ИИСУС, чирде полғанда, пазырыстаңар кӧп нимее ӱгреткен. Ол туста фарисейлер тасхар, пулуңнарда турып алып, пазырҷаңнар. Ноға? Кізілер оларны махтазыннар тіп. Паза піреелері ӱр, кӧп чоохтанып, пазырҷаңнар. Ноға? Кӧп чоохтанғаннары ӱчӱн Худай оларны истер тіп сағынғаннар (Матфей 6:5—8). Иисус андағ пазырыстар тузазы чох полчатханын кӧзіт пирген. Іди ол азых чӱректіг кізілерге хайди пазырғаны саба полчатханын кӧзіт пирген. Че Иисус хайдағ пазырыстар саба полчатханын на кӧзітпеен.

Иисус Худайның ады сабланзын, аның Хан-ӱлгӱзі килзін паза аның кӧңні чирде толзын тіп пазырарға чоохтаан. Ідӧк Иисус постың кирексіністерінеңер пазырарға чарир тіп ӱгреткен (Матфей 6:9—13; Лука 11:2—4). Паза Иисус, Худай пістің пазырыстарыбысты иссін тіп, хатап-хатап пазырарға, пазырыста киртіністіг паза пазымнығ поларға кирек полчатханына кӧзідімнернең ӱгреткен (Лука 11:5—13; 18:1—14). Иисус пазырыстаңар нимее ӱгреткен, позы ідӧк тудынған (Матфей 14:23; Марк 1:35).

Ікінҷілес чоғыл, прай пу ӱгредіглернің сылтаанда, ӱгренҷілернің пазырыстары тирең арах пол парған полар. Че иң аарлығ ӱгредігні Иисус позының чирдегі халғанҷы хараазында пирген.

Ол хараа Иисус, ӱгренҷілерін тыыдып, оларнаң уғаа ӱр чоохтасхан. Ол тус наа нимее ӱгрет саларға уғаа килістіре тус полған. Иисус теен: «Чол, Сын паза чуртас — Минмін. Мағаа киртінчеткен кізі ле Пабамзар пар полар, Мин чох пірдеезі пар полбас». Анаң ол оларны піди тыытхан: «Минің адымны адап, ниме дее сурынзар, Пабам минің пастыра сабланзын тіп, мин ит пирем. Минің адымны адап, пірее ниме сурынзар, мин анзын ит пирем». Оларнаң чоохтазып, тоозар алнында ол теен: «Амға теере, минің адымны адап, сірер пір дее ниме сурынмаазар. Ӧріністерің толдыра ползын тіп, сурыныңар — аларзар» (Иоанн 14:6, 13, 14; 16:24, НТ).

Иисустың пу сӧстері уғаа аарлығ сӧстер полғаннар. Пір библейскай справочникте олардаңар піди чоохталча: «Пазырыстың тархынындағы аарлығ алызығ». Иисус, Худайға нимес, че позына пазырарға кирек тіп ӱгретпеен. Ол, Худайға чағдирға полысчатхан, наа чол ас пирген.

Худай позының киртістіг нымысчыларының пазырыстарын сыбыра исчең (1 Самуила 1:9—19; Псалом 65:2). Че Худай Израиль чонынаң чӧптезіг турғыс салған соонда, Худайзар айланчатхан кізі Израиль Худай таллап алған чон полчатханына киртінерге кирек полған. Соонаң, Соломонның тузынаң сығара, тайығ саларға хынчатхан кізі Иерусалимде — Худай таллап алған орында — тайығ саларға кирек полған (Второзаконие 9:29; 2 Летопись 6:32, 33). Че прай ол нимелерні Павел илҷі «чахсы нименің кӧлегі ле» теен (Еврейлерге 10:1, 2). Соонаң, сын ниме кӧлектің орнына турыбызарға кирек полған (Колосстағыларға 2:17). Аннаңар пістің эраның 33 чылының сығара Моисей чахиин толдырарға кирек чох пол парған. Ол тустаң сығара Худайнаң палғалыс Иисустың чооғын искенінең палғалыстығ пол парған. Моисей чахии Иисуссар ағылған нооза (Иоанн 15:14—16; Галат чиріндегілерге 3:24, 25).

Иисус наа тӧстег турғыс салған. Ол тӧстег Худайға чағдирға иң артых оңдайнаң полысча. Ол позы, пістің нанҷыбыс полып, пазырыстарыбысха Худайзар чол асча. Че ноға Иисус піске іди полыс полча?

Піс прайзыбыс чазыхтығ тӧріпчебіс. Аннаңар, хайдағ даа тайығлар салзабыс, ноо даа киректер итсебіс, піс ол чазыхтаң арығлан полбаспыс паза ах-арығ Худайның нанҷызы пол полбаспыс (Римдегілерге 3:20, 24; Еврейлерге 1:3, 4). Иисус, тізең, пісті Худайға чағын полып алзыннар тіп, позының чуртазын тайыға салған (Римдегілерге 5:12, 18, 19). Аннаңар, Худайның хараанда арығ поларға паза Худайға чағдирға хынчатхан кізі Иисус чуртазын пістің ӱчӱн тайыға салғанына киртінерге паза Худайзар, Иисустың адын адап, айланарға кирек (Ефестегілерге 3:11, 12).

Иисустың адын адап, пазырып, піс Иисус Худайның сағызын толдырарында хайдағ роль ойнапчатханына киртінчеткенібісті кӧзітчебіс. Иисустың рольының ӱс сарин кӧр кӧреелер: 1) Иисус — «Худайның хурағаны», аның тайии пістің чазыхтарыбысты тастирына тӧстег полча; 2) Иисусты Худай тірілдіріп алған, ам ол «Иң улуғ абыс» полча, ол пирген тайығ сылтаанда пирілчеткен алғастарны піске читірче; 3) Иисус ла піске Худайға пазырыста чағдирға полысчатхан «чол» (Иоанн 1:29; 14:6; Еврейлерге 4:14, 15).

Иисустың адын адап, пазырчатсабыс, піс аны саблапчабыс. Анзында хомай ниме чоғыл. Худай позы Иисустың адынаң алнында «прайзы тізекке тӱссін» паза «ноо даа тіл Иисус Христостың Хан-пигібіс полчатханын чарлазын» тіп хынча (Филипптегілерге 2:10, 11). Че Иисустың адын адап, пазырып, Иегованы, пістің ӱчӱн позының Оолғын тайыға пирібіскен Худайны, саблапчатханыбыс иң аарлығ (Иоанн 3:16).

Иисустың Худайның сағызында хайдағ роль ойнапчатханын кӧзіт пирер ӱчӱн, Библияда аның аймах-пасха титуллары паза аттары пазылчалар, олар піске Иисус ниме иткенін, итчеткенін паза идерін кӧзітчелер. (14-ҷі страницадағы  «Иисустың аарлығ рольы» тіп рамканы кӧріңер.) Сынап «ағаа ноо даа аттаң пӧзік ат пирілген» *. Ағаа тигірде дее, чирде дее прай ӱлгӱ пирілген (Филипптегілерге 2:9; Матфей 28:18).

Хайди кӧрчебіс, піске, Худай пісті иссін тіп, Иисустың адын адап, пазырарға кирек (Иоанн 14:13, 14). Че анзын піс кӧнік парған на ӱчӱн идерге хынминчабыс. Ноға?

Кӧзідім кӧр кӧреелер. Пірее официальнай пічікте «прай чӱрекнең» тіп хол салған ползалар, хайди сағынарҷыхсар: ол кізі сынап прай чӱрекнең пасхан ма алай этикет хоостыра ла іди пас салған ма? Пілдістіг, пазырыста піс Иисустың адын кӧнік ле парған ӱчӱн адирға хынминчабыс. Пістің пазырыстарыбыстың смыслы ол этикет хоостыра пазылған пічіктең хай-хай тирең поларға кирек. Библия пісті «сыбыра пазырарға» хығырча, че пістің пазырыстарыбыс олаңай ла кӧнігіс полбасха кирек. Піске «прай чӱрекнең» Худайзар айланарға кирек (1 Фессалониктегілерге 5:17; Псалом 119:145).

Иисустың адын адап, пазырғаныбыс олаңай ла кӧнігіс пол парбазын тіп, ниме идерге? Иисустың уғаа чахсы качестволарынаңар сағын кӧрерге чарир. Паза ол піске ниме иткеннеңер, алнынзархы туста ниме идерінеңер сағын кӧріңер. Пазырыстарыңда Иегованы Иисусха пирген роль ӱчӱн махтаңар паза алғыстаңар. Анзы Иисус пирген сӧстерге киртіністеріңні тыыдар. Ол піди теен: «Минің адымны адап, Пабамнаң ниме дее сурынзар, ол сірерге пирер» (Иоанн 16:23, НТ).