• ТӦРЕЕН ЧЫЛЫ: 1941

• ТӦРЕЕН ХАЗНА: БЕНИН

• ХАҶАН-ДА: КӦП ИПЧІЛІГ ПОЛҒАН, ИЕГОВАНЫҢ КИРЕЧІЛЕРІН СӰРГЕН

МЫНЫҢ АЛНЫНДА

Мин Бениндегі улуғ городта, Котонуда, тӧреем. Іҷе-пабам католиктер полғаннар. Мин, тізең, пірееде ле тигірибзер чӧрҷең полғам. Мының алнында пістің хазна кӧп ипчі аларға чаратчаң, аннаңар мында чуртапчатхан католиктер дее кӧп ипчіліг полғаннар. Минің тӧрт ипчі полған.

1970 чылларда военнай переворот пол парғанда, ам чахсы чуртирбыс тіп сағынғам. Аннаңар мин наа ӱлгӱнің саринзар турыбысхам паза политиканаң айғас сыххам. Иегованың киречілері политическай нейтралитет тутханнар, аннаңар наа ӱлгӱдегілер оларға хынмааннар. Мин дее оларны сӱргем. 1976 чылда Иегованың киречілерінің миссионерлерін хазнадаң сығара сӱрібіскеннерінде, олар хаҷан даа нандыра айланмастар тіп сағынғам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН

1990 чылда политическай режим алыс парған. Ӱр ниместең Иегованың киречілерінің миссионерлері нандыра айлан килгеннер. Мин анзына уғаа тың хайхап парғам. Пу кізілернең хада Худай полар тіп сағын салғам. Ол туста мин наа тоғысха кіріп алғам, анда Иегованың киречізі тоғынған. Ол мағаа позының киртіністерінеңер чоохтап сыххан. Иегова хыныстың паза справедливостьтың Худайы полчатханын Библиядағы стихтарнаң кӧзіт пирген (Второзаконие 32:4; 1 Иоанның 4:8). Ол качестволар минің кӧңніме кіргеннер. Мин Иегова Худайнаң танызып аларға хынғам, аннаңар Библия ӱгрен сыххам.

Ӱр ниместең мин Иегованың киречілерінің чыылығларына чӧр сыххам. Оларның аразында сын хыныс полған, анзы мині хайхатхан. Олар кізілерні расаларға паза социальнай класстарға чарбааннар. Нинҷе кӧп оларнаң хада тус иртіргем, анҷох кӧп олар Иисустың сын ӱгренҷілері полчатханын кӧргем (Иоанн 13:35).

Мин піліп алғам: Иеговаа нымысчыланарға хынчатсам, мағаа католическай религиядаң сығыбызарға кирек. Кізілер миннеңер ниме сағынарлар тіп хорыххам, аннаңар сығыбызарға оой полбаан. Илееде тус ирт парғанда ла, тигірибдең сығып алғам. Анзында мағаа Иегова полыс пирген.

Ағаа хоза, мағаа пір улуғ алызығ идерге кирек полған. Библиядаң Худай кӧп ипчінең чуртирға чаратпинчатханын піліп алғам (Бытие 2:18—24; Матфей 19:4—6). Худайның хараанда пастағы ипчінең не хоных хонғаны закон хоостыра хоных тіп саналча. Аннаңар мин пастағы ипчімнең хонығымны регистрировать пол салғам, пасхаларын, хызылып чуртабазыннар тіп, прай ниме пиріп, ызыбысхам. Нинҷе-де тус пазынаң оларның ікізі Иегованың киречілері пол парғаннар.

ЧУРТАЗЫМА ХАЙДАҒ ТУЗА АҒЫЛҒАН

Минің ипчім ам даа католик полча, че Иеговаа нымысчыланчатханымны улуғлапча. Мин чахсы ир пол парғам. Піс ікізібіс тее іди санапчабыс.

Политикада аралазып, кізілернің чуртастарын чахсы саринзар алыстыр полам тіп сағынғам. Че прай ниме тик ле полған. Ам мин пілчем: Худайның Хан-ӱлгӱзі ле прай кізілернің сидіктерін пӧк полар (Матфей 6:9, 10). Иегова мині сынап часкалығ чуртас апарарға ӱгрет салған, аннаңар мин ағаа алғыстығбын.

• ТӦРЕЕН ЧЫЛЫ: 1977

• ТӦРЕЕН ХАЗНА: БРАЗИЛИЯ

• ХАҶАН-ДА: ПЯТИДЕСЯТНИКТЕРНІҢ ТИГІРИБІНДЕ ПАСТОР ПОЛҒАН

МЫНЫҢ АЛНЫНДА

Мин Сан-Паулу штатта, Иту городтың хыринда ӧскем. Городтың ол чардығында уғаа кӧп сайбағлар полҷаңнар.

Мин уғаа сайбах чуртас апарчатхан, чабал кізі полғам. Ағаа хоза, наркотиктер сатчаң полғам. Пола-пола андағ чуртас мині харибзер алай сыыраттарзар ағылар тіп сағын сыххам. Аннаңар чуртазымны алыстырыбызарға пӧгін алғам. Мин пятидесятниктернің тигірибінзер чӧр сыххам, соонаң анда пастор полып алғам.

Мин сағынғам: «Тигірибде нымысчыланып, кізілерге полыс полам». Орындағы радиода религиознай передача апарғам, аннаңар саблығ кізі пол парғам. Че пола-пола піліп алғам: тигіриб кізілер чахсы чуртазыннар тіп сағынминча, Худайны саблирынаңар уламох асхынах сағынча. Мин кӧргем: тигірибге ахча ла кирек. Аннаңар аннаң парыбызарға пӧгін алғам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН

Иегованың киречілерінең Библия ӱгрен сыххамдох, кӧр салғам: олар пасха религияларға тӧӧй ниместер. Пастағызын, олар Худайға паза чағыннарға хыныстаңар чоохтап ла чӧрбинчелер, че хыныстарын киректернең кӧзітчелер. Ікінҷізін, олар политикада паза чааларда араласпинчалар (Исайя 2:4). Прай пу киректернің сылтаанда, мин сын религияны — мӧгі чуртасха апарчатхан тарғынах чолны — таап алғанымны піліп алғам (Матфей 7:13, 14).

Мағаа Худайның кӧңніне кірер ӱчӱн, кӧп алызығлар идерге кирек полчатханын кӧргем. Сӧбіреме кӧп арах хайығ саларға кирек полған. Ағаа хоза, мин пазымнығ кізі полбаам. Алызарға оой полбаан, че Иегованың полызиинаң алызып алғам. Минің іди алыс парғанымны кӧріп, ипчім уғаа ӧрін парған. Ол миннең пурун Библия ӱгрен сыххан, че, минзер кӧріп, ол духовнай саринаң табырах ӧс сыххан. Піс ипчімнең хада Иегованың киречілері поларға пӧгін алғабыс. Піс пір кӱнде кіреске тӱскебіс.

ЧУРТАЗЫМА ХАЙДАҒ ТУЗА АҒЫЛҒАН

Піс ӱс палабысха Иегованың нанҷызы поларға полысчабыс. Пістің уғаа чахсы сӧбіре. Мин Иеговаа аның Сӧзінде, Библияда, пазыл парған сынны піліп аларға чаратхан ӱчӱн уғаа алғыстығбын. Ол сын кізінің чуртазын чахсы саринзар сынап алыстырча! Мин анзына тіріг киречілес полчам.

• ТӦРЕЕН ЧЫЛЫ: 1957

• ТӦРЕЕН ХАЗНА: АВСТРАЛИЯ

• ХАҶАН-ДА: СӦБІРЕДЕ ИРЕЕЛЕНІП ӦСКЕН

МЫНЫҢ АЛНЫНДА

Мин Ньюкасл городта тӧреем (штат Новый Южный Уэльс). Пістің читі пала полған, мин иң улии полғам. Пабам удаа, араға ізіп алып, пісті сох салҷаң. Іҷем дее уғаа чабал кізі полған. Ол пісті сохчаң паза сӧклеҷең. Ол мағаа сыбыра: «Син хомай палазың, аннаңар адта ирееленерзің», — тіҷең. Ол сӧстерні истіп, мин уғаа хорыхчаң полғам.

Іҷем мині кӧгерте сох салҷаң, аннаңар мин удаа школаа чӧрбеҷең полғам. Мағаа 11 час полғанда, мині детдомзар апарыбысханнар, анаң монастырьзар пирібіскеннер. 14 час толғанда, мин андартын тис салыбысхам. Ибзер айланарға хынмаам, аннаңар Сиднейдегі Кингс-Кросс районда тасхар чуртаам.

Анда мин наркотиктернең айғас сыххам, араға іс сыххам, порнография кӧр сыххам паза проститутка пол парғам. Пірсінде миннең уғаа хорығыстығ кирек пол парған. Ол туста мин хараа тоғынчатхан клубтың ээзінде чуртаам. Андар ікі ирен килген, мині пасха комнатазар ызыбысханнар, че мин оларның чоохтасханнарын истіп алғам. Ол мині ол иреннерге садыбызарға хынған. Ол иреннер, тізең, мині грузовой керіпнең Япониязар ызыбызарға хынғаннар, анда мағаа барда тоғынарға кирек полған. Хорых парып, балконнаң сегірібізіп, тис салыбысхам.

Мин Сиднейзер ӱр нимеске килген иренге тоғас парғам. Ол мағаа ахча пирер тіп сағынып, миннең ниме пол парғанын ағаа прай чоохтап пиргем. Анаң ол мині чуунып аларға паза азыранып аларға позынзар хығырып алған. Мин андар парғам. Анаң ол кізінең чуртап сыххам. Пір чыл пазынаң хоных хон салғабыс.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН

Мин Иегованың киречілерінең Библия ӱгрен сыххам. Библия ӱгренгемде, минің аймах-пасха чувстволар полған. Сайтан прай чабал киректерні итчеткенін піліп алғамда, уғаа тың тарынғам. Мағаа прай иреелерні Худай ысча тіҷеңнер. Худай кізілерні адта иреелебинчеткенін піліп алғамда, чӱреемее уғаа ниик пол парған. Ол ӱгредіг мині чуртас тооза хорыхтырған.

Иегованың киречілері, пӧгін алчатсалар, Библияда сыбыра устағ тілепчеткені мині хайхатхан. Олар киртініс хоостыра чуртаҷаңнар. Миннең оой полбаҷаң, че андағ даа полза, Иегованың киречілері мағаа хынҷаңнар паза улуғлаҷаңнар.

Мин позымны нимее чарабаан кізее санаам. Ол сағыстарны тобырарға иң сидік полған. Мин позымнаң чиркенгем. Кіреске тӱскен соонда даа, мин ол сағыстарны кӧп чыл тобыр полбаам. Мин Иеговаа хынғам, че ол мағаа хаҷан даа хын полбас тіп сағынғам.

Кіреске тӱскен соонда, 15 чыл пазынаң на минің сағызым алыс сыххан. Пірсінде Иегованың киречілерінің залында чоох чоохтапчатхан харындас Иаковтың 1:23, 24-ке хайығ салған. Ол стихтарда Худайның Сӧзі кӧріндеснең тиңнестірілче. Ол кӧріндес, Иегова піссер хайди кӧрче, позыбыссар ідӧк кӧрерге оңдай пирче. Андада мин сағын салғам: арса, мин позымзар, Иегова чіли, кӧрбинчем. Пастап ол сағысты мин хыйа идібіскем. Иегова мағаа хын полар тіп сағысха мин ам даа киртін полбинчатхам.

Нинҷе-де кӱн пазынаң мин Исайя 1:18 хығырып алғам. Ол стих минің чуртазымны саңай алыстырыбысхан. Анда Иегованың сӧстері пазыл парғаннар: «Киліңер, чаразып аларбыс... Чазыхтарың хызыл ис осхас ползалар, олар хар осхас ах пол парарлар». Иегова минзер айланчатхан чіли пілдірген: «Вики, чаразып алааң. Мин чазыхтарыңны, чӱрееңні пілчем паза мин сағаа хынчам».

Мин ол хараазын узуп полбаам. Иегова мағаа хынчатханында ам даа ікінҷілеем. Че мин Иисус Христос пирген толығдаңар сағын сыххам. Анаң мағаа сағыс килген: Иегова мағаа уғаа ӱр тус тыстаныснаң хайча паза аймах-пасха оңдайларнаң позының хынызын кӧзітче. Че мин, тізең, Иеговаа піди тіпчеткен кізее тӧӧй полғам: «Синің хынызың асхынах. Оолғың пирген толығ минің чазыхтарымны хаҷан даа толып полбас». Андағ оңдайнаң Иегова пирген толығны хыйа итчеткем. Че ам ол толығдаңар тирең арах сағынып алғамда, мин піліп алғам: Иегова мағаа хынча.

ЧУРТАЗЫМА ХАЙДАҒ ТУЗА АҒЫЛҒАН

Мының алнындағы чазыхтарым мині паза иреелебинчелер. Ам минің чуртазымда смысл пар. Сӧбіремде прай ниме чахсы. Миніңӧк сидіктеріме тӧӧй сидіктерге урунчатхан кізілерге полыс полчатханыма ӧрінчем. Мин Иеговаа чағын арах пол парғанымны сизінчем.

• ТӦРЕЕН ЧЫЛЫ: 1974

• ТӦРЕЕН ХАЗНА: РОССИЯ

• ХАҶАН-ДА: ТЯЖЕЛАЙ РОКНАҢ АЙҒАСХАН

МЫНЫҢ АЛНЫНДА

Мин илбек композитор Петр Ильич Чайковский тӧреен городта, Воткинскте ӧскем. Піс, хызылып, чуртаабыс. Пабам чахсы кізі полған, че сыбыра араға ісчең. Аннаңар ибдегі чуртас аар полған.

Мин школада хомай ӱгренгем. Аннаңар позымны нимее чарабас кізее санап сыххам. Мин кізее киртінмес, тумай кізі пол парғам. Школада мағаа уғаа аар полған. Доска хыринда турып алып, мин олаңай даа нимелерні чоохтап полбинчатхам. Пасха тустарда олох нимелерні пір-ікі ле чоохтабысчаң полғам. Сигіс класс тоос салғамда, мағаа мындағ характеристика пиргеннер: «Сағыстарын чарыда чоохтап полбинча паза чоохтанҷаң сӧстер таппинча». Аның алнында даа позымны нимее чарабас кізее санаам, че ол сӧстер соонда, тізең, ноо нимее чуртапчам тіп, улам тың сағын сыххам.

Саарбах тузымда мин араға іс сыххам. Пастап араға минің кӧңнім кӧдірҷең, че иртіре кӧп ізібіссем, совезім мині иреелеҷең. Тик ле чуртапчам тіп пілдірҷең. Минің холым саңай тӱс парған, аннаңар пірееде ибдең нинҷе-де кӱн сыхпаҷаң полғам. Паза позыма хол салыныбызарға сағыстар пол килҷең.

Мағаа 20 час полғанда, андағ хомай сағыстар нинҷе-де тусха чох пол парғаннар. Мин тяжелай рокнаң айғас сыххам. Андағ рок мағаа кӱс пирчеткенге тӧӧй пілдірген. Мин сазым ӧскіріп алғам, ызырғалар кис чӧр сыххам, мин хынған музыканттар чіли тонан сыххам паза тяжелай рок исчеткеннернең нанҷылас сыххам. Пола-пола мин хазыр, чабал кізі пол парғам паза чағыннарымнаң удаа хырыс сыххам.

Тяжелай рокнаң айғассам, часкалығ арах пол парам тіп сағынғам. Че сынында минің чуртазым хомайдаң хомай пол сыххан. Минің кумирларымнаңар пірее хомай ниме ис салзам, мині алаахтыр салғаннар тіп пілдірҷең.

Мин пазох позыма хол салыныбызарға сағын сыххам. Ам ол сағыс пазымнаң сыхпин сыххан. Мин пілгем: андағ ниме идібіссем, іҷемнің чӱрее сыдабас. Анзы ла мині тохтатхан. Іҷем мағаа уғаа тың хынған паза мағаа кӧп ниме иткен. Мағаа уғаа хомай полған: чуртирға даа хынмаам паза позыма хол даа салын полбаам.

Хомай сағыстарны тастабызар ӱчӱн, орыс классическай литература хығыр сыххам. Пір произведениеде тигірибде нымысчыланчатхан кізідеңер чоохталған. Андада минің Худайға паза кізілерге пірее ниме ит пирерге сағыс килген. Пастағызын на Худайға прай чӱреемнең пазырғам, чуртастың смыслын табарға полыс пирерге сурынғам. Пазырыс тузында чӱреем амырап парыбысхан. Анаң полған ниме мині уламох хайхатхан. Ікі ле час пазынаң минзер Иегованың киречілері килгеннер. Библияны ӱгренерге хынчазың ма тіп сурғаннар. Анзы минің пазырызыма нандырығ полған. Іди минің наа, часкалығ чуртас пасталған.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН

Оой полбаза даа, тяжелай рокнаң палғалыстығ нимелерні прай тастабысхам. Че тяжелай рок минің сағызымнаң сыхпаан. Ол музыка ойнапчатхан орыннарның хыринда иртсем, мының алнындағы чуртазым хатап сағысха кірҷең. Мының алнындағы чуртазымнаңар сағыстар сағызымдағы паза чӱреемдегі чахсы нимелерні ардат салбазыннар тіп хынғам. Аннаңар мин андағ музыка ойнапчатхан чирлерде чӧрбеске кӱстенгем. Мин иткен хомай киректер сағысха кір сыхса, прай чӱрекнең Иеговаа пазырҷаң полғам. Андада мин хайди Худайның амыры чӱреемні паза сағыстарымны хайраллапчатханын кӧрҷең полғам (Филипптегілерге 4:7).

Библия ӱгреніп, христианнар киртіністерінең пасха кізілернең ӱлезерге кирек полчатханын піліп алғам (Матфей 28:19, 20). Мин киртінізімнең пасхаларынаң хаҷан даа ӱлес полбассым тіп сағынғам. Олох туста, сыннаңар пілістер мағаа часка паза чӱрееме амыр ағылғаннар. Мин пілгем, пасха кізілер ол сыннарны ідӧк піліп аларға киректер. Хорыхсам даа, мин Худай Сӧзінең алған пілістернең пасха кізілернең ӱлес сыххам. Хайхастығ, пасхаларына Худай сӧзін искір сыххамда, позымны улуғлап сыххам. Ідӧк, киртінізім пик пол парған.

ЧУРТАЗЫМА ХАЙДАҒ ТУЗА АҒЫЛҒАН

Минің пик сӧбіре. Нинҷе-де кізее, оларның санында пиҷем паза іҷем, Библиядағы сыннаң танызып аларға полыс пиргеніме уғаа ӧрінчем. Худайға нымысчыланып паза пасха кізілерге полызып, мин чуртаста смысл таап алғам.