ПАЗЫРЫСТЫҢ тузазы пар ба? Худайға киртістіг нымысчыларның пазырыстары сынап оларға туза ағылчалар (Лука 22:40; Иаковтың 5:13). Пазырыс духовнай, эмоциональнай паза физическай даа саринаң туза ағылча. Хайди?

Кӧзідімге, палаңарға сыйых пиргеннер. Чӱреенде ле алғыстығ поларға ӱгредерзер бе? Алай алғызын читірерге ӱгредерзер? Чувстволарыбыстаңар чоохтапчатсабыс, піс олардаңар сағынчабыс, аннаңар пістің чувстволарыбыс улам тирең полчалар. Худайнаң чоохтасчатсабыс, чувстволарыбыс ідӧк тирең полчалар. Нинҷе-де кӧзідім кӧр кӧреелер.

Алғыстап пазырғаны. Прай пар нимелерібіс ӱчӱн Пабабысты алғыстапчатсабыс, ол алғастардаңар сағынчабыс. Іди пістің алғызыбыс тирең полар паза ӧрінізібіс ӧзер, кӧңнібіс, тізең, чахсы полар (Филипптегілерге 4:6).

Кӧзідім. Иисус Пабазын аның пазырыстарын искен паза ол пазырыстарға нандырған ӱчӱн алғыстаан (Иоанн 11:41).

Пыро тастирға сурынып пазырғаны. Худайдаң пыро тастирға сурынчатсабыс, пістің совезібіс чахсы арах тоғынча, піс тирең арах пыросынчабыс паза нинҷе аар чазых ит салғыныбысты пілінчебіс. Ағаа хоза, пазырған соонда, пыроланып, чобалбинчабыс.

Кӧзідім. Давид пазырыста пыросынған (Псалом 51).

Устағ паза хыйға сағыс сурынып пазырғаны. Аарлығ пӧгіннер алар алнында Иеговадаң устағ паза хыйға сағыс сурынзабыс, піс сынап пазымнығ поларбыс. Андағ пазырыс пістің піс постарыбыс прай сидіктерні пӧк полбинчатханыбысты сағысха кирче паза Иеговаа уламох ізенерге полысча (Притчи 3:5, 6).

Кӧзідім. Израиль чонынаң орта устир ӱчӱн, Соломон пазырыста устағ паза хыйға сағыс сурынған (1 Царей 3:5—12).

Аар тустарда пазырғаны. Сидік тустарда, чӱреебісті прай азып, пазырзабыс, чӱреебіс амырап парыбызар паза позыбысха ізенмин, Худайға ізенербіс (Псалом 62:8).

Кӧзідім. Аса хан аннаң хай-хай кӱстіг ыырҷынаң чаалазар алнында пазырған (2 Летопись 14:11).

Полызығ кирексінчеткеннердеңер пазырғаны. Андағ пазырыстар постаңар ла сағынмасха, айаачы паза паарсах поларға полысчалар.

Кӧзідім. Иисус ӱгренҷелерінеңер пазырған (Иоанн 17:9—17).

Саблап пазырғаны. Піс Иегованы аның качестволарының, чахсы киректерінің ӱчӱн сабландырчатсабыс, аны уламох улуғлирбыс паза алғыстирбыс.

Кӧзідім. Давид Худайны чайаахтарның ӱчӱн прай чӱреенең саблаан (Псалом 8).

Ағаа хоза, пазырыс «кізі сағызы чит полбас Худайның амырына» чидіп аларға полысча (Филипптегілерге 4:7). Амғы амыры чох чир-чалбахта чӱректе амыр полғаны — уғаа улуғ сыйых. Ідӧк пазырыс сылтаанда пістің хазиибыс чахсы арах полча (Притчи 14:30). Че анзы піс кӱс салған на ӱчӱн полча ба? Алай пасха уғаа аарлығ ниме сылтаанда ба?