатханынаң хорыхпаан. Иисус ағаа паза аның нанҷыларына уғаа кӧп палых тудып аларға полыс пиргеніне Петр тың хайхап парған. Анзы хайхас полчатханын ол пілген паза позын аннаң хада тоғынарға турыстығ нимеспін тіп сананған. Сірер дее хорыхчазар, арса. Арса, сірер, христианин полып алзам, мині ниме сағыпча тіп сағыссырапчазар. Андағ полза, Иеговаа, Иисусха паза кізілерге уламох хынып аларға кӱстеніңер. Анзы сірерге Иисустың «кізілерні тударға» хығырчатханына ӱндезерге полыс пирер (Матф. 22:37, 39; Иоанн 14:15).

6. Паза ниме пісті Худай сӧзін искірерге кӧӧктірче?

⁶ Искіріг тоғызында аралазарға кӧӧктірчеткен нинҷе-де сылтағны кӧрібізеелер. Піс Иисус пирген чахығны толдырарға хынчабыс. Ол ӱгренҷілерні тимнирге чахаан (Матф. 28:19, 20). Ағаа хоза, піс кізілерге Хан-ӱлгӱдеңер сынны пілерге кирек полчатханын пілчебіс. Олар, «хадарҷы чох... астых чӧрчеткен хойларға» тӧӧйлер (Матф. 9:36). Иегова «прай кізілерні арачыланзыннар паза сынны пілеріне читсіннер тіп сағынча» (1 Тим. 2:4).

7. Римдегілерге 10:13—15 Худай сӧзін искірерге ноға кирек полчатханын хайди кӧзітче?

⁷ Пістің нымысчыланызыбыс кізілернің чуртастарын арачылапчатханын пілчетсебіс, піс анда хынып аралазарбыс. Палыхчы палыхты, садар алай чиир ӱчӱн, тутча. Піс, тізең, ол тоғыста, кізілерні арачылир ӱчӱн, араласчабыс. (Римдегілерге 10:13—15 хығырыбызыңар; 1 Тим. 4:16).

8, 9. Палыхчы кізее ниме пілерге кирек паза ноға?

⁸ Иисустың тузында Израильдегі палыхчаа талайда хайдағ палых тударын пілерге кирек полған (Лев. 11:9—12). Ідӧк ол сӧзірбені хайда тастирға пілерге кирек полған. Палых ағаа килістіре орыннарда паза чиис читкіҷе чирлерде полча. Хайдағ туста палыхтирға пасхазы пар ба? Я, пар. Пірсінде Тихий океандағы олтырыхта нымысчыланған миссионерні орындағы харындас палыхтап хығырған. Миссионер ағаа: «Иртен тоғыс час тузында тоғазарбыс», — теен. Харындас нандырған: «Іди пістің кирек киліспес. Мында таллирға кирек: ӱр арах узуп аларға алай палых тудып аларға».

⁹ Андағох оңдайнаң, пастағы вектегі ӱгренҷілер «палыхтығ» чирлерні таллап алҷаңнар паза андар кӧп арах палых тудып алар туста килҷеңнер. Иисустың ӱгренҷілері иблерде, садығ орыннарында, храмнарда паза синагогаларда Худай сӧзін искір чӧрҷеңнер (Илҷ. 5:42; 17:17; 18:4). Піске дее хаҷан кізілер ибде, хаҷан пасха чирде полчатханнарын пілерге кирек. Чахсы хабарны кӧп арах кізее искірерге хынчатсабыс, піске килістіре орын паза тус таллап ал турарға кирек (1 Кор. 9:19—23).

10. Иегованың организациязы піске хайдағ тиріглер пирген?

¹⁰ Палыхчаа килістіре тиріглер кирек паза ағаа оларнаң тузаланып оңнирға кирек. Піске дее нымысчыланыста килістіре тиріглер кирек. Ідӧк оларнаң тузаланып оңнирға кирек. Иисус позының ӱгренҷілерін «кізілерні тударға» ӱгреткен. Оларға ол ниме аларға, хайди искіріг тоғызын апарарға паза ниме чоохтирға чоохтаан (Матф. 10:5—7; Лука 10:1—11). Иегованың организациязы пӱӱн піске нымысчыланыс тиріглерінің чыындызын пирген. Ол уғаа тузалығ тиріглер *. Пісті ол тиріглернең тузаланарға ӱгретчелер. Андағ ӱгредіг сылтаанда, піс махачы паза ус арах ӱгретчілер пол парчабыс (2 Тим. 2:15).

11. Ноға палыхчаа махачы поларға кирек?

¹¹ Палыхчыларға махачы поларға кирек. Амыр талайда удаа кинетін хазыр чиллер пол сыхчалар. Ағаа хоза, палыхчыларға удаа хараа тоғынарға килісче. «Кізілерні тутчатханнар» ідӧк махачы поларға киректер. Піс Худай сӧзін искіріп пастапчатсабыс паза пасхаларына піс Иегованың киречілерібіс тіп чоохтапчатсабыс, удаа «хазыр чиллерге» урунчабыс: туған-чағыннар тоғырланчалар, таныс кізілер кӱлчелер паза пістің хабарны истерге хынминчатхан кізілерге тоғасчабыс. Че прай пу киректер піске хайхастығ нимес. Иисус позының ӱгренҷілеріне ыырҷыларның аразында Худай сӧзін искірерге кирек полар чоохтаан (Матф. 10:16).

12. Иисус Навин 1:7—9 хоостыра, ниме піске махачы поларға полысча?

¹² Хайди махачы полып аларға? Пастағызын, Иисус тигірдең искіріг тоғызынаң устапчатханында ікінҷілебеңер (Иоанн 16:33; Аз. ч. 14:14—16). Ікінҷізін, Иегова сірерге полысчатханына киртінізіңерні тыыдыңар (Матф. 6:32—34). Киртінізіңер нинҷе пик полып одырар, анҷох махачы полып одырарзар. Петр, Андрей, Иаков паза Иоанн, палыхчы тоғызын артыс салып, Иисустың соонҷа пар сыхханнарында пик киртіністерін кӧзіткеннер. Сірер дее чағыннарыңа паза туғаннарыңа Иегованың киречілерінең хада Библия ӱгренчем паза оларның чыылығларына чӧрчем тіп чоохтап пиргенде, пик киртіністеріңні кӧзіткезер. Иегованың пӧзік нравственнай нормаларынҷа тудынар ӱчӱн, сірерге чуртаста хайдағ-да алызығлар идерге киліскен полар. Анзын идер ӱчӱн, ідӧк махачы паза киртіністіг поларға кирек полған. Аннаң андар махачы поларға кӱстензер, пу сӧстер толчатханын кӧрерзер: «Хайдар даа парзаң, синің Худайың Иегова синнең хада полар». (Иисус Навин 1:7—9 хығырыбызыңар.)

13. Иегованың киректерін сағысха киргені паза пазырыс хайди піске махачы поларға полысча?

¹³ Махачы полар ӱчӱн, паза ниме идерге чарир? Аннаңар пазырарға (Илҷ. 4:29, 31). Иегова пазырыстарыңа нандырар паза сірерні хаҷан даа тастабас. Сірерге хабазар ӱчӱн, ол сыбыра сірернің хыриңарда полар. Ідӧк Иегова мының алнында позының нымысчыларын хайди арачылааннаңар сағынарға чарир. Ағаа хоза, сірерге сидіктерні тобырарға хайди полысханнаңар паза чуртасты алыстырарға кӱс пиргеннеңер сағыныңар. Ікінҷілебеңер, позының чонын Хызыл талайны кизір парыбысхан Худай сірерге дее Христостың ӱгренҷізі полып аларға полыс пирер (Исх. 14:13). Псаломда піди пазылых: «Хорыхпаспын, Иегова минің саримда. Кізі мағаа ниме ит полар?» (Пс. 118:6). Сірер дее ідӧк ікінҷілебеңер.

14. Масаэның паза Томоёның кӧзідімнері сірерні нимее ӱгретчелер?

¹⁴ Махачы полып аларға Иегованың пӱӱнгі нымысчылары полысчалар. Оларның піреелері уйатчыл кізілер полғаннар. Кӧзідімге, Масаэ тіп аттығ пиҷе уйатчыл кізі полған паза хаҷан даа искіріг тоғызында аралас полбаспын тіп сағынған. Таныс нимес кізілернең чоохтазарға килізер тіп сағынзох, ағаа аның алнында ол сых полбас стене ӧс парды тіп пілдірҷең. Ол, Худайға паза кізілерге хынып алар ӱчӱн, кӧп кӱс салған. Пу чир-чалбахха нинҷе асхынах тус халды тіп сағынҷаң паза, искіріг тоғызында аралазарға кӧңнін кӧдірзін тіп, Иеговаа пазырҷаң. Ол, позының хорығыстарын тобырып алып, ам общай пионер полып, нымысчыланча. Мына паза пір кӧзідім. Пу кӧзідім Иегова позының наа нымысчыларына махачы поларға полысчатханын кӧзітче. Томоё тіп аттығ пиҷе наа ла искірігҷі полып алып, пастағызын на нымысчыланарға парғанда, пастағыох турадағы ипчі ағаа аахтап сыххан: «Иегованың киречілері? Мағаа сірернең чоохтасчаң ниме чоғыл!». Анаң ізікті тазылада чабысхан. Томоё хорых парбаан. Ол хада нымысчыланған пиҷее теен: «Истің ме? Мин ахсымны даа азарға маңнанмаам, ол, тізең, мин Иегованың киречізі полчатханымны сизін салған. Хайдағ ӧріністіг!» Ам Томоё общай пионер полча.

15. Самодисциплина нимедір ол паза ноға ол христианнарға кирек?

¹⁵ Самодисциплина чох палыхчы кӧп палых тут полбас. Пір сӧстікте самодисциплина «посты кирек нимелерні идерге кӱстеп оңнааны» тіп пазылча. Самодисциплина палыхчыларға, иртен иртӧк турар ӱчӱн, прай тоғыстар иділгенҷе, талайда полар ӱчӱн паза, хомай даа кӱн полза, тоғынар ӱчӱн кирек. Халғанҷызына читіре тур халарға паза пирілген тоғысты маңнаныстығ толдырып аларға хынчатсабыс, піске ідӧк самодисциплина кирек (Матф. 10:22).

16. Позыбысты дисциплинаа ӱгредерге ниме полыс пирер?

¹⁶ Кізі самодисциплиналығ тӧрібинче. Сынында піс ниик арах чолҷа парарға кӱстенчебіс. Посты холда тудып оңнабин, самодисциплинаны тиліт полбас. Аннаңар піске аар тоғысты идерге ӱгреніп алар ӱчӱн полызығ кирек. Иегова позының ызых худынаң пастыра піске полысча (Гал. 5:22, 23).

17. 1 Коринфтегілерге 9:25—27 хоостыра, Павел позын дисциплинаа хайди ӱгреткен?

¹⁷ Павел илҷі самодисциплиналығ кізі полған, че ол позымның «иді-ханымны, чабассырап, пазынчам» тіп чоохтаан. (1 Коринфтегілерге 9:25—27 хығырыбызыңар.) Ол пасха даа христианнарны самодисциплиналығ поларға паза прай нимені «ипти паза оңдайли» идерге хығырған (1 Кор. 14:40). Піске, Иеговаа аннаң андар нымысчыланар ӱчӱн, Худай сӧзін сыбыра искірер ӱчӱн, кізілерні Библияның сынына ӱгредер ӱчӱн, самодисциплина кирек (Илҷ. 2:46).

18. Иегова пістің нымысчыланызыбысты маңнаныстығ санир ӱчӱн, ниме идерге кирек?

¹⁸ Палыхчы маңнанызын нинҷе кӧп палых тудып алғанынаң синепче. Піс, тізең, маңнанызыбысты нинҷе кізее Иегованың киречізі поларға полыс пиргенібіснең синебинчебіс (Лука 8:11—15). Пістің тигірдегі Пабабысха искіріг тоғызында аннаң андар араласчатханыбыс паза кізілерні Худайның сынына ӱгретчеткенібіс аарлығ. Андағ оңдайнаң піс аның паза аның Оолғының чооғын исчеткенібісті кӧзітчебіс (Марк 13:10; Илҷ. 5:28, 29).

19, 20. Ноға Худай сӧзін ам искірерге уғаа кирек?

¹⁹ Пірее хазналарда палыхты чылда нинҷе-де ле тус тударға чарадылча. Аннаңар, ол тус тоозыл паричатса, палыхчылар улам тың маңзырапчалар. «Кізілер тутчатханнарға» ідӧк маңзырирға кирек. Пу чир-чалбахтың тӱгенҷізі уғаа табырах чағдапча нооза! Кізілерні арачылап халар тус уғаа асхынах халды. Пу чуртас арачылапчатхан тоғысты соона салдырбаңар паза чахсы тус килерін сағып аларға кирек тіп сағынмаңар (Эккл. 11:4).

²⁰ Ноға искіріг тоғызы кирек полчатханнаңар сағыныңар, Библиядаң кӧп арах піліс аларға кӱстеніңер, махачы полыңар паза самодисциплинаны тилідіңер. Сигіс миллион азыра кізі прай чир ӱстӱнде «кізілер тутчаң» кізілер полып алғаннар. Оларға хозылып алзар, Иегова пирчеткен ӧріністі аларзар (Неем. 8:10). Иегова тоғыс тоозыл парды теенҷе, ол нымысчыланыста, прай кӱс салып, аралазарға пӧгін тудыңар. Мының соондағы статьяда Хан-ӱлгӱдеңер чахсы хабарны искірерге алған пӧгінібісті тастабасха ниме полызарын ӱзӱрербіс.