Библия чуртасты алыстырча

НОҒА азартнай ойынҷы паза тонағҷы чуртазын алыстырыбысхан? Ол позынаңар ниме чоохтапчатханнаңар хығырып алыңар.

«Мин ат чарызына уғаа тың хынҷаң полғам» (РИЧАРД СТЮАРТ).

ТӦРЕЕН ЧЫЛЫ: 1965

ТӦРЕЕН ХАЗНА: ЯМАЙКА

ХАҶАН-ДА: АЗАРТНАЙ ОЙЫНҶЫ ПАЗА САЙБАҒҶЫ

МЫНЫҢ АЛНЫНДА. Мин Кингстонда, Ямайканың столицазында ӧскем. Кӧп чон чуртапчатхан орында чуртаам. Анда кӧп кізінің тоғыс чох полҷаң паза сайбағлар уғаа кӧп полҷаң. Чон орындағы бандалардаң хорыхчаң. Тасхар кӱннің сай атчаңнар.

Іҷем мині паза туңмаларымны ӧскірер ӱчӱн, аар тоғыс тоғынҷаң. Пісті чахсы ӱгредіг алзыннар тіп, прай кӱзін салҷаң. Мин ӱгренерге хынмаам, че ат чарызына уғаа тың хынҷаң полғам. Школада уроктарға чӧрбин, ипподромзар парыбысчаң полғам. Мин позым даа чалаң чӧрерге хынҷаң полғам.

Нинҷе-де тус пазынаң мин ат чарызына пӱкӱлее тартыл парыбысхам. Мин сайбах чуртас апарғам, ипчілернең матап оралысчаң полғам, марихуана тарт турғам. Прай ол нимелерні идер ӱчӱн, оғыр итчең полғам. Минің атчаң тиріглер кӧп полған, че оғыр иткен тустарда пір дее кізіні ӧдір салбаам. Анзына мин тың ӧрінчем.

Нинҷе-де тус пазынаң мин туттыр салғам. Мині харибге одырт салғаннар. Харибдең сыххамда, мин мының алнында иткен киректерімні пазох ит сыххам. Мин улам чабал кізі пол парғам. Минің сырайым амыр полған полза даа, сынында мин ӧчес, хыпчых паза чабал кізі полғам. Позымнаңар ла сағынғам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Мин хорығстығ чуртас апарған туста, іҷем Библия ӱгрен сыххан. Соонаң ол Иегованың киречізі пол парған. Іҷемнің чахсы саринзар алысчатхынын мин кӧргем. Ноға ол алыс сыхханын піліп аларға мағаа хынығ полған, аннаңар мин Библиядаңар Иегованың кирекчілерінеңер чоохтас сыххам.

Мин кӧргем: Иегованың киречілерінің ӱгредіглері пасха религияларның ӱгредіглерінең пасха полған; олар чоохтапчатхан ниме Библияда тӧстелче. Олар, пастағы христианнар чіли, иблеп Худай сӧзін искірчеткеннерін кӧргем (Матфей 28:19; Илҷілернің 20:20). Оларның аразындағы хынысты кӧріп, мин сын религия таап алғанымны піліп алғам (Иоанн 13:35).

Библияны ӱгреніп, мин піліп алғам: чуртазымны саңай алыстырарға кирек. Иегова Худай сайбах чуртасты хырт кӧрчеткенін паза, аның кӧңніне кірер ӱчӱн, ит-сӧӧгімні кірлепчеткен кӧнігістерні тастирға кирек полчатханымны піліп алғам (2 Коринфтегілерге 7:1; Еврейлерге 13:4). Иегованың чувстволары пары паза минің киректерім аны ачырғандырчатханы алай ӧріндірчеткені чӱрееме тың теңен (Притчи 27:11). Аннаңар мин марихуана тартарын паза атчаң тиріглерні тастабысхам. Че ипчілернең оралызарын паза азартнай ойыннар ойнирын тастабызарға иң сидік полған.

Пастап мин Библияны Иегованың киречілерінең ӱгренчеткенімні нанҷыларымнаң чазырҷаң полғам. Че пірсінде мин Матфей 10:33-те Иисустың сӧстерін хығырып алғам. Анда чоохталча: «Че кем кізілернің алнында Миннең хыйа полыбызар, Мин дее Тигірдегі Пабамның алнында аннаң хыйа полыбызарбын». Ол сӧстер нанҷыларыма Библияны ӱгренчеткенімні чоохтап пирерге кӧӧктіргеннер. Нанҷыларым, анзын истіп алып, саңай алаң ас парғаннар. Мин осхас кізі христианин полып аларға хынчатханына киртінерге оларға аар полған. Че андағ даа полза, мин хомай киректерімні тастирға хынчам тіп чоохтап пиргем.

ЧУРТАЗЫМА ХАЙДАҒ ТУЗА АҒЫЛҒАН. Чуртазымны Библейскай принциптер хоостыра алыстырғаныма іҷем уғаа тың ӧрінген. Амды ол мині хайдағ-да хомай кирекке кір парар тіп сағыссырабинча. Иеговаа хыныс піске удур-тӧдір чағын полып аларға полыс пирген. Мин мының алнында хайдағ полғанымны сағысха кирчетсем, Худай полызиинаң хайди алыс парғаныма хайхапчам. Мин сайбах паза ахчаа хынып чуртирға паза хынминчам.

Библияны ӱгренмеен ползам, харибде алай сыыратта поларҷыхпын. Минің чахсы сӧбіре: прай киректерде мағаа хабасчатхан ипчім паза чооғымны исчеткен хызым. Худайға оларнаң хада нымысчыланғаны мағаа ӧрініс ағылча. Мағаа хыныстығ харындас-пиҷелернің аразында поларға оңдай пиргініне мин Иеговаа уғаа тың алғыстығбын. Библиянын сынын піліп аларға полысхан кізілерге мин ідӧк алғыстығбын. Мин кізілерге Библияның ӱгредіглерінең танызарға ӧрініснең полысчам. Иегова мағаа паарсаснаң хынчатханына паза ағаа чағын полып аларға оңдай пиргеніне мин уғаа тың алғыстығбын.

[Вставка]

«Иегованың чувстволары пары паза минің киректерім аны ачырғандырчатханы алай ӧріндірчеткені чӱрееме тың теңен»

[Хоос]

Іҷемнің чахсы саринзар алысчатхынын мин кӧргем

[Хоос]

Ипчімнең паза хызымнаң хада